- प्रेरितन के काम 8 - Bundeli Holy Bible

¹ ओई दिना यरूशलेम की मण्डली पे बड़ो उपद्रव शुरू हो गओ और प्रेरितन हां छोड़ सब के सब यहूदिया और सामरिया देशों में फैल गए।

² कछु भगतन ने स्तिफनुस हां कबर में दफनाओ; और ऊके लाने बिलात दुख मनाओ।

³ शाऊ ल मण्डली हां उजाड़ रओ हतो; और घर घर में घुस के बईयरन और मान्सन हां घर में से कड़ोर कड़ोर के जेहलखाने में डालत हतो।

⁴ जौन तितर बितर भए हते, बे भलो सन्देसो सुनात फिरे।

⁵ और फिलिप्पुस सामरिया नगर में जाके मान्सन के मजारें मसीह कौ परचार करन लगो।

⁶ जौन बातें फिलिप्पुस ने कईं, उन हां मान्सन ने सुन के और जौन चिन्ह बो दिखात हतो उन हां तक के, एक चित होकें मन लगाओ।

⁷ कायसे कुल्ल जनन में से अशुद्ध आत्माएं जोर से चिल्याऊ त भईं कड़ गईं, और बिलात लकवा के रोगी और लंगड़े सोई साजे करे गए।

⁸ और ऊ नगर में बड़ी खुसी छा गई।

⁹ ई से पेंला ऊ नगर में शमौन नाओं को एक मान्स हतो, जौन जादू टोना कर के सामरिया के मान्सन हां चकित करत हतो और अपने आप हां बड़ो जनो बनात हतो।

¹⁰ छोटे से बड़े तक सबरे ऊहां मान देत हते, जौ मान्स परमेसुर की बा बड़ी तागद आय, जौन महान कहात आय।

¹¹ ऊ ने बिलात दिना से अपने जादू के कामन से उन हां चकित कर धरो हतो, ई लाने बे ऊ ए बिलात मानत हते।

¹² पर उन ने जब फिलिप्पुस कौ बिसवास करो जौन परमेसुर के राज और यीशु के नाओं कौ भलो सन्देसो सुनात हतो, तो मान्स का, बईयरें का, बपतिस्मा लेन लगे।

¹³ तब शमौन ने खुद बिसवास करो और फिलिप्पुस के संग्गै रैन लगो, बो चिन्ह और बे बड़े आश्चर्य कर्म तक के चकित होत हतो।

¹⁴ जब प्रेरितन ने जौन यरूशलेम में हते सुनो कि सामरियन ने परमेसुर कौ बचन मान लओ आय, तो पतरस और यूहन्ना हां उन लौ पठैओ।

¹⁵ उन ने जाके उन के लाने बिन्तवाई करी कि पवित्तर आत्मा पाबें।

¹⁶ कायसे बो अब लौ उन में से कोऊ पै न उतरो हतो, उन ने तो बस यीशु के नाओं में बपतिस्मा लओ हतो।

¹⁷ तब उन ने उन पे हाथ धरे और उन ने पवित्तर आत्मा पाओ।

¹⁸ जब शमौन ने तको कि प्रेरितन के हाथ धरबे से पवित्तर आत्मा दओ जात आय, तो ऊ उन के ऐंगर रुपईया लाओ और उन से कओ।

¹⁹ जौ अधकार मोहां सोई दो, कि जौन कोऊ पै मैं हाथ धरों, बो पवित्तर आत्मा पाबै।

²⁰ पतरस ने शमौन से कओ; तोरे रुपईया तोरे संग्गै नास होबें, कायसे तेंने परमेसुर कौ दान रुपईयों से मोल लेबे कौ विचार करो आय।

²¹ ई बात में न तोरो हींसा आय, न बांटा; कायसे तोरो हिया परमेसुर के आंगू सीधो नईंयां।

²² ई लाने अपनी ई बुराई से हिया फिरा के पिरभु से बिन्तवाई कर, हो सकत आय तोरे हिये कौ विचार छिमा हो जाबै।

