- गलतियों 3 - Bundeli Holy Bible

¹ हे मूरख गलतियो, की ने तुमाओ मन मोह लओ? तुमाई तो आंखन के सामूं यीशु मसीह क्रूस में दिखे।

² मैं तुम से जौ जानबो चाहत आंव, कि तुम ने आत्मा हां, नैम में चले से, कि बिसवास से पाओ।

³ का तुम ऐसे मूरख आव, कि आत्मा से लैके और देह की रीत पै अन्त कर हौ?

⁴ का तुम ने इतनो दुख ऐंसई उठाओ? अकेले जौ सब बेकार नईंयां।

⁵ सो जो कछु तुम हां आत्मा से मिलत और तुम में हो बड़े काज करत, का बो नैम के बताए कामन से, कि बिसवास के जौन बचन तुम ने सुने ऐसो होत आय?

⁶ इब्राहीम ने परमेसुर पे बिसवास धरो और ओई से ऊ धरमी कहाओ।

⁷ तो तुम जान लेओ, कि बिसवास करबेवारे इब्राहीम के बाल बच्चा आंय।

⁸ और धरम पोथी में आओ आय, कि परमेसुर अन्य जातियन हां बिसवास करे से धरमी ठहरा है, पेंला से इब्राहीम हां जौ बता दओ, कि तुमाए नाओं से सबरी जातनवारे आसीसें।

⁹ सो जौन बिसवास करत आंय, बे इब्राहीम के संग्गै आसीस पात हैं।

¹⁰ सो जितने जने नैम के काजन पै भरोसा करत आंय, उन सबरन हां श्राप मिल है, कायसे ऐसो लिखो आय, कि जौन नैम की पोथी में लिखी सबरी बातन नईं करत, बो श्रापित आय।

¹¹ जा बात तो खुली आय, कि नैम से परमेसुर लौ कोऊ धरमी नईं कहात, कायसे धरमी बिसवास करे से जी है।

¹² अकेले नैम को बिसवास से कछु लैबो दैबो नईंयां, अकेले जौन इन हां मान है, बो ओई से जीयत रै है।

¹³ मसीह जौन हमाए काजें श्रापित कहाए, हम हां मोल लेके नैम के श्राप से छुड़ा लओ कायसे ऐसो पोथी में लिखो आय, कि जौन काठ में लटकाओ जै है ऊ श्रापित आय।

¹⁴ जौ सब ईसे भओ, कि इब्राहीम हां जौन आसीस मिली बा मसीह यीशु में हो अन्य जातियन हां मिले, और हम बिसवास करबे से ऊ आत्मा पाएं, जी के लाने पेंला कहो गओ हतो।

¹⁵ भईया हरौ, मैं मान्सन जैसो कैत आंव, कि मान्स के बचन ऐसे पक्के हो जात आंय, कि कोऊ उनहां नईं टोड़त और न ऊ में कछु जोड़त आय।

¹⁶ सो प्रतिज्ञा इब्राहीम और उनके वंस वारन हां मिली, ऐसो नईं कैत, कि वंस हां; मतलब बिलात जन के काजें नईं अकेले एक जनें के वंस हां: और बो मसीह आय।

¹⁷ अकेले मैं जौ कैत आंव, कि जौन वाचा परमेसुर ने पेंला से पक्की करी हती, ऊहां नैम चार सौ तीस बरसन के बाद नईं मेंट सकी, कि वाचा बचन झूठे पड़ जाते।

¹⁸ कायसे सरग को सब कछु नैम से मिलो, तो जौन बचन दए हते उन से नईं, अकेले परमेसुर ने तो इब्राहीम हां प्रतिज्ञा से दे दई।

¹⁹ तो नैम को का भओ? बो तो बुरय कामन से बाद में मिली, कि ऊ वंस के आबे लौ रैबे, जीहां प्रतिज्ञा दई गई हती, और बा सरग के एक दूत के सामूं दई हती।

²⁰ बीचवारो तो एक को नईं होत, अकेले परमेसुर तो एकई आय।

²¹ तो का नैम परमेसुर की प्रतिज्ञा के आड़े आत है? ऐसो कभऊं न होबे, कायसे ऐसो नैम दओ जातो जीसे जीवन मिले, तो सांची आय कि धरमी सोई नैम से होते।

²² अकेले पवित्र पोथी में लिखो आय कि सबरे पाप के जाल में फंसे आंय, कि बा प्रतिज्ञा जीसे यीशु मसीह पै बिसवास करो चईये, बिसवास करबेवारन के काजें पूरी हो जाबे।

²³ अकेले बिसवास की बात आबे कै पेंला नैम के नेंचें हम हां बचात हती, और जी पै बिसवास करने हतो बो आबेवारो हतो, हमओई से बंधे रएं।

²⁴ ईसे नैम मसीह लौ ले जाबे में हमाओ गुरू रही आय, कि हम बिसवास से धरमी होबें।

²⁵ अकेले जब बिसवास आ गओ, तो हम गुरू के नेंचें नईं रए।

²⁶ कायसे तुम सबरे जनें यीशु मसीह पै बिसवास धरके, परमेसुर के बाल बच्चा बन गए।

²⁷ और तुम में से जिन ने मसीह में बपतिस्मा लओ उन ने मानो मसीह हां ओढ़ लओ आय।

²⁸ अब तो कोऊ यहूदी नईं रओ और न यूनानी; और न कोऊ चाकर, और न छुट्टा; न कोऊ मान्स, और न बईयर, कायसे तुम सबरे यीशु मसीह में एक आव।

²⁹ तुम यीशु के हो गए, तो इब्राहीम के वंस के और प्रतिज्ञा जौन दई हती ऊके हक्कदार हो गए।