- गलतियों 6 - Bundeli Holy Bible

¹ भईया हरौ, कोऊ मान्स कोई गलती में पकड़ो जाए, तो तुम जौन आत्मिक आव, तो नरमाई से ऐसे हां संभालो, और अपने हां चौकन्ने राखो कि गिर न जाओ।

² तुम एक दूजे को बुझवा उठाओ, और ई तरहां मसीह को नेम पूरो करो।

³ कायसे कोऊ कछु न होबे पै अपने हां कछु सोचे, तो अपने हां धोखा देत आय।

⁴ अकेले जनें अपने काम हां जांचे, दूसरे के लाने नईं अकेले अपने हां बड़वाई करबे को मौका हुईये।

⁵ कायसे हर मान्स अपनो बुझवा ढो है।

⁶ जौन धरम पोथी की बातें सीखत आय, बो सब नोंनी बातन में सिखाबेवारे हां सोई जोड़े।

⁷ धोके में न रओ, परमेसुर को मजाक नईं करो, कायसे मान्स जो कछु बो है ओई काट है।

⁸ कायसे जौन अपने जी के लाने बोत आय, बो अपने काजें नास होबे की कटनी काट है।

⁹ भलो करबे में हिम्मत न हारो, कायसे हम ढिलयाए न, तो अपनी बेरा पे कटनी काट हैं।

¹⁰ ईसे जां तक मौका मिलै हम सबरन के संग्गै भलो करें, मानके भईयन के संग्गै।

¹¹ हेरो, मैंने कैसे बड़े बड़े अक्षरन में तुम हां अपने हाथन से लिखो आय।

¹² जौन संसार हां दिखाओ चाहत हैं बे तुमाए खतना करवाबे हां जोर देत आंय, ईसे कि मसीह के क्रूस पै हो उन हां कोऊ न परेसान करें।

¹³ कायसे खतना कराबेवारे खुद नैम में नईं चलत, अकेले तुमाओ खतना ईसे चाहत आंय, कि तुम पै हो बड़वाई मारें।

¹⁴ अकेले ऐसो नईं होबे, कि मैं और कोऊ बात में बड़वाई करों, केवल हमाए पिरभु यीशु मसीह के क्रूस पै, जीसे संसार मोरे काजें और मैं संसार के काजें क्रूस पै चढाओ गओ हों।

¹⁵ कायसे न खतनावारे, और जौन को खतना नईं भओ कछु आंय, केवल जौन नए बन गए।

¹⁶ और जौन ई नैम पै चल हैं, उन पै और परमेसुर के खास इस्राएल पै, सान्ति और दया होत रए।

¹⁷ आगे कोऊ मोहां परेसान नईं करे, कायसे मैं यीशु की चिनानी हां अपनी देह में लगाए फिरत आंव।

¹⁸ भईया हरौ, हमाए पिरभु यीशु मसीह की दया तुमाई आत्मा पै रैबे। आमीन।