- प्रेरितन के काम 19 - Bundeli Holy Bible

¹ ऐसो भओ की जब अपुल्लोस कुरिन्थुस में हतो, तो पौलुस ऊ परै के प्रदेशन से होत भओ इफिसुस में पोंचो, और उते पे ऊहां कछु चेले मिले।

² ऊ ने उन से कई; का तुम ने भरोसा करत भए पवित्र आत्मा पाओ? उन ने ऊसे कई, हमने तो सुनो भी नईंयां की पवित्र आत्मा आय।

³ तब ऊ ने कई; फिन तुम ने की को बपतिस्मा लओ? उन ने कई; यूहन्ना कौ बपतिस्मा।

⁴ ईपे पौलुस ने कई; यूहन्ना ने जा कहके लोगन हां मन फिराओ कौ बपतिस्मा दओ, की जौन मोरे पाछें आबेवालो आय, ऊ पे यानि यीशु पे भरोसा करियो।

⁵ जा सुनके उन ने प्रभु यीशु के नाओं में बपतिस्मा लओ।

⁶ जब पौलुस ने उन पे अपनो हाथ धरो, बे तरह तरह की बोली बोलन लगे और अगमबाणी करन लगे।

⁷ जे सब करीब बारह मन्सेलू हते।

⁸ बो प्रार्थनाघर में जाके तीन महिना लौ बेखटके बोलत रओ, और परमेसुर के राज्य के बारे में बतकाव करत और उनहां समझात रओ।

⁹ पर जब कछु लोगन ने कड़ो होकें ऊ की नईं मानी और भीड़ के आंगू ई धरम हां भलो बुरो कहन लगे, तो बो चेलन हां लैके उन से अलग हो गओ, और तुरन्नुस की पाठशाला में रोजीना बतकाव करत रओ।

¹⁰ दो साल लौ ऐसई होत रओ, जीसे की बे जौन आसिया में रहत हते यहूदी और यूनानी सब ने प्रभु कौ बचन सुन लओ।

¹¹ और पौलुस के हाथन से, परमेसुर अद्भुत बल के काज दिखात हतो।

¹² इते लौ की ऊके सरीर से छुए भए रूमाल और अंगोछा बीमारन पे डाल दए जात हते, और उन की बीमारियां दूर हो जात हतीं; और दुष्ट आत्माएं उन में से कड़ जात हतीं।

¹³ पर झाड़ फूंक करबेवाले कछु यहूदी जौन इते उते घूमत फिरत हते, असुद्ध आत्मन से त्रस्त लोगन हां यीशु मसीह के नाओं कौ इस्तेमाल करबे की कोसिस जौ कहके करन लगे, मैं तुमहां ऊ यीशु की सौगंध देत आंव, जीको परचार पौलुस करत आय।

¹⁴ और स्क्किवा नाओं कौ एक यहूदी बड़े पुरोहित के सातई पूत ऐंसई कर रय हते।

¹⁵ पर दुष्ट आत्मा ने उनहां कई, यीशु हां मैं चीनत आंव, और पौलुस हां सोई चीनत आंव; पर तुम को आव?

¹⁶ और बो मान्स जी में दुस्ट आत्मा हती; उन पै झपटो, और ऊहां वस में करके, उन पे ऐसो बली भओ की बे नंगे और घायल होकें ऊ घर से कड़ भगे।

¹⁷ जे बात इफिसुस के रहबेवाले का यहूदी, का यूनानी सब जनन हां पता पड़ो, उन सब पे डर समा गओ; और प्रभु यीशु के नाओं की बढ़वाई करन लगे।

¹⁸ जिन ने भरोसा करो हतो, उन में से बिलात ने आके अपने काज हां मान लओ और उनहां दरसा दओ।

¹⁹ बिलात लोगन ने जो जादू टोना करत हते, अपनी अपनी पोथियां जमा करके सब के आंगू बार दईं, जब उन ने उन कौ मोल आंको, तो करीब पचास हजार सिक्कन के बरोबर कड़ीं।

²⁰ ई तरहां प्रभु कौ बचन बल के संग्गै फैलत और बली होत गओ।

²¹ जब जे बातें हो चुकीं, तो पौलुस ने अपनी आत्मा में मकिदुनिया और अखाया से होत भओ, यरूशलेम जाबे की ठानी, और कई, उते पोंचबे के पाछें मोय रोम हां भी जाबो जरूरी आय।

