- प्रेरितन के काम 26 - Bundeli Holy Bible

¹ तब अग्रिप्पा ने पौलुस से कई; तोय अपने बचाव में बोलबे की मंजूरी आय, ईपे पौलुस हाथन हां बढ़ाके अपने बचाव में बोलन लगो।

² हे राजा अग्रिप्पा, यहूदियन ने मोपे कई एक दोस लगाए आंय, मैं अपने हां धन्य मानत आंव, की आज तोरे आंगू अपने बचाव में उन सब कौ बखान करबे जा रओ आंव।

³ खासकर ई लाने की तें यहूदियन के सब रीत रिवाज और बतकाव हां जानत आय, ई लाने मैं बिनती करत आंव, की गम खाके मोरी सुन ले।

⁴ मोरो चाल चलन जवानी से लैके अबै लौ जैसो रहो यानि मैंने ईहां शुरू से अपनी जात के बीच, और यरूशलेम में कैसे गुजारो, ईहां सब यहूदी जानत आंय।

⁵ कायसे बे मोरे बारे में बिलात पेंला से जानत आंय, की मैंने अपने धरम के सब से कट्टर सोच के अनसार फरीसी होकें जीयत रओ, अगर बे चाहें तो ई बात की गवाह भी दे सकत आंय।

⁶ पर अब ऊ आस के काजें, जो प्रतिज्ञा परमेसुर ने हमाए पुरखन से करी हती, मोरो न्याव करो जा रओ आय।

⁷ हमाए बारह गोत्र ई प्रतिज्ञा कौ फल पाबे की आस लगाए भए, जोस के संग रात दिना परमेसुर कौ काज करत आंय, और हे राजन, ऐई आस के बारे में यहूदी मोय पे दोस लगात आंय।

⁸ जा बात तुम लोगन हां भरोसेमन्द काय नईं लगात आय, की परमेसुर मरे भयन हां जिलात आय?

⁹ मैंने भी जौई सोचो हतो, की नासरत के यीशु के नाओं के बिरुद्ध मोय बिलात कछु करने आय।

¹⁰ और मैंने यरूशलेम में जौई करो; मुखिया महापुरोहितन से हुकम पाके मैंने बिलात पवित्र लोगन हां जेलखाने में डालो, पर जब बे मौत के घाट उतारे जा रए हते, तो मैंने उन के बिरुद्ध में अपनी हामी भी दई।

¹¹ मैं आमतौर पे सब प्रार्थनाघर में जाके उनहां सताव करत हतो, और यीशु कौ ठट्ठा करबे हां उनहां दबाव डालबे की कोसिस करत हतो, और उन के बिरुद्ध बड़े गुस्‍सा से भर के बाहर के नगरन में भी उन कौ पीछा करत हतो।

¹² जब मैं मुखिया महापुरोहितन की मंजूरी और हुकम पाके ऐई धुन में दमिश्क हां जा रओ हतो।

¹³ तो हे राजा, मैंने दुहपरिया की बेरा गैल में सूरज से भी तेज ज्योत आकास से आत हेरी, जौन मोरे और मोरे संग्गै चलबे वालन के चारऊं कोद चमक रई हती।

¹⁴ जब हम सब धरती पे गिर पड़े, तो मोय इब्रानी बोली में जौ सुनाई पड़ो, हे शाऊ ल, हे शाऊ ल, तें मोय काय सतात आय? पैने पे लात मारबो तोरे लाने कठनआय।

¹⁵ मैंने कई, प्रभु तें को आय? प्रभु ने कई, मैं यीशु आंव, जीहां तें सता रओ आय।

¹⁶ पर उठ, और अपने गोड़न पे ठांड़ो हो जा; मैंने ई लाने से तोय दरसन दओ आय, की तोय भक्त ठहराओं और न केवल इन बातन कौ, जौन तेंने हेरी आंय गवाह ठहराओं, पर उन बातन कौ भी जौन के लाने मैं तोय दरसन दें हों।

¹⁷ मैं तोय तोरे लोगन से और गैर यहूदियन में से भी जिन के ऐंगर तोय पठैय रओ आंव, छुड़ात रै हों।

¹⁸ कि तें उन की आंखन हां खोले, जीसे की बे अंधयारे से उजयारे की कोद, और शैतान के राज्य से परमेसुर की कोद फिरें; जीसे की बे पापन की क्षिमा, और उन लोगन के संग्गै पदवी पाबें, जौन मोय पे भरोसा करबे के द्वारा पवित्र भए आंय।

¹⁹ ई लाने हे राजा अग्रिप्पा, मैंने ऊ स्वर्गीय दरसन के हुकम कौ नईं टालो।

²⁰ पर पेंला दमिश्क के, फिर यरूशलेम के, और तब यहूदियन के सबरे परगना के रहबेवालन हां, इते लौ की गैर यहूदियन हां सोई जौई परचार करत रहो, की बे पछता के परमेसुर की कोद फिरें और मन फिराबे के जैसे काज करें।

²¹ ऐई काजें कछु यहूदियन ने मोय मन्दर में पकड़ो और मार डालबे की कोसिस करी।

²² ई तरहां परमेसुर की कोद से मदद पाके मैं आज लौ बनो भओ आंव और हल्के बड़े सबई के आंगू गवाही देत आंव, और जौन बातें आगमवक्तन और मूसा ने कई आंय, की बे होबेवाली आंय, उनहां छोड़ कछु नईं कहत।

²³ यानि मसीह हां दुख उठाने पड़ है, और ओई मरे भयन में से जी जाबे वालन में पैलो होकें, यहूदी परजा और गैर यहूदियन दोई हां ज्योत कौ सन्देसो दै है।

²⁴ जब पौलुस अपने बचाव में ई तरहां बोल रओ हतो, तो फेस्तुस ने जोर से कई; पौलुस तें पगला आय, तोरी ज्यादा विद्या ने तोय पगला बना दओ है।

²⁵ पर पौलुस ने कई; महाराज फेस्तुस, मैं पगला नईं आंव, पर सांची और गूढ़ बातें करत आंव।

²⁶ इन बातन हां राजा खुद जानत आय, जीके आंगू मैं बिना हिचक के बोल रओ आंव, मोय पूरो भरोसा आय, की इन में से कोई बात नईंयां, जौन उन से छुपी होबै, कायसे जा बात कोऊ कोने में नईं भई।

²⁷ हे राजा अग्रिप्पा, का तें आगमवक्तन कौ भरोसा करत आय? हओ, मैं जानत आंव, की तें भरोसा करत आय।

²⁸ तब अग्रिप्पा ने पौलुस से कई, तें तनक समझाबे से मोय मसीही बनाओ चाहत आय।

²⁹ पौलुस ने कई, परमेसुर करे, चाए तनक या बिलात बेरा में, न केवल तें, पर बे सबरे सोई जौन आज मोरी सुन रए आंय, इन बंधनों हां छोड़, बे मोरे घांई हो जै हैं।

³⁰ तब राजा उठो और ऊके संग्गै राज्यपाल बिरनीके और बैठे भए लोग भी उठ के ठांड़े भए।

³¹ और अलग जाके एक दूसरे से बतकाव करके जौ कहन लगे, जौ तो ऐसो कछु भी नईं कर रओ आय, जीसे मृत्युदण्ड या जेलखाने में डालबे लाक होय।

³² अग्रिप्पा ने फेस्तुस से कई; अगर ई मान्स ने कैसर से अपील न करी होती, तो जौ छोड़ दओ जातो।