- प्रेरितन के काम 21 - Bundeli Holy Bible

¹ जब हम उन से विदा होकें जहाज से चले, तो सूदे चलकें कोस पोंचे, और दूसरे दिना रुदुस, और उते से पतरा।

² उते से फीनीके जाबे वालो एक जहाज मिलो, हम ऊ पे चढ़े और चल पड़े।

³ जब हम हां कुप्रुस दिखनो, तो ऊहां बांई कोद छोड़के, सूरिया की कोद बढ़े और सूर में जा उतरे; कायसे उते जहाज को माल उतरने हतो।

⁴ और चेलन से भेंट करके हम उते सात दिना लौ रए, और बे आत्मा की अगुवाई से पौलुस से कहत रए, की यरूशलेम में गोड़े न धरियो।

⁵ जब उते हमाए ठहरबे के दिना पूरे भए, तो हम विदा होकें चले; और सब मान्स बईयरन, बच्चन संग्गै हम हां नगर के बायरें लौ पहुंचाबे आए, और समुन्दर तीरे पे घुटना टेक के प्रार्थना करबे के पाछें हम ने एक दूसरे से विदा लई।

⁶ तब हम जहाज पे चढ़ गए, और बे अपने घरै लौट गए।

⁷ जब हम ने सूर से पानू कौ दौरा पूरो कर लओ तो पतुलिमयुस पोंचे, और भाईयन कौ प्रेम हेर के एक दिना उन के संग्गै रए।

⁸ दूसरे दिना उते से चलकें हम कैसरिया पोंचे, और फिलिप्पुस सन्देस प्रचारक के घरै जाके जौन सातऊ में से एक हतो, ऊके इते ठहरे।

⁹ ऊ की चार कुंवारी बिटियां हतीं; जौन अगमवानी करत हतीं।

¹⁰ जब हम हां रहत भए कछु दिना हो गए, तो यहूदिया से अगबुस नाओं कौ एक आगमवक्ता उते आओ।

¹¹ हमाए ऐंगर आके ऊ ने पौलुस को करियाई कौ फेंटा लओ, और अपने हाथ गोड़े बांधके कई; पवित्र आत्मा जौ कहत आय, जी मान्स कौ जो करियाई कौ फेंटा आय, ऊहां यरूशलेम में यहूदी ऐई तरहां बांध हैं, और अन्यजातियन के हाथ में दें हैं।

¹² जब हम ने जा सुनी, तो हम और उते के रहबेवाले मान्सन ने ऊसे यरूशलेम न जाबे के लाने बिनती करन लगे।

¹³ तब पौलुस ने कई, तुम जौ का कर रए आव, की रो रो के मोरे मन हां तोड़ रए आव, मैं तो प्रभु यीशु के नाओं के लाने यरूशलेम में न केवल बांधे जाबे, पर मरबे हां सोई तैयार आंव।

¹⁴ जब बो नईं मानो, तो हम जा कहके सान्त हो गए; प्रभु की मन्सा पूरी होबै।

¹⁵ इन दिना के पाछें हम ने तईयारी करी, और यरूशलेम की कोद चल दए।

¹⁶ कैसरिया से भी कछु चेले हमाए संग्गै हो लए, और हम हां कुप्रुस के मनासोन नाओं के एक चेला लौ लै आए, जीके संग्गै हम हां ठहरने हतो।

¹⁷ जब हम यरूशलेम पहुंचे, तो भाईयन ने हम हां बड़ी खुसी के संग्गै ठहराओ।

¹⁸ तब दूसरे दिना पौलुस हम हां लैके याकूब के घरै गओ, जिते सब सियाने जुड़े हते।

¹⁹ उन कौ सत्कार करके, ऊ ने एक एक करके बे काज बताए, जौन परमेसुर ने ऊ की सेवा से गैर यहूदियन में करे हते।

²⁰ जौ सुनके उन ने परमेसुर की बढ़वाई करी, और कई; भईया तें तो हेरत आय, की यहूदियन में हजारन आंय, जिन ने भरोसा करो आय; बे सब रीतियन के लाने उमंग से भरे आंय।

²¹ और उनहां तोरे बारे में बताओ गओ आय, की तें गैर यहूदियन के बीच रहबेवालो, यहूदियन हां जौ सिखात आय, की मूसा की सीख हां छोड़ दो, और कहत आय की न अपने बच्चन कौ खतना कराओ, और बनाई भई रीतियन हां मानो।

