- कुलुस्सियों 2 - Bundeli Holy Bible

¹ मैं चाहत आंव कि तुम और लौदीकिया में रैबेवारे सबरे मान्स जानें, जीने मोरो मों लौ नईं तको कि मैं उन के काजें कैसी मैनत करत आंव।

² कि उन के हिये में सान्ति होबे और बे सबरे प्रेम से जुड़े रैबें, बे सबरे जनें बहुतई आसीस पाहें, जौ जानके कि यीशु मसीह जिन में होकें परमेसुर परगट भए उन हां जान लेबें।

³ कायसे उन में ज्ञान और समझ बहुत भरो आय।

⁴ मैं जे बातें तुम हां ईसे कैत आंव, कि कोई मान्स तुम हां भटका न देबे।

⁵ मैं तुमसे अबै बिलात दूर आंव, पै आत्मा में होकें बिलकुल ऐंगर आंव, और मोहां खुसी आय कि तुम हां जैसो रओ चईये वैसई आओ, और तुमाओ बिसवास यीशु मसीह पै खीब जमो आय।

⁶ सो जैसो तुम ने यीशु मसीह हां अपनो पिरभू मानो आय, ऊंसई पिरभू में चलो।

⁷ और उन में तुमाई जड़ मजबूत होबे और तुम आगे बढत चलो; और जैसो तुम ने सीखो और समझो आय वैसई बिसवास में पक्के होत जाओ, और मन से पिरभू को धन्न मानो।

⁸ चौकन्ने रओ कि कोई तुम हां बेकार बतकाओ में न फंसा लेबे, जौन मान्स की बातें आंय बे सब संसार कौ छल आय, परन्त जे बातें पिरभू की नईंयां।

⁹ कायसे पिरभू यीशु मसीह में परमेसुर स्वयं बसे आंय।

¹⁰ और तुम उनईं में बढ़ रए आव, कायसे तुम उनईं के आओ जौन सबरे ज्ञान और अधकार से बढ़के ऊंचे आंय।

¹¹ पिरभू ने ऊंसई तुमाई बुरई अभलाखा निकाल दई, जैसे खतना होबे पै सरीर को भाग कट के न्यारो हो जात आय।

¹² और जब तुम ने बपतिस्मा लओ तो ऊंसई पिरभू यीशु मसीह के संग्गै मानो गाड़े गए, और परमेसुर के बल पे बिसवास करे से, जिन ने उन हां मरे भयन में से जिलाओ, ऊंसई जी गए।

¹³ उन ने तुम हां जौन अपने पापन में मरे जैसे हते, और परमेसुर की सन्तान न हते परन्त परमेसुर ने यीशु मसीह के संग्गै जिला दओ, और तुमाए सबरे पापन की क्षिमा कर दई।

¹⁴ और परमेसुर ने हम हां मूसा के नैम न मानबे को जौन दंड लगाओ हतो, बो सोई मिटा के ऊहां क्रूस पै खिलियन से जड़ दओ।

¹⁵ क्रूस में पिरभू यीशु मसीह ने सब अधकार के जोर हां हरा दओ, और सबरे संसार ने देखो कि जे सब बंध गए, और क्रूस पै उनकी जीत को जसन भओ।

¹⁶ सो अब कोई तुम हां नईं कैबे कि का खाओ और का पीओ, और न कोऊ नये चांद और दूसरे त्यौहार हां कै है कबै मानो।

¹⁷ कायसे जा तीज त्यौहार आबेवारी बातन की छाया आंय, परन्त पिरभू यीशु मसीह सांचे आंय।

¹⁸ उन से धोका न खाईयो जौन ऐसे दिखात आंय कि बड़े कोंरे मन के आंय, जौन सरगदूतन की पूजा करत आंय परन्त तुम हां ऊ इनाम से जौन तुम हां मिलो चईये ऊ में बिलोरा डालत आंय। ऐसो मान्स बेसमझी की बातें करत आय और स्वारथी आय।

¹⁹ बे पिरभू यीशु मसीह के संग्गै नईं जुड़े आंय, जौन सबरी देह के मूड़ आंय, पिरभू सरीर हां सकती देत आय, परमेसुर के जोर से जोड़त और मांस हां संग्गै बांधे रैबे।

²⁰ तुम यीशु मसीह के संग्गै मर गए, अब संसार को जोर तुम पे नईं चलत, अब तुम ऐसी बात हां काय मानत आव।

²¹ कि जौ न छियो, और जौ न खाओ, और ऊहां हाथ न लगाईयो।

²² (कायसे जे सबरी बस्तें काम में लात लात खतम हो जै हैं)।

²³ जब लौ जे बस्तें काम में आत आंय, तब लौ ठीक आय परन्त फिन बे काम की नईं रैत, सो अपन काय हां उन बातन हां मानें, जौन मांस ने बनाई आंय इन नेम हां मानबो अपन हां अच्छो लगे, इनसे ऐसो लगे कि तुम परमेसुर से बहुतई प्रेम करत भय नरम पड़े आव, और अपनी देह हां बस में राखें आव परन्त इन से तुमाई इच्छा हां रोकबे में कछु नहीं होत।