- प्रेरितन के काम 24 - Bundeli Holy Bible

¹ पांच दिना के पाछें महापुरोहित हनन्याह कछु सियानन और तिरतुल्लुस नाओं कौ एक वकील हां संग्गै लैके आओ; और उन ने राज्यपाल के आगे पौलुस के विरुद्ध दोस लगाए।

² जब पौलुस हां टेरो गओ, तो तिरतुल्लुस ऊ पे दोस लगात भओ राज्यपाल से कहन लगो, कि, “महाराज फेलिक्स तोरे राज में हमाए देस में बड़ी सान्ति आय; और तोरी दूरन्दाजी से देस में बिलात काज कराए जा रए आंय।

³ हम जा बात हर तरहां से और हर जांगा धन्य कहके मानत आंय।

⁴ अब मैं तोरो और बिलात बेरा नास नईं करके तोय से बिनती करत आंव, की दया करके हम हां तनक सुनवाई कौ मौका दे।

⁵ बात जा आय की जौ मान्स सांची में बदमास आय, और जगत भर के सारे यहूदियन में फूट डालत आय, और नासरियन के बुरई चाल कौ मुखिया आय।

⁶ इते लौ की ईने मन्दर हां भी नास करबो चाहो, और तब हम ने ईहां बन्दी बना लओ, हम ईको न्याव अपनी रीत के अनसार करबो चाहत हते।

⁷ पर सेनापति लुसियास ने आके ऊहां जबरदस्ती हमाए हाथन से छुड़ा लओ।

⁸ और ईपे दोस लगाबे वालन हां तोरे आंगू आबे कौ हुकम दओ, जिन बातन के बारे में हम ऊ पै दोस लगात आंय, अगर तें खुद ऊसे पूछतांछ कर ले, तो तोय इन सब कौ ज्ञान हो जै है।”

⁹ यहूदियन ने भी ई दोस में ऊ को संग दओ, और दाबा करो की जे बातें ऐंसई आंय।

¹⁰ जब राज्यपाल ने पौलुस हां बोलबे कौ इसारा करो तो पौलुस ने बोलबो शुरू करो, जौ जानके की तें बिलात बरसन से ई जात कौ न्याव करत आओ आय, मैं खुसी से अपने बचाव में बोलत आंव।

¹¹ तें आपई सच्चाई कौ पता लगा सकत आय, की मोय प्रार्थना करबे के लाने यरूशलेम गए केवल बारह दिना भए आंय।

¹² इन ने मोय न ही मन्दर में, न ही प्रार्थना घर में, और न ही नगर में कहूं कोऊ से बतकाव करत या दंगा करत पाओ आय।

¹³ और न ही जे उन दोषन हां जौन अब मोय पे लगात आंय, तोरे आंगू साबित कर सकत आंय।

¹⁴ पर मैं तोरे आंगू जौ मान लेत आंव, की जी चाल हां जे बुरई चाल कहत आंय, ओई के अनसार मैं अपने पुरखन के परमेसुर कौ काज करत आंव: और जौन बातें रीत के अनसार आंय मानत हों, और जौन कछु आगमवक्तन के शास्त्रन में लिखी आंय, उन सब हां मानत हों।

¹⁵ मैं परमेसुर में जौ आस धरत आंव, जैसे जे खुद भी धरत आंय, की सही में धर्मी और अधर्मी दोई कौ फिन से जी जाबो हुईये।

¹⁶ ई लाने मैं भी परमेसुर और मान्सन के आंगू अपनी सोच हां निरदोस बनाए धरबे की सदा कोसिस करत आंव।

¹⁷ अब बिलात बरसन के पाछें मैं अपनी जात के लाने दान पोंचाबे, और भेंट चढ़ाबे आओ हतो।

¹⁸ जब इन ने मोय मन्दर में पाओ, तो मैं रीत अनसार सुद्ध होकें, बिना भीड़ भाड़ या दंगा करे, ई काज में लगो भओ हतो, पर उते आसिया के कछु यहूदी हते।

¹⁹ अगर उन लौ कछु मोरे विरुद्ध दोस लगाबे कौ होतो तो उन हां चाहने हतो, की बे तोरे आंगू इते हाजिर होकें दोस लगाते।

²⁰ नईं तो जे लोग खुद बताबें, की जब मैं बड़ी पंचायत के आंगू ठांड़ो हतो, तो उन ने मोय में कौन दोस पाओ।

²¹ केवल ई बात हां छोड़, जीहां मैंने उन के बीच ठांड़े होकें जोर से कई हती, मरे भयन के जी जाबे के बारे में, तुमाए आंगू मोरो न्याव हो रओ आय।

²² पर फेलिक्स ने जौन ई चाल की सही सही जानकारी धरत हतो, सुनवाई रोक के कई, जब सेनापति लुसियास आ है, तब मैं तुमाए मुकदमा पै फैसला दें हों।

²³ तब ऊ ने सूबेदार हां हुकम दओ, की पौलुस हां कछु ढील देके हिरासत में धरो जाबै, और ऊके संगियन में से कोऊहां भी ऊ की खुसामद करबे से नईं रोको जाबै।

²⁴ कछु दिना के पाछें फेलिक्स अपनी घरवारी द्रुसिल्ला हां, जौन यहूदिनी हती, संग्गै लैके आओ; और पौलुस हां टेर के ऊ भरोसे के बारे में, जौन मसीह यीशु में आय सुनो।

²⁵ अब बो धर्म की और आबेवाले न्याव की बतकाव कर रओ हतो, तो फेलिक्स ने डरा के कई, ई बेरा तो तें जा, बेरा मिलबे पे मैं तोय फिन टेर हों।

²⁶ बो पौलुस से रुपैया पाबे की आस सोई करत हतो; ई लाने बो ऊहां बेर बेर टेर के, ऊसे बतकाव करत हतो।

²⁷ जब दो साल बीत गए, तो फेलिक्स की जांगा पे पुरकियुस फेस्तुस हां ठहराओ गओ, और फेलिक्स यहूदियन हां खुस करबे की मनसा से पौलुस हां हिरासत में ही छोड़ गओ।