- प्रेरितन के काम 23 - Bundeli Holy Bible

¹ पौलुस ने बड़ी पंचायत की कोद टकटकी लगात भए कई, भईया हरौ, मैंने आज लौ परमेसुर के आंगू पूरी तौर से खरो जीवन बिताओ।

² तब हनन्याह महापुरोहित ने ऐंगर ठांड़े लोगन हां ऊके मों पे चांटा मारबे कौ हुकम दओ।

³ पौलुस ने ऊसे कई; हे चूना पुती भई भींत, तोय परमेसुर मार है: तें रीत के अनसार मोरो न्याव करबे के लाने इते बैठो आय, और फिन रीत के बिरोध में मोय मारबे कौ हुकम देत आय?

⁴ ऐंगर ठांड़े लोग ने कई, का तें परमेसुर के महापुरोहित हां बुरो भलो कहत आय?

⁵ ईपे पौलुस ने कई; भईया हरौ, मोय नईं मालूम हतो, की जौ महापुरोहित आय; कायसे लिखो आय, तें अपने लोग के हाकिमन हां बुरो नईं कहियो।

⁶ जब पौलुस ने जौ हेरो, की एक झुण्ड सदूकियन कौ आय और दूसरो फरीसियन को, तो बो महा पंचायत में हल्ला करके कहन लगो, भईया हरौ, मैं फरीसी आंव और फरीसियन के वंस कौ आंव, मरे भयन की आस और फिन से जी जाबे के काजें ही मोरो न्याव हो रओ आय।

⁷ ऊके जौ कहतई फरीसियन और सदूकियन में दो फांक हो गए; और पंचायत में फूट पड़ गई।

⁸ कायसे सदूकियन कौ जौ कहबो आय, की न ही फिन से जी जाबो आय, न ही सरगदूत और न ही कोई आत्मा आय; पर फरीसी जौ सब मानत आंय।

⁹ तब बड़ो हल्ला मचो और फरीसी झुण्ड के कछु शास्त्री उठ ठांड़े भए, और जोर जोर से बतकाव करन लगे, हम ई मान्स में कोऊ बुराई नईं दिखात; अगर कोई आत्मा या सरगदूत ने ईसे बतकाव करो आय तो फिन का?

¹⁰ जब बात ज्यादा बढ़त गई, तो सेनापति डरा गओ की कहूं बे पौलुस हां टुकड़ा टुकड़ा न कर डालें, ई लाने ऊ ने सिपाहियन हां हुकम दओ, की खालें जाके उन के बीच में से ऊहां जबरईं काड़ के किले में लै जाबें।

¹¹ पर ओई रात प्रभु ने ऊके ऐंगर ठांड़े होकें कई; हिम्मत धर; कायसे जैसे तेंने यरूशलेम में हिम्मत से मोरी गवाही दई आय, ओई तरहां तोय रोम में भी गवाही देने पर है।

¹² जब दिन भओ, तो यहूदियन ने बदला लैबे की सोची, और जौ कहके सौगंध खाई की जब लौ पौलुस हां मार न डालें, तब लौ न खा हैं और न पी हैं।

¹³ बदला लैबेवाले चालीस से अधक हते।

¹⁴ तब बे मुखिया पुरोहितन और सियानन के ऐंगर जाके कहन लगे, हम ने पक्के से मन बना लओ आय; की जब लौ पौलुस हां न मार डालें, तब लौ कछु न चीख हैं।

¹⁵ ई लाने अब तुम, और बड़ी पंचायत मिलके सेनापति हां समझाओ, की ऊहां अपने ऐंगर बहाने से टेरो, जानो की तुम ऊके बारे में खूब जांच परख करबो चाहत आव, हम ऊहां इते पोंचबे के पैलईं ऊहां मार डालबे के लाने तईयार रै हैं।

¹⁶ पर जब पौलुस के भांजे ने ऊहां घात करबे के बारे में सुनी? तो किले में पोंचो और भीतरै जाके पौलुस हां सबरी बात बता दई।