²² ई लाने जौन ऊ की खुसामद करत हते, उन में से दोई हां यानि तीमुथियुस और इरास्तुस हां मकिदुनिया पठैय के बो अकेले कछु बेरा के लाने आसिया में रहो।

²³ ई दिनन में धर्म के बारे में बड़ो दंगा भओ।

²⁴ कायसे देमेत्रियुस नाओं कौ एक सुनार हतो, जौन अरतिमिस के चान्दी के मन्दर बनवा के कारीगरन हां बिलात काम दिलात हतो।

²⁵ ऊ ने उनहां और ऐई तरहां कौ धन्धा करबे वाले कारीगरन हां इकट्ठो करके कई; हे भाईया हरौ, तुम जानत आव, कि हमहां ई धन्धे से कितनो धन मिलत आय।

²⁶ और तुम हेरत और सुनत आव, की न केवल इफिसुस में, बल्कि करीब सबरे आसिया में ई पौलुस ने बिलात लोगन हां समझा बुझाके और जौ कहके बहका दओ आय, की जा तो हाथन की कारीगरी आय, बो परमेसुर नईंयां।

²⁷ ईसे न केवल जौ डर आय, की हमाए धन्धे की साख जात रई आय; बल्कि अरतिमिस महान देवी कौ मन्दर तुच्छ समझो जै है, और जी देवी की पूजा आसिया और जगत के सबई लोग बाग करत आंय, बो अपने तेज से गिरा दई जै है।

²⁸ जब उन ने जा सुनी तो खुन्सया गए, और चीख चीख के कहन लगे, “इफिसियों की देवी अरतिमिस महान आय”।

²⁹ नगर में हो हल्ला मच गओ और लोगन ने गयुस और अरिस्तरखुस नाओं के पौलुस के संगियन हां जौन मकिदुनिया से आए हते, खचोड़ के एक संग्गै गदबद दै के नाठ्यशाला में गए।

³⁰ जब पौलुस ने भीड़ में जाओ चाहो, तो चेलन ने ऊहां हटक दओ।

³¹ और आसिया के कछु हाकिमन ने जौन ऊके प्रेमी हते ऊहां कहला पठैव, और बेर बेर बिनती करी, की बो नाठ्यशाला में जाबे कौ जोखम न उठाए।

³² ई लाने कोऊ कछु चीख रओ हतो, और कोऊ कछु; कायसे बैठक में उधम मचो हतो, बिलात जनें जौ नईं जानत हते, की बे इते काय जमा भए हते।

³³ तब भीड़ में कछु लोग ने सिकन्दर हां, जीहां यहूदियन ने आंगू ठांड़ो कर दओ हतो, सिकन्दर ने हाथ से इसारो करके बचाव में बैठक हां बोलबो चाहो।

³⁴ पर जब लोगन ने चीनो की बो यहूदी आय, तो करीब दो घण्टा लौ सब के सब एक होकें चिल्यात रए, इफिसियन की अरतिमिस महान आय।

³⁵ तब मन्दर के मंत्री ने भीड़ हां सान्त करके कई; हे इफिसुस के रैबेवारो, ऐंसो को मान्स आय, जौन नईं जानत की इफिसुस कौ जौ नगर महान देवी अरतिमिस के मन्दर में आकास से गिरी भई मूरत कौ रखनवारो आय।

³⁶ ई लाने जब इन बातन कौ खण्डन नईं हो सकत, तो जौई सही आय, की तुम सान्त रओ; और हड़बड़ी में क छु नईं करो।

³⁷ कायसे तुम इन मान्सन हां लाए आव, जौन न तो हमाए मन्दर के लुटेरे आंय, और न हमाई देवी के ठट्ठा करबेवाले आंय।

³⁸ फिन भी अगर देमेत्रियुस और उन कारीगरन हां जौन ऊके संग्गै आंय, कोई मान्स से कोऊ विवाद आय, तो कचहरी खुली आय, और राज्यपाल हाजिर आय; उते एक दूसरे पे दोस लगाबें।

³⁹ पर तुम ईके अलावा और कछु चाहत आव, तो ईको न्याव ठहराई बैठक में करो जै है।

⁴⁰ कायसे हम हां सांची ई बात कौ डर आय, की आज के भए दंगे कौ दोस कहूं हम पे नईं मड़ दओ जाबै, कायसे ईके होबे की कोऊ बात नईंयां, ई लाने हम भीड़ के जमा होबे कौ उलानो न दे पा हैं।

⁴¹ जौ कह के ऊ ने बैठक हां भंग कर दओ।