- गलतियों 2 - Bundeli Holy Bible

¹ चौदह बरस के बाद बरनबास के संग्गै मैं फिन के यरूशलेम हां गओ, और तीतुस हां सोई संग्गै ले गओ।

² मोरो जाबो ईसुर के बताए भओ: और जो बचन में अन्य जातियन में परचार करत हों, बो मैंने उन हां बता दओ; पै अकेले में उन हां जौन बड़े कहात हते, कि ऐसो नईं होबे, कि मोरी अबै की, और आंगे की दौड़ बेकार जाबै।

³ अकेले तीतुस जौन मोरे संग्गै हतो और जात से यूनानी आय; खतना करवाबे हां अबै जोर नईं डालो गओ।

⁴ ऐसो उन लबरा भईयन के कारण भओ, जौन लुक के भीतरे पोंच गए हते, और बा छूट जौन यीशु मसीह में मिली हती, ऊ को भेद लेके हम हां परेसान करें।

⁵ उनकी बातें हम ने एक घड़ी भर नईं मानी, कि बचन की सच्चाई तुम में बनी रए।

⁶ जौन जनें कछु बड़े समझे जात हते (बे चाए जैसे हते, मोहां ईसे काम नईंयां, परमेसुर कोऊ न्यारी बातें नईं करत) उन से जौन कछु समझे जात हते, मोहां कछु नईं मिलो।

⁷ अकेले जब उन ने तको, कि जैसो खतना भए लोगन हां बचन सुनाबे की जिम्मेवारी पतरस हां दई गईं, ऊं सई बिना खतनावारन के काजें मोहां।

⁸ (कायसे जीनें पतरस से खतना भय मान्सन में प्रेरिताई को कार्य बड़े प्रभाव से करवाओ, ओई ने मोसे अन्य जातियन में बढिया काम करवाओ)।

⁹ और जब उन ने बा दया हां जौन मोय पे भई जान लओ, तो याकूब, कैफा और यूहन्ना ने जौन मण्डली के खम्भा कहात हते, मोहां और बरनबास हां सूदो हाथ मिला के हम हां संग्गै कर लओ, कि हम अन्य जातियन लौ जाबें, और बे औरें खतना वारन लौ।

¹⁰ बस जा कई, कि हम गरीब गुरवन की सुध लेबें, और ओई काज करबे को मैं अपने हो लगो आंव।

¹¹ अकेले जब कैफा अन्ताकिया में आओ, तो मैंने उनके मों पे कई, कायसे उनको दोस हतो।

¹² कायसे याकूब लौ से कित्तई मान्सन के आबे के पेंला बो अन्य जातियन के संग्गै खात हतो, अकेले जब बे आए, तो खतनावारन के डर से उन से न्यारो हो गओ और बिचकन लगो।

¹³ उनके संग्गै बचे यहूदियन ने सोई बुरऔ करो, इते लौ कि बरनबास सोई उन की बातन में आ गओ।

¹⁴ अकेले मोहां लगो, कि बे बचन की बातन में सूदे नईं चलत, तो मैंने सबरन के सामूं कैफा से कहो, कि तें यहूदी होकें अन्य जातियन घांई चलत आय, और यहूदियन जैसो नईं तो तुम अन्य जातियन हां यहूदियन जैसो चलबे हां काय कैत?

¹⁵ हम तो जनम से यहूदी आंय, और पापी अन्य जातियन में से नईंयां।

¹⁶ अकेले जौ जानत आंय कि मान्स नैम पूरो करके नईं, परन्त यीशु मैं बिसवास धरके बच सकत आय, हम ने सोई मसीह पै बिसवास धरो, कि हम नैम के कानून कायदन से नईं, अकेले मसीह पे बिसवास धरे से धरमी बने; कायसे नैम के काम करबे से कोऊ जनो धरमी नईं होत।

¹⁷ हम में से जौन मसीह से धरमी होओ चाहत आंय, कहूं खुद पापी कड़े, तो का मसीह पाप को चाकर आय? कभऊं नईं।

¹⁸ कायसे जो कछु मैंने गिरा दओ, कहूं ओई हां फिन के उठात आंव, तो अपने आप अपराधी ठहरत हों।

¹⁹ मैं तो नैम से नैम के काजें मर गओ, कि मैं परमेसुर के लाने जीओं।

²⁰ मैं मसीह के संग्गै क्रूस पै चढाओ गओ हों, अब मैं जीयत नईंयां, अकेले मसीह मोय मैं जीयत आय: और मैं जौन देह में जीयत हों तो ऊ बिसवास से जीयत हों, जौन परमेसुर के पुत्र पै आय, जीनें मोय से प्रेम करो, और अपने प्रान मोरे लाने दे दए।

²¹ मैं परमेसुर की दया हां बेकार नईं कैत, कायसे धर्मी नैम से होतो, तो मसीह को बलदान बेकार जातो।