²² तो फिन का करो जाबै? बे जरूर जा सुन हैं, की तें आओ आय।

²³ ई लाने जौन हम तोय से कएं, बो कर, हमाए इते चार जनें आंय, जिन ने मन्नत मानी आय।

²⁴ उनहां लै जा और उन के संग्गै अपने आप हां शुद्ध कर; और उनहां खरचा दे, की बे अपने मूड़ मुड़ाएं, तब सबरे जान लें हैं, की जौन बातें तोरे बारे में उन हां बताई गईं आंय, बे तो सांची नईंयां, पर जौ की तें आपई रीतियन हां पालन करत भए, और उन हां मानत है।

²⁵ जिते लौ भरोसेमन्द गैर यहूदियन कौ नाता आय, हम ने उनहां जौ सार लिख के पठैव आय, की बे मूरतन के आंगू बलि करे भए मांस से, और खून से, और गले घोंटे भए के मांस से, और दुराचार से बचे रएं।

²⁶ तब पौलुस उन मान्सन हां लै गओ, और दूसरे दिना उन के संग्गै अपने खुद हां भी शुद्ध करके मन्दर में गओ, उते ऊ ने सब हां बताओ की शुद्ध होबे के दिना कबै पूरे हुईयें, यानि हम में से हर एक के लाने बलिदान कबै चढ़ाओ जै है।

²⁷ जब बे सात दिना पूरे होबे हां हते, तो आसिया के यहूदियन ने ऊहां मन्दर में तक के भीड़ हां भड़का दओ, और पौलुस हां पकड़ लओ।

²⁸ और चिल्या के कई, हे इस्राएलियो हमाई मदद करो; जौ बो मान्स आय, जौन हर जांगा सब जनन में हमाई प्रजा और रीतियन और ई जांगा के बिरोध में परचार करत आय, इते लौ कि ऊ ने यूनानियन हां मन्दर में लिया के ई पवित्र जांगा हां असुद्ध कर दओ आय।

²⁹ कायसे ईसे पेंला उन ने त्रुफिमुस नाओं के इफिसी हां ऊके संग्गै नगर में हेरो हतो, और जौ मानो की पौलुस ऊहां मन्दर में लै आओ आय।

³⁰ पूरो नगर भड़क उठो, और सब लोग गदबद दैके जुड़ गए, और बे पौलुस हां पकड़ के मन्दर से बायरें घसीट लाए, और तुरतईं किवाड़ बन्द कर दए गए।

³¹ जब बे ऊहां मार डालबे हां हते, तो रोमी सिपाहियन के सेनापति हां जा खबर मिली, की सारे यरूशलेम में गड़बड़ी मच गई आय।

³² बो तुरतईं सिपाहियन और सूबेदारन हां लैके उन की कोद गदबद दई; और जब मान्सन ने सेनापति और सिपाहियन हां हेरो तो पौलुस हां पीटबो बन्द कर दओ।

³³ तब सेनापति ने ऐंगर आके ऊहां पकड़ लओ; और ऊहां दो सांकलन में बांधबे कौ हुकम दओ और पूछन लगो, जौ को आय, और ऊ ने का करो आय?

³⁴ पर भीड़ में से कोऊ कछु और कोऊ कछु कैत रओ और ऊ हुल्लड़ के मारे जब बो सही बात नईं जान सको, तो ऊहां छावनी में लै जाबे कौ हुकम दओ।

³⁵ जब बो छिड़ियन के ऐंगर पोंचो, तो ऐसो भओ, की हत्यारी भीड़ के काजें सिपाहियन हां ऊहां उठाके लै जाबो पड़ो।

³⁶ कायसे भीड़ ऊके पाछें लग गई हती और बे चीख रए हते, ईहां खतम करो।

³⁷ जब बे पौलुस हां छावनी के भीतरै लै जाबे हां हते, तो ऊ ने सेनापति से कई; का मैं तोसे कछु कह सकत हों? ऊ ने पूंछी तें यूनानी जानत आय?

³⁸ का तें बो मिसरी तो नईंयां, जीने कछु दिना पैले दंगा करवाओ और चार हजार कटारबन्द लोगन हां डांग में ले गओ हतो?

³⁹ पौलुस ने कई, मैं यहूदी आंव और तरसुस कौ एक रहबेवारो आंव! मैं तोसे बिनती करत आंव, की मोय लोगन से बतकाव करन दे।

⁴⁰ जब ऊ ने हुकम दै दओ, तो पौलुस ने छिड़ियन पै ठांड़े होकें अपने हाथन से लोगन की कोद इसारो करो, और जब उते सन्नाटा छा गओ, तो ऊ ने लोगन से इब्रानी बोली में कई।