- गलतियों 5 - Bundeli Holy Bible

¹ मसीह ने छुट्टा होबे हां हमें छुड़ाओ आय; सो ऐंसई बने रओ, और दास को बोझा फिन से न लेओ।

² हेरो, मैं पौलुस तुम से कैत आंव, कि खतना करा हौ तो मसीह से तुम हां कछु फायदा न हुईये।

³ अकेले में खतना कराबेवारन हां समझात आंव, कि तुम हां पूरे नैम मानने पड़ हैं।

⁴ तुम जौन नैम द्वारा धरमी बनो चाहत आव, मसीह से अलग और दया से गिरे भए आव।

⁵ कायसे आत्मा के कारन हम बिसवास से, आबेवारी धरम की गैल हेरत आंय।

⁶ मसीह यीशु में न खतनावारो और न बिना खतनावारो कछु काम के आंय, अकेले जौन प्रेम से काम करत आय।

⁷ तुम तो बढ़िया दौड़ रय हते, फिन कीने तुम हां बिलोर दओ, कि सांची बातन हां न मानो।

⁸ ऐसो जीने तुम हां नबेरो उनकी सीख नईंयां।

⁹ थोड़ो सो खमीरा सबरे मड़े आटे हां खमीर कर डालत आय।

¹⁰ मोहां पिरभु कींसो तुम पै ईमान आय, कि तुमाओ कोऊ ओर विचार नईंयां; अकेले जौन तुम हां बिलोर देत आय, बो कोऊ काय न होबै दण्ड पा है।

¹¹ अकेले भईया हरौ, जैसे मैं अबै लौ खतना की बात करत आंव, तो काय हां मोहां परेसान करो जात आय; क्रूस से जौन डर हतो बो चलो गओ।

¹² भलो होतो, कि जौन तुम हां बिलोरत आंय बे काट डाले जाबें।

¹³ भईया हरौ, तुम छुट्टा होबे हां बुलाए गए आव अकेले ऐसो न होबै, कि जो छुट्टा होबो मनमानी हां छू ट दैबे, अकेले प्रेम से एक दूजे की सेवा करो।

¹⁴ कायसे सबरो नैम एकई बात में पूरो होत आय, कि तें अपने पड़ोसवारे से अपनो जैसो प्रेम राख।

¹⁵ अकेले तुम एक दूजे हां दांत से काटत आव और फाड़बे हां फिरत आव, सूदे रओ, कि एक दूजे हां सत्यानास न कर देओ।

¹⁶ अकेले मैं कैत आंव, आत्मा जैसो कैबे ऊंसे करो, तो तुम अपने मन की बात में न चल हौ।

¹⁷ कायसे मन आत्मा से उल्टो आय, और आत्मा मन से उल्टो आय, और दोई एक दूसरे के दुसमन आंय; कि जौन तुम करो चाहत आव ऊ न कर पाओ।

¹⁸ जैसे तुम आत्मा से चलत आव, तो नैम के नेंचें नईंयां।

¹⁹ मन के काज ऐसे आंय, जैसे परतिरिया संगत, गन्दे काम, लुच्चाई।

²⁰ मूरतन की पूजा, गुनयाई, बैर, न्याओ, जलन, विरोध, फूट और बुरय काम।

²¹ दूसरन को बुरओ चाहबो, नसा करबो, नांच, राई, और ऐसई बुरय काम, इनके लाने मैं पेंला से कैत आंव, जैसो पेंला सोई कहो हतो, कि ऐसे काम करबेवारे ईसुर के राज में हक्कदार नईं हुईयें।

²² अकेले आत्मा के फल प्रेम, आनन्द, मेल मिलाप, धीरज धरबो।

²³ दया, भलो करबो, बिसवास, नम्रता और कायदे से रैबो आय; ऐसे कामन से उलटो कोऊ नैम नईंयां।

²⁴ जौन मसीह यीशु के हो गए, उन ने अपने मन हां ऊ की सबरी इच्छा और अभलाखा संग्गै क्रूस पै चढ़ा दओ।

²⁵ मानो हम आत्मा से जीयत आंय, तो आत्मा जैसी चाल सोई चलें।

²⁶ हम अपने हां बड़ो सोच के एक दूजे हां परेसान न करें, और एक दूसरे को बुरओ न चाहें।