- प्रेरितन के काम 27 - Bundeli Holy Bible

¹ जब जौ ठहराओ गओ, की हम जहाज से इतालिया जाबें, तो उन ने पौलुस और दूसरे कैदियन हां राजसी सैनिक दल के संग्गै यूलियुस नाओं के एक सूबेदार हां सौंप दओ।

² और अद्रमुत्तियुम कौ एक जहाज आसिया के तीरे के परगना में जाबे हां हतो, हम ऊ पे चढ़के समुन्दरी दौरा के लाने कड़ पड़े, अरिस्तर्खुस नाओं के थिस्सलुनीके कौ एक मकिदूनी भी हमाए संग्गै हतो।

³ दूसरे दिना हम सैदा में उतर गए, और यूलियुस ने दया करके पौलुस हां ऊके संगियन के इते जान दओ की सत्कार पाए।

⁴ उते से हम जहाज से कुप्रुस की आड़ में होकें चले, कायसे बैहर आंगू की हती।

⁵ और जब हम किलिकिया और पंफूलिया के समुन्दर तीरे से होकें कड़े, तो लूसिया के मूरा में उतर गए।

⁶ उते सूबेदार हां इतालिया जाबे वालो सिकन्दरिया कौ जहाज मिलो, और ऊ ने हम हां ऊ पे चढ़ा दओ।

⁷ जब हम कछु दिना लौ हरां हरां परेसानी से कनिदुस के आंगू पोंचे, तो ई लाने की बैहर हम हां आंगू नईं बढ़न दे रई हती, हम सलमोने के आंगू से होकें क्रेते की आड़ में चले।

⁸ और ऊके तीरे तीरे परेसानी से खेते भए हम एक जांगा पे पोंचे, जौन शुभलंगरबारी कहात हतो, जिते से लसया नगर ऐंगर हतो।

⁹ बिलात बेरा बीत गई हती, और पानू की यात्रा भी जोखिम भरी हो गई हती, इते लौ की उपवास के दिना भी बीत चुके हते, ई लाने पौलुस उनहां जौ कहके चिताउन लगो।

¹⁰ हे भईया हरौ, मोय ऐसो लगन लगो आय, ई समुन्दरी यात्रा में माल और जहाज की नईं, बल्कि हम हां अपने प्राणन की भी हानि उठानी पड़ है।

¹¹ पर सूबेदार ने पौलुस के कहबे की जांगा जहाज के चलाबेवाले और मुखिया की बातन की कोद ज्यादा ध्यान दओ।

¹² ई लाने की बो बन्दरगाह जड़कारो बिताबे के लाने सही नईं हतो; ज्यादातर लोगन की जा सलाह भई, की उते से आंगू बढ़ें, की कोऊ तरहां फीनिक्स पोंच के जड़कारो बिताएं, जौ क्रेते कौ एक बन्दरगाह आय, जीको मों दक्खन-पश्चिम और उत्तर-पश्चिम कोद आय।

¹³ जब दक्खिनी बैहर हरां हरां बहन लगी, तो जौ सोच के की हमाओ विचार पूरो हो गओ, उन ने लंगर उठाओ और तीरे तीरे क्रेते के ऐंगर होकें जान लगे।

¹⁴ पर तनकई देर में एक बड़ी आंधी उठी, जौन उत्तरी पूर्वी कहात आय।

¹⁵ जब जहाज ऊ में फंस गओ और आंधी कौ सामना नईं कर सको, तो हम ने ऊहां बैहर के रुख में बहन दओ, और हम भी ओई के संग्गै बहत भए चले गए।

¹⁶ तब कौदा नाओं के टापू की आड़ में बहत बहत हम परेसानी से जहाज की डोंगी हां वस में कर पाए।

¹⁷ फिर ढीमरन ने डोंगी हां उठाओ, और जहाज हां खालें से ऊ परै लौ गिरमा से बांधो, और सुरतिस टापू के उथली जांगा में फंस जाबे के डर से पाल उतार के बहत चले गए।

¹⁸ दूसरे दिना जब हम आंधी से बिलात हिचकोले खा रए हते, तो बे जहाज कौ माल फेंकन लगे।

¹⁹ तीसरे दिना उन ने अपने हाथन से जहाज के समान हां सोई फेंक दओ।

²⁰ जब बिलात दिना लौ न सूरज दिखा पड़ो, न तारे और बिलात आंधी चलत हती, तो हरां हरां हमाए बचबे की आसा भी जात रई।

²¹ जब बे बिना खाए पिए बिलात दिना बिता चुके, तब पौलुस ने उन के बीच ठांड़े होकें कई; हे भईया हरौ, सही होतो, की तुम मोरो कहबो मानते, और क्रेते से नईं चलते, तब न तो जा विपदा आती और न जा हानि उठानी पड़ती।

