- एस्तेर 2 - Bundeli Holy Bible

एस्‍तेर कौ पटरानी बनबो

¹ इन बातन के पाछें जब राजा क्षयर्ष कौ गुस्‍सा ठंड़ो पड़ गओ, तब ऊने रानी वशती की, और जौन काम ऊनें करो हतो, और जौन ऊके बारे में हुकम कड़ो हतो ऊकी सोई सुध लई।

² तब राज के सेवक जौन ऊके टहलुआ हते, कैन लगे, “राजा के लाने सुन्‍दर और जवान कुवारियां ढूंढ़ी जाबें।

³ और राजा अपने राज के सब प्रान्‍तन में मान्‍सन हों ई लाने काम पै लगाए कि बे सब सुन्‍दर जवान कुवारियों हों शूशन गढ़ के रनवास में इकट्ठो करें और बईयरों के मुखिया हेगे हों जो राजा कौ खोजा हतो सौंप दें; और सुद्ध करबे जोग बस्‍तन उन्‍हों दई जाबें।

⁴ तब उनमें सें जौन राजा हों अच्‍छी लगै, बा रानी वशती की जांगा पटरानी बनाई जाए।” जा बात राजा हों अच्‍छी लगी और ऊने एैसई करो।

⁵ शूशन गढ़ में मोर्दकै नाओं एक यहूदी रैत हतो, जौन कीश नाओं के एक बिन्‍यामीनी कौ परपोता, शिमी कौ पोता, और याईर कौ मोंड़ा हतो।

⁶ कीश उन बन्‍धुअों के संगै यरूशलेम सें बन्‍धुआई में गओ हतो, जीहों बेबीलोन कौ राजा नबूकदनेस्‍सर, यहूदा के राजा यकोन्‍याह के संगै बन्‍धुआ करके ले गओ हतो।

⁷ मोर्दकै हदस्‍सा नाओं की अपनी चचेरी बहन हों, जो एस्‍तेर सोई कहात हती, पालो-पोसो हतो; कायसे ऊके मताई-बाप कोऊ नें हते, और बा मोंड़ी सुन्‍दर और रूपबती हती, और जब ऊके मताई-बाप मर गए, तब मोर्दकै ने ऊहों अपनी बिटिया करके पालो हतो।

⁸ जब राजा कौ हुकम और नैम सुनाए गए, और बिलात जवान मोंड़ियां, शूशन गढ़ में हेगे के अधकार में इकट्ठी करीं गईं, तब एस्‍तेर सोई राजभवन में बईयरन के रखनवारे हेगे के अधकार में सौंपी गई।

⁹ बा कुंआरी मोंड़ी ऊकी नजर में अच्‍छी लगी; और बो ऊसें खुस भओ, तब ऊनें बिना अबेर करें ऊहों राजभवन में सें सुद्ध करबे की बस्‍तन, और ऊको भोजन, और ऊके लाने चुनी भईं सात सहेलियां सोई दईं, और ऊहों और ऊकी सहेलियन हों रनवास में सबसे अच्‍छी रैबे की जागां दई।

¹⁰ एस्‍तर ने अपनी जात नईं बताई हती, नें अपनौ कुल, कायसे मोर्दकै ने ऊहों आदेस दओ हतो कि कछु नें बतईयो।

¹¹ मोर्दकै रोजीना रनवास के आंगन के सामूं टहलत हतो जीसें जान सकै की एस्‍तेर कैसी आय और ऊके संगै का हुईयै।

¹² जब एक एक कन्‍या की पारी आई, कि राजा क्षयर्ष के लिगां जाबें - और जौ ऊ बेरा भओ जब ऊके संगै बईयरों के लाने ठैराए भए नियम के अनसार बारह मईना लौ ब्‍यवहार करो गओ हतो; मतलब उनके सुद्ध करबे के दिना ई तरहां सें पूरे हो गए, कि छै मईना लौ गोंद कौ तेल लगाव जात हतो, और छै मईना लौ खुसबूदार सामान, और बईयरन के सुद्ध करबे कौ दूसरो सामान लगाओ जात हतो -

¹³ ई तरहां से बा कन्‍या जब राजा के लिगां जात हती, तब जो कछु बा चाहत कि रनवास से राजभवन में ले जाए, बो ऊहों दओ जात हतो।

¹⁴ संजा हों तौ बा जात हती और भुंसारे हों लौटकें रनवास के दूसरे घर में जाकें रखेलियन के रखनवारे, राजा के खोजे शाशगज के अधिकार में हो जात हती, और राजा के लिगां फिन नें जात हती। जदि राजा ऊसें खुस हो जात हतो, तब बा नाओं लेकें बुलाई जात हती।

¹⁵ जब मोर्दकै के कक्‍का अबीहैल की बिटिया एस्‍तेर, जीहों मोर्दकै ने बिटिया मानकें पालो हतो, ऊकी पारी आई कि राजा के लिगां जाए, तब जो कछु कुंवारियों के मुखिया राजा के खोजे हेगे ने ऊके लाने ठैराओ हतो, ऊसें अधक ऊने और कछु नईं मांगो। जितनन ने एस्‍तेर हों हेरो, बे सब ऊसें खुस भए।

¹⁶ ऐसे एस्‍तेर हों राजभवन में राजा क्षयर्ष के लिगां ऊके राज के सातवें साल के तेबेत नाओं दसबें मईना में पोंचाओ गओ।

¹⁷ राजा ने एस्‍तेर हों और सब कुवारियों सें जादां प्‍यार करो, और दूसरी सब कुंवारियों सें अधक ऊके अपनेपन और किरपा दृष्‍टि ओई पै भई, ई कारन ऊने ऊकी मूंड़ पै राजमुकुट रखो और ऊहों वशती की जागां पै पटरानी बनाओ।

¹⁸ तब राजा ने अपने सब हाकमन और कर्मचारियन हों एक बड़ो भोज दओ, और उए एस्‍तेर कौ भोज कओ; और प्रान्‍तन में छुट्टी दिलाई, और अपनी उदारता के हिसाब सें इनाम सोई बांटे।

मोर्दकै द्वारा राजा के प्रानन की रक्षा

¹⁹ जब कुंवारियां दूसरी बेर इकट्ठी करी गईं, तब मोर्दकै राजभवन के फाटक में बैठो हतो।

²⁰ एस्‍तेर ने अपनी जात और कुल कौ पता नईं दओ हतो, कायसे मोर्दकै ने ऊहों ऐसो आदेस दओ हतो कि कछु नें बताए; एस्‍तेर मोर्दकै की बात एैसी मानत हती जैसे कि ऊके इतै अपने पालन पोसन की बेरा मानत हती।

²¹ उनईं दिनन में जब मोर्दकै राजभवन के फाटक में बैठो करत हतो, तब राजा के खोजे जौन ऊके रक्छक सोई हते, उन में सें बिकतान और तेरेस नाओं दो जनों नें राजा क्षयर्ष सें रूठकें ऊपै हाथ चलाबे की जुगत करी।

²² जा बात मोर्दकै हों पता चली, और ऊने एस्‍तेर रानी हों जा बात बताई, और एस्‍तेर ने मोर्दकै कौ नाओं लैकें राजा होंं चितौनी दई।

²³ तब जांच पड़ताल होबे पै जा बात सच कड़ी और बे दोनों हों पेड़ पै लटका दओ गओ, और ईकौ बिवरण राजा के सामूं इतिहास की पोथी में लिख दओ गओ।