¹⁷ तब पौलुस ने सूबेदारन में से एक हां ऐंगर टेरके सब बात बता दई; ई जुवान हां सेनापति के ऐंगर लै जाओ, कायसे जौ ऊहां कछु बताओ चाहत आय।

¹⁸ ई लाने ऊ ने ऊहां सेनापति के ऐंगर लै जाके कई; कैदी पौलुस ने मोय अपने ऐंगर टेर के बिनती करी आय, की मैं ई जुवान हां तोरे ऐंगर पोंचा देओं; कायसे जौ कछु बताओ चाहत आय।

¹⁹ तब सेनापति ऊहां हाथ पकड़ के अलग लै गओ, और हरएं के पूछन लगो; तें मोय का बताओ चाहत आय?

²⁰ ऊ ने कई; यहूदी तोसे जा मांग करबे के लाने एक हो गए आंय, की पौलुस हां कल बड़ी पंचायत के आंगू लाबें, जानो की बे ऊ की और जांच परख कराबो चाहत आंय।

²¹ ई लाने तें उन की न सुनिये, कायसे उन में से चालीस से अधक मान्स ऊ की घात में लगे भए आंय, जिन ने एक होकें जा सौगंध खाई आय, की जब लौ पौलुस हां न मार डालें, तब लौ न खा हैं और न पी हैं, बे अबै सोई तईयार आंय और तोरे हुकम की बाट देखें आंय।

²² तब सेनापति ने जुवान हां जौ हुकम दैके जान दओ, कोऊ से न कहिये की तेंने मोय जा बात बताई आय।

²³ तब ऊ ने दो सूबेदारन हां अपने ऐंगर टेर के कई; कैसरिया जाबे के लाने रात नौ बजे लौ दो सौ सिपाहियन, सत्तर घुड़सवार, और दो सौ भालैत तईयार धरियो।

²⁴ राज्यपाल फैलिक्स के ऐंगर पौलुस हां साजी तरहां लै जाबे के लाने घुड़वन की सवारी कौ भी इंतजाम करो।

²⁵ और ऊ ने एक ऐसी पाती भी लिखी।

²⁶ महाराज राज्यपाल फेलिक्स हां क्लौदियुस लुसियास कौ नमस्कार।

²⁷ जब यहूदियन ने ई मान्स हां पकड़ के मार डालबो चाहो, तो मैंने जा जानके की जौ रोमी आय, सिपाहियन के संग्गै उन के ऊ परै धावा बोलो और में ईहां छुड़वा ले आओ।

²⁸ तब जौ पता लगाबे के लाने की बे की काजें ऊ पे दोस लगा रए आंय, मैं ऊहां उन की महापंचायत में ले गओ।

²⁹ फिन मोय पता पड़ो, की उन ने अपनी रीत हां लैके ऊ पे दोस लगाओ आय, पर ऐसो सोई दोस नईंयां जौन मौत की सजा देबे या कैदी बनाए जाबे के लाक होए।

³⁰ जब मोय जौ बताओ गओ, की ऊ मान्स के बिरुद्ध घात रची जा रई आय, तो मैंने ईहां तुरतईं तोरे ऐंगर पठै दओ; और ईपे दोस लगाबे वालन हां सोई हुकम दओ, की बे तोरे ऐंगर ईके बिरुद्ध दोस लगाबें।

³¹ ई लाने सिपाहियन हां जैसो हुकम दओ हतो, पौलुस हां रातई रात अन्तिपत्रिस पोंचा दओ।

³² पर दूसरे दिना घुड़सवारन हां ऊके संग्गै जाबे के लाने छोड़के बे किले हां लौट आए।

³³ जब घुड़सवार कैसरिया पोंचे, तो उन ने राज्यपाल हां पाती दई: और पौलुस हां भी ऊके आंगू हाजिर करो।

³⁴ पाती पढ़बे के पाछें ऊ ने पूंछी की तें की परगना कौ आय?

³⁵ और जौ जानके की जौ किलकिया कौ रहवासी आय; ऊने कई जब तोपे दोस लगाबेवाले भी आ हैं, तब मैं तोरी सुनवाई कर हों: और ऊ ने हुकम दओ की ऊहां हेरोदेस के किले में, रखवारी में धरो जाबै।