²² अबै भी मैं तुम से जा बिनती करत आंव, की हिम्मत धरौ; कायसे तुम में से कोऊ के प्राणन की हानि न हुईये, पर केवल जहाज की।

²³ कायसे परमेसुर जीको मैं आंव, और जीको काज करत आंव, ऊ को एक सरगदूत आज रात मोरे ऐंगर आके ठांड़ो भओ।

²⁴ और ऊ ने कई, पौलुस न डरा; तोय कैसर के आंगू ठांड़ो होबो जरूरी आय, हेर, परमेसुर ने इन सब हां जौन तोरे संग्गै यात्रा कर रए आंय, तोय दओ आय।

²⁵ ई लाने हे भईया हरौ, हिम्मत धरो; कायसे मैं परमेसुर पे भरोसा करत हौ, की जैसो मोसे कहो गओ आय, वैसई हुईये।

²⁶ पर कोऊ टापू पे हमाओ जहाज जरूर जा टिक है।

²⁷ पर जब चौदहवीं रात आई, और हम अद्रिया सागर में भटकत फिर रए हते, तो आधी रात के करीब, ढीमरन ने ऐरो लओ, की हम कोऊ तीरे के ऐंगर पोंच रए आंय।

²⁸ थाह लेबे पे उन ने सेंतीस मीटर गहरो पाओ और तनक आंगू बढ़के उन ने फिर थांह लई, तो छब्बीस मीटर गहरो पाओ।

²⁹ तब ई डर से की कहूं चट्टान से न जा टकराएं, जहाज के पिछले हिस्सा से चार लंगर डाले, औरभुनसारे होबे की बाट जोहन लगे।

³⁰ जब ढीमर जहाज से भगबे की कोसिस कर रए हते, और अगले हिस्सा से लंगर डालबे के बहाने से डोंगी हां समुन्दर में उतार चुके हते।

³¹ तो पौलुस ने सूबेदार और सिपाहियन से कई; अगर बे लोग जहाज पे नईं रएं, तो तुम नईं बच सकत।

³² तब सिपाहियन ने गिरमा हां काट के डोंगी गिरा दई।

³³ जब भुनसारो होबे वालो हतो, तो पौलुस ने जौ कै कें, सब हां खाबे के लाने समझाओ, आज चौदह दिना हो गए आंय, जब से तुम आस तकत तकत भूखे रए, और तुम ने कछु नईं खाओ।

³⁴ ई लाने मैं तुम हां समझात आंव, की अपने प्राण बचाबे के लाने कछु खा लेओ, कायसे तुम में से कोऊ कौ बाल बांका न इुईये।

³⁵ जा कह के ऊ ने रोटी लई और सब के आंगू ऊके लाने परमेसुर हां धन्नवाद करो; और तोड़ के खाबे लग गओ।

³⁶ ईसे उन सब हां हिम्मत मिली और उन ने भी रोटी खाई।

³⁷ जहाज पे हम सब मिला के दो सौ छिहत्तर जनें हते।

³⁸ जब बे खाके अफर गए, तो गेंहूं हां समुन्दर में फेंक के जहाज हां हल्को करन लगे।

³⁹ जब दिन कड़ो, तो बे ऊ जांगा हां नईं चीन पाए, पर उनहां एक खाड़ी दिखाई पड़ी, जीको तीरो चौरस हतो, और उन ने सोचो, अगर हो सके तो जहाज हां ओई तीरे पे लगा दओ जाबै।

⁴⁰ उन ने लंगर काट के समुन्दर में छोड़ दओ, और ओई बेरा पतवारन की गांठें ढीली कर दईं, और बैहर के रुख में, हल्के पालन हां खोल के किनारे हां चल पड़े।

⁴¹ पर दोई पानू की धारन के बीच पड़के जहाज बालू में फंस गओ, और ऊ को अगलो हिस्सा ऐसो धर गओ, की हिल नईं सको; और पाछें को हिस्सा लहरन के थपेड़न से टूटन लगो।

⁴² सिपाहियन की सोच हती की कैदियन हां मार डालें; जीसे उन में से कोऊ भी तैर के नईं कड़ पाबै।

⁴³ पर सूबेदार ने पौलुस हां बचाबे की मनसा से उन हां ऐसो करबे से रोको, और हुकम दओ, की जौन तैर सकत आंय, बे पेंला कूद के धरती पे कड़ जाबें।

⁴⁴ और बाकी लोग पटरों और जहाज के दूसरे टुकड़न के सहारे कड़ जाबें, ई तरहां से सब लोग धरती पे साजे पोंच गए।