- इफिसियों 3 - Bundeli Holy Bible

¹ ऐईसे में पौलुस जौन तुम अन्य जातियन के काजें मसीह यीशु को दास आंव।

² और तुम ने परमेसुर की दया कैसे मिलै ईकी बात सुनी होबै, जौन तुमाए काजें मोहां मिलो आय।

³ जौ भेद मोहां जोत से मिलो, जैसो मैं पेंला थोड़े में लिख चुको आंव।

⁴ जीहां बांच के तुम हां पता चल जै है, कि मैं मसीह को ऊ भेद किते लौ समझत आंव।

⁵ जौन पेंला मान्सन हां ऐसो नईं बताओ गओ हतो, जैसो आत्मा से अब उनके पवित्तर प्रेरितन और अगमवकतन हां मिलो आय।

⁶ कि मसीह यीशु में बचन सुनके अन्यजाति लोग सोई मिलबेवारे हक्क में सोंजिया हुईयें, और एकई देह और प्रतिज्ञा के संग्गी हुईयें।

⁷ और मैं, परमेसुर की दया से मिले दान के, और उनकी जान के बल से मोहां मिलो, और उन बचनन को सुनाबेवारो बनो।

⁸ मो पै जौन सबरे परित्तर लोगन में सबसे लौरो आंव, जा दया भई, कि मैं अन्यजातियन हां मसीह में मिलबेवारे महा धन के बचन सुनाओं।

⁹ और सबरन पै जा बात उजागर करों, कि ऊ भेद कैसो आय, जौन सबके रचबेवारे परमेसुर ने पेंला से लुका के धरो हतो।

¹⁰ कि अब मण्डली से परमेसुर के बिलात ज्ञान उन मुखियन और हाकमन पै जौन सरग में आय खोले।

¹¹ ऊ पुरानी मन्सा से जौन उन ने हमाए पिरभू यीशु मसीह में करी हती।

¹² जी में हमें उन पै बिसवास धरके बड़ी हिम्मत और आस से उन लौ आबे को अधकार आय।

¹³ ईसें मैं बिन्तवारी करत आंव कि जौन परेसानी मोहां तुमाए काजें हो रई आय, उनसे तुम हिम्मत न हारौ, कायसे उनसे तुमाओ भलो हुईये।

¹⁴ एईसे उन पिता के सामूं घूंटे टेकत आंव।

¹⁵ जिनसे सरग और धरती पै, एक एक वंस को नाओं धरो जात आय।

¹⁶ कि बे अपने जस से जो दान दैबे, कि तुम उनके आत्मा से अपने भीतरवारे मनुष्यत्व में बल पाकें मजबूत होत जाओ।

¹⁷ और बिसवास करे से मसीह तुमाए हिये में रैबे, कि तुम प्रेम में जड़ पकड़ के और नीं डाल के।

¹⁸ सबरे पवित्तर लोगन के संग्गै अच्छी समझ को ज्ञान पाओ।

¹⁹ और मसीह के ऊ प्रेम हां जान सकौ, जौन ज्ञान से बायरे आय, कि तुम परमेसुर की सबरी बातन में पक्के हो जाओ।

²⁰ अब जौन ऐसो बली आय, कि हमाई बिनती और मांगे से अधिक देत आय, ऊ बल से जौन हमाए भीतर काज करत आय।

²¹ मण्डली में, और मसीह यीशु में, उनको मान पीढी से पीढी लौ हमेसा होबै। आमीन।