- कुलुस्सियों 4 - Bundeli Holy Bible

¹ ऐ मालिको, अपने चाकरन पै बेजा न करो, ध्यान धरो कि सरग में तुमाओ मालिक रैत आय।

² बिन्तवारी करत रओ, और उनको धन्न मानो।

³ और हमाए काजें सोई बिन्तवारी करो, कि परमेसुर हमाए लाने बचन सुनाबे हां ऐसो द्वार खोल देबे, कि हम पिरभू यीशु मसीह की कथा सुनात रएं, जीके काजें मैं जेहल में आंव।

⁴ मोरी इच्छा आय कि मैं पिरभू की कथा सुनाओं, उन हां उजागर करों।

⁵ जौन मौका अपन हां मिलो आय, उनके लाने जिन ने बचन नईं सुनो आय, उन हां सोच समझ के बताबें।

⁶ तुमाई बोली और बतकाओ साजो होओ चईये, कि तुम हां मान्स हां समझात बने।

⁷ मोरो भईया और पिरभू को सेवक, तुखिकुस जौन मोरे संग्गै सेवा करत आय, तुम हां सबरो हाल चाल बता दै है।

⁸ ऊहां मैंने ई लाने पठैओ आय, कि हमाओ सबरो हाल तुम हां पता चलै और तुमाए हिये हां सान्ति मिले।

⁹ और तुखिकुस के संग्गै उनेसिमुस हां सोई पठैओ आय, जौन तुम में से निकलो भओ, भलो और प्यारो भईया आय, जे दोई जनें इते को सबरो हाल चाल तुम हां बता दै हैं।

¹⁰ अरिस्तर्खुस जौन मोरे संग्गै जेहल में आय, और मरकुस जौन बरनबास को भईया लगत आय (जीके लाने मैंने कई हती कि जब बो तुम लौ आबै, तो उनकी अच्छी खुसामद करियो)।

¹¹ और यीशु जो यूस्तुस कहात आय, तुम हां नमस्कार कैत आंय। और इस्राएली लोगन में से जेई जनें मोरे संग्गै सेवा करत रय आंय, और इन से मोहां खीब अच्छो लगो आय।

¹² इपफ्रास जौन तुम में से आय, और पिरभू यीशु मसीह को सेवक आय, तुम हां नमस्कार कैत आय और तुमाए काजें बिन्तवारी में लगो रैत आय, कि तुम पक्के होकें ई सीख पै चलत रओ।

¹³ मैं ई बात को गवाह होकें, जो तुमाए और लौदीकिया और हियरापुलिस वारन के लाने बड़ी मैनत करत आय।

¹⁴ प्यारे बैद्य लूका और देमास को नमस्कार पौंचे।

¹⁵ लौदीकिया वारन हां और नुमफास के घर में जुड़ के आराधना करबेवारन हां नमस्कार कईयो।

¹⁶ और जब जा चिठिया तुमाए इते वारन हां पढ़ के सुनाई जाबै, तो ऐसो करियो कि लौदीकिया के भईयन में सोई पढ़ी जाबै।

¹⁷ और अर्खिप्पुस से कईयो कि जौन काज में तें लगो आय, बो पिरभू को आय ऊहां बड़ी सोच समझ से करियो।

¹⁸ मैं पौलुस ने अपने हाथन से नमस्कार लिखो आय। मोहां जौन हथकड़ी डली आंय बे कायसे डलीं जौ ध्यान धरियो; परमेसुर की दया तुम पै बनी रैबे। आमीन।