- उत्पत्ति 17 - Bundeli Holy Bible

बाचा कौ चिन्‍ह - खतना

¹ जब अब्राम निन्‍यानबे साल कौ हो गओ; तब यहोवा परमेसुर ने ऊहों दरसन दैकें कई, “मैं सर्वसक्‍तिमान यहोवा परमेसुर आंव; मोरी उपस्‍थिति में चल और खरो होत जा;

² जीसें मैं तोरे संगै बाचा बांधहों और तोरे बंस हों बेजा बढ़ाहों।”

³ तब अब्राम मों के बल गिरो। फिन यहोवा परमेसुर ऊसें जौ कहकें बातें करन लगो,

⁴ “हेर, मोरी बाचा तोरे संगै बंधी रैहै, ई लाने तें मुतकी जातियन कौ मूलबाप हो जैहै।

⁵ ई लाने अब तोरो नाओं अब्राम नें रैहै, परन्‍त तोरो नाओं अब्राहम हुईये; कायसे मैंने तोहों मुतकी जातियन कौ मूलबाप ठैरा दओ आय।

⁶ मैं तोहों बेजा फलवन्‍त करहों, तोहों जाति-जाति कौ मूल बना दैहों और तोरे बंस में राजा पैदा हुईयें।

⁷ मैं तोरे संगै, और तोरे बाद पीढ़ी दर पीढ़ी लौ तोरे बंस के संगै भी ऐई सम्‍बन्‍ध में जुग-जुग की बाचा बांधत आंव, कि मैं तोरो और तोरे बाद तोरे बंस कौ भी यहोवा परमेसुर रैहों।

⁸ मैं तोए हों, और तोरे बाद तोरे बंस हों भी, जौ पूरो कनान देस जीमें तें परदेसी होकें रैत आय, ई तरहां सें दैहों कि बा जुग-जुग लौ उनकी निज भूमि रैहै, और मैं उनकौ यहोवा परमेसुर रैहों।”

⁹ फिन यहोवा परमेसुर ने अब्राहम सें कई, “तें भी मोरे संगै बांधी भई बाचा कौ पालन करियो; तें और तोरे बाद तोरो बंस भी अपनी-अपनी पीढ़ी में ऊकौ पालन करे।

¹⁰ मोरे संगै बांधी भई बाचा, जीकौ पालन तोहों और तोरे बाद तोरे बंस हों करने पड़है, ऊ जौ आय: तुम में सें एक-एक मान्‍स कौ खतना होए।

¹¹ तुम अपनी-अपनी खलड़िया कौ खतना करा लईयो: जो बाचा मोरे और तुमाए मजारें आय, ऊकौ जौई चिन्‍ह हुईये।

¹² पीढ़ी दर पीढ़ी में केवल तोरे बंस ही के मान्‍स नईं परन्‍त जो तोरे घर में पैदा भओ होए, या परदेसियन सें रूपा दैकें मोल लओ जाए, एैसे सबरे मान्‍स भी जब आठ दिना के हो जाएं, तब उनकौ खतना करो जाए।

¹³ जो तोरे घर में पैदा होए, या तोरी चांदी सें खरीद लओ जाए, ऊकौ खतना जरूरई करो जाए; ई तरहां मोरी बाचा जीकौ चिन्‍ह तुमाए सरीर में हुईये ऊ जुग-जुग बनो रैहै।

¹⁴ जो मान्‍स खतना नें कराहै, मतलब जिनकी खलड़िया कौ खतना नें हुईये, ऊ मान्स अपने जनों के मजारें सें काड़ दओ जाए, कायसे ऊने मोरे संगै बांधी भई बाचा हों तोड़ दओ।”

¹⁵ फिन यहोवा परमेसुर ने अब्राहम सें कई, “तोरी जो घरवारी सारै आय, ऊहों तें अब सारै नें कईयो, ऊकौ नाओं सारा हुईये।

¹⁶ मैं ऊहों आसीस दैहों, और तोए हों ऊसें एक मोंड़ा दैहों; और मैं ऊहों एैसी आसीस दैहों कि बा मुतकी जातियन की मूलमाता हो जैहै; और ऊके बंस में मुतके राज्‍यों के राजा पैदा हुईयें।”

¹⁷ तब अब्राहम मों के बल गिर पड़ो और हंसो, और मनई मन कैन लगो, “का सौ साल के मान्‍स के इतै संतान हुईये और का सारा जो नब्‍बे साल की आय मोंड़ा जनहै?”

¹⁸ अब्राहम ने यहोवा परमेसुर सें कई, “इश्‍माएल तोरी नजर में बनो रए! जौई बहुत आय।”

¹⁹ तब यहोवा परमेसुर ने कई, “पक्‍कौ तोरी घरवारी सारा हों तोए सें एक मोंड़ा पैदा हुईये; और तें ऊकौ नाओं इसहाक रखियो; और मैं ऊके संगै एैसी बाचा बांधहों जो ऊके बाद ऊके बंस के लाने जुग-जुग की बाचा हुईये।

²⁰ इश्‍माएल के बारे में भी मैंने तोरी सुनी आय; मैं ऊहों भी आसीस दैहों, ऊहों फलवन्‍त करहों और बेजा बढ़ा दैहों; ऊसें बारह परधान पैदा हुईयें, और मैं ऊसें एक बड़ी जाति बनाहों।

²¹ परन्‍त मैं अपनी बाचा इसहाक ही के संगै बांधहों जो सारा सें अगले साल की ठैराई गई बेरा में पैदा हुईये।”

²² तब यहोवा परमेसुर ने अब्राहम सें बातें करबो बन्‍द कर दओ और ऊके लिगां सें ऊपर चढ़ गओ।

²³ तब अब्राहम ने अपने मोंड़ा इश्‍माएल हों लओ; और ऊके घर में जितेक पैदा भए हते, और जितेक ऊके रुपईया सें मोल लए गए हते, मतलब ऊके घर में जितेक मान्‍स हते उन सब हों लैकें ओई दिना यहोवा परमेसुर के बचन के अनसार उनकी खलड़िया कौ खतना करो।

²⁴ जब अब्राहम की खलड़िया कौ खतना भओ तब ऊ निन्‍यानबे साल कौ हतो।

²⁵ जब ऊके मोंड़ा इश्‍माएल की खलड़िया कौ खतना भओ तब ऊ तेरह साल कौ हतो।

²⁶ अब्राहम और ऊके मोंड़ा इश्‍माएल दोई कौ खतना एकई दिना में भओ।

²⁷ ऊके घर में जितेक मान्‍स हते, जो घर में पैदा भए और जो परदेसियन के हाथ सें मोल लए गए हते, सब कौ खतना ऊके संगैई भओ।