- गलतियों 1 - Bundeli Holy Bible

¹ पौलुस जौन न मान्सन की मरजी से, न मान्सन से, अकेले यीशु मसीह और परमेसुर जौन पिता आय, जिन ने ऊहां मरे भयन में से जिलाओ, प्रेरित आय।

² और सबरे भईयन कोद से, जौन मोरे संग्गै आंय; गलतिया की मण्डली के नाओं।

³ परमेसुर पिता, और हमाए पिरभु यीशु मसीह से तुम हां दया और सान्ति मिलत रए।

⁴ उनईं ने अपने हां हमाए पापन के काजें दे दओ, किहमाए परमेसुर पिता की मरजी से हमें ई बुरए संसार के बन्धन से छुड़ाबै।

⁵ उनको गुनगान और मान हमेसा लौ होत रए। आमीन।

⁶ मोहां समझ में नईं आत, की जीने तुम हां मसीह की दया से टेरो उन से तुम इतनी जल्दी पलट के और बातन में लग गए आव।

⁷ अकेले कोऊ और बचन नईंयां: बतकाओ ऐसो आय, कि कितेक ऐसे आंय, जौन तुम हां बिलोर देत आंय, और मसीह के बचन हां बिगाड़ो चाहत आंय।

⁸ अकेले हमऔर सरग को कोऊ दूत इन बचन हां छोड़ जौन हम ने सुनाओ कोई और बातें तुम हां सुनाबे, तो ऊ पे श्राप होबे।

⁹ जैसो हम पेंला कै चुके, ऊं सई अबै सोई कैत आंव, कि उन बचन हां छोड़ जौन तुम ने माने, कोऊ और बातें कैबे, तो ऊ पे श्राप होबे। अब मैं का मान्सन हां राजी करत आंव कि परमेसुर हां? का मैं मान्सन हां खुस करो चाहत आंव।

¹⁰ अबै लौ मैं मान्सन हां खुस करत रओ होतो, तो मैं मसीह को दास नईं होतो।

¹¹ भईया हरौ, मैं तुम हां चिताए देत आंव, कि जौन बचन मैंने सुनाओ आय, बो मान्स को सौ नईंयां।

¹² कायसे बो बचन मोहां मान्स से नईं मिलो, और कोऊ ने मोहां नईं सिखाओ, अकेले यीशु मसीह की जोत से मिलो।

¹³ यहूदी बिरादरी में पेंला जैसी मोरी चाल हती, तुम ने सुन लई आय; कि मैं परमेसुर की मण्डली के लोगन हां बिलात सतात हतो और मार डालत हतो।

¹⁴ अपनी जात भईयन जौन मोरी उमर के हते उनसे आगे बढ़ो भओ हतो, और अपने बाप दादन की रीत हां मानबे में बहुत आगे हतो।

¹⁵ अकेले परमेसुर, जीने मोरी मताई के गरभ से मोहां नबेरो हतो और अपनी दया से बुला लओ।

¹⁶ जब उनकी मन्सा भई, कि मोपे अपने पुत्तर हां प्रगट करें कि मैं जौन यहूदी भईयन उन हां बचन सुनाओं; तो मैंने मान्स से कछु सलाह नईं लई।

¹⁷ और न यरूशलेम जाके जौन मोय से पेंला के प्रेरित हते भेंट करी, अकेले तुरतईं अरब देस हां चलो गओ: और उते से सीदो दमिश्क हां लौट आओ।

¹⁸ और तीन बरस बीते पै मैं कैफा से मिलबे यरूशलेम गओ, और उते पन्द्रह दिना लौ टिको।

¹⁹ अकेले पिरभु के भईया याकूब हां छोड़ और कौनऊ से नईं मिलो।

²⁰ जौन बातें मैं तुम हां लिख रओ आंव, परमेसुर हां सामूं जान के कैत आंव, कि बे लाबरी नईंयां।

²¹ ईके बाद मैं सूरिया और किलिकिया देस में आओ।

²² अकेले यहूदियन में से जौन मसीह हां मानबेवारी मण्डली, जिन ने मोरो मों लौ कभऊं न तको हतो।

²³ अकेले जौ सुनत हतीं, कि जौन पेंला हम हां सतात हतो, अब ओई धरम कौ बचन सुनात आय, जीहां पेंला नास करत हतो।

²⁴ और मोरे लाने परमेसुर को गुन गान करत हतीं।