²³ मैं तक रओ आंव, कि तें पित्त की सी कड़वाहट और पापन के एन बन्धन में पड़ो आय।

²⁴ शमौन ने उत्तर दओ, कि तें मोरे लाने पिरभु से बिन्तवाई कर, कि जौन बातें तेंने क ईं आंय, उन में से कोऊ मो पे न आ पड़े।

²⁵ पतरस और यूहन्ना गवाई देके और पिरभु कौ बचन सुना के यरूशलेम हां वापस लौट गए, बे औरें लौटती बेरा, सामरियन के केऊ गांवन में भलो सन्देसो सुनात गए।

²⁶ पिरभु के एक सरगदूत ने फिलिप्पुस से कओ; उठ और दक्खिन कोद ऊ गैल पे जा, जौन यरूशलेम से अज्जाह हां जात आय, और जौन जंगल में आय।

²⁷ ऊ उठ के चल दओ, ऊने तको, कूश देश कौ एक मान्स आ रओ आय ऊ खोजा हतो और कूशियों की रानी कन्दाके कौ मन्त्री और खजांची हतो, बो अराधना करबे के लाने यरूशलेम आओ हतो।

²⁸ बो अपने रथ पे बिराजो भओ, अगमवकता यशायाह की पोथी बांचत भओ अपने देश कुदाऊं लौट रओ हतो।

²⁹ तब आत्मा ने फिलिप्पुस से कओ, ऐंगर जाके रथ के संग्गै हो ले।

³⁰ फिलिप्पुस ने रथ कुदाऊं गदबद लगाई ऊ ने ऊहां यशायाह अगमवकता की पोथी बांचत भए सुनो, ऊ ने पूछो तें जौन बांच रओ आय, का ऊहां समजत सोई आय?

³¹ ऊ ने कओ, जब लग कोऊ मोय न समजाए मैं कौन भांत समझ सकत आंव? ऊ ने फिलिप्पुस से कओ, रथ में चढ़ के मोरे ऐंगर बैठ।

³² पवित्तर धर्म पोथी से जौन अध्याय बो बांच रओ हतो, बो जौ हतो; बो गाड़र की घांई वध होबे हां पोंचाओ गओ, जैसे मेमना अपने ऊ न कतरबेवारन के आंगू चुप चाप रैत आय, ऊं सई ऊ ने सोई अपनो मों न खोलो।

³³ ऊ की दीनता के काजें ऊकौ न्याय नईं होने पाओ, ऊ टैम के मान्सन के बारे में को लेख को कर है, कायसे धरती से ऊकौ प्राण उठाओ जात आय।

³⁴ खोजे ने फिलिप्पुस से पूछो; मैं तोय से बिन्तवाई करत आंव, अगमवकता जौ की के बारे में कैत आय, अपने बारे में या कौनऊ और के बारे में।

³⁵ तब फिलिप्पुस ने बोल समजाबो शुरू करो, और पवित्तर पोथी के इनई बातन से शुरू कर के ऊहां यीशु कौ भलो सन्देसो सुनाओ।

³⁶ गैल पे चलत चलत बे कौनऊ सूनसान जांगा पोंचे, तब खोजे ने कओ, तको इते पानी आय, अब मोहां बपतिस्मा लेबे हां का रोक आय।

³⁷ फिलिप्पुस ने कओ, जदि तें पूरे मन से बिसवास करत आय तो जौ हो सकत आय: ऊ ने उत्तर दओ मैं बिसवास करत आंव कि यीशु मसीह परमेसुर को पूत आय।

³⁸ तब ऊ ने रथ ठांड़ो करबे कौ हुकम करो, फिलिप्पुस और खोजा दोई जने पानू में उतर पड़े, और फिलिप्पुस ने ऊहां बपतिस्मा दओ।

³⁹ जब बे पानू में से कड़ के ऊपर आए, तो पिरभु कौ आत्मा फिलिप्पुस हां उठा ले गओ, और खोजे ने ऊहां फिन न तको, और खोजा अपनी गैल पे खुसी खुसी चलो गओ।

⁴⁰ फिलिप्पुस अशदोद नगर में आ कड़ो, जब लौ बो कैसरिया नगर में न पोंचो, तब लौ नगर नगर सन्देसो सुनात रओ।