- प्रेरितन के काम 17 - Bundeli Holy Bible

¹ फिन जब बे अम्फिपुलिस और अपुल्लोनिया से होकें कड़े, तो थिस्सलुनीके पोंचे, जिते यहूदियन कौ एक प्रार्थना घर हतो।

² पौलुस अपनी रीत के अनसार उन के ऐंगर गओ, और तीन सब्त लौ पवित्र शास्त्र में से उन के संग्गै बतकाव करत रओ।

³ और ई बात कौ मतलब साफ करके जौ साबित करत रओ, की मसीह हां दुख उठाबो, और मरे भयन में से जी जाबो, जरूरी हतो; और बो कहत हतो, जौई यीशु जीको मैं तुमाए सामूं परचार करत आंव, मसीह आय।

⁴ उन में से कछु मान्सन ने भरोसा करो, और भक्त यूनानियन के बड़े झुण्ड व बिलात खास बईयरन संग्गै बे पौलुस और सीलास के संग्गै मिल गए।

⁵ पर यहूदी जलन से भर गए और उन ने बाजार से कछु दुष्टन हां अपने संग्गै कर लओ, और भीड़ जोड़ के नगर में हुल्लड़ मचाओ, और यासोन के घर पे चढ़ाई करके उनहां लोगन के आंगू लाबो चाहो।

⁶ पर जब उन ने उते उनहां नईं पाओ, तो बे यासोन और कछु भाईयन हां नगर के हाकिमन के ऐंगर घसीट लाए, और चिल्या के कैन लगे जे लोग जिन ने जगत में उथल पुथल मचा दई आय, इते सोई आ पोंचे आंय।

⁷ और यासोन ने उनहां अपने इते ठहराओ आय, और बे सबरे के सबरे कैसर के हुकम कौ जौ कहके बिरोध करत आंय, की यीशु राजा आय।

⁸ और उन ने भीड़ हां और नगर के हाकिमन हां जिन ने जौ सब सुनो हतो, उसका दओ।

⁹ ईपे उन ने यासोन और दूसरे लोगन से जमानत लैके उनहां जान दओ।

¹⁰ भाईयन ने तुरतईं रात में पौलुस और सीलास हां बिरिया पठै दओ, जिते पोंचबे पे बे यहूदियन के प्रार्थनाघर में गए।

¹¹ जे लोग थिस्सलुनीके मान्सन से बिलात साजे हते, कायसे उन ने बड़ी लगन से बचन हां मान लओ, और रोजीना पवित्र पोथी में से खोज बीन करत रए, की हेरें जे बातें ऐंसई आंय कि नईंयां।

¹² ई लाने उन में से बिलात ने, और नामी यूनानी बईयरन में से और मान्सन में से बिलात ने भरोसा करो।

¹³ पर जब थिस्सलुनीके यहूदियन हां पता पड़ो, की बिरीया में भी पौलुस ने परमेसुर कौ बचन सुनाओ आय, तो बे उते आके भीड़ हां भड़काऊ न और हुल्लड़ मचाऊ न लगे।

¹⁴ तब भाईयन ने पौलुस हां तुरतईं समुन्दर किनारे पे जाबे के लाने विदा करो; पर सीलास और तीमुथियुस उतईं रै गए।

¹⁵ पौलुस हां पहुंचाबे वाले एथेन्स लौ ऊहां लै गए, और ऊसे जौ हुकम पाके की सीलास और तीमुथियुस फौरन मोरे ऐंगर आ जाबें, बे उते से विदा भए।

¹⁶ जब पौलुस एथेन्स में उन की बाट तकें हतो, तो नगर हां मूरतन से भरो भओ हेर के बर उठो।

¹⁷ ई लाने बो हर दिना प्रार्थनाघर में यहूदियन से और गैर यहूदियन भक्तन से और बाजार में उन से जौन उते मिलत हते, बतकाव करत हतो।

¹⁸ और कछु इपीकूरी और स्तोईकी ज्योतिषियन भी ऊसे बहस करन लगे, कछु कहत हते, जौ बकवासी कहबो का चाहत आय? पर दूसरन ने कई; जौ तो अद्भुत देवता कौ परचार करबेवालो जान पड़त आय, कायसे बो यीशु और मरे भयन के जी जाबे कौ परचार कर रओ हतो।

¹⁹ बे ऊहां अपने संग्गै अरियुपगुस की बैठक में ले गए और पूछन लगे, कि हम हां बता, की जा नईं सीख जी को तें परचार करत आय का है?

²⁰ कायसे तें हम हां कछु अनोखी बातन हां सुनात आय, ई लाने हम जानबो चाहत आंय की इन बातन कौ मतलब का है?

²¹ (कायसे सब एथेन्सवासी और परदेसी जौन उते रैत हते, नई नई बात कहबे और सुनबे के अलावा और कोऊ बात में अपनी बात नईं बितात हते।)

²² तब पौलुस ने अरियुपगुस के बीच में ठांड़े होकें कई; हे एथेंस के रैबेवारो ऐसो लगत आय, की तुम सब बातन में बड़े धर्मी आव।

²³ कायसे जब मैं घूमत फिरत तुमाए पूजबे की चीजन को हेर रओ हतो, तो मोहां एक वेदी मिली, जीपे लिखो हतो, “अनजाने ईश्वर के लाने”। ई लाने जीहां तुम बिना जाने पूजत आव, ओई कौ सन्देसो मैं तुम हां सुनात आंव।

²⁴ परमेसुर जीने जगत और ऊ में की सबई बस्तन हां बनाओ, ओई सरग और धरती कौ प्रभु आय, बो हाथन के बने मन्दिरन में नईं रहत।

²⁵ और न ही मान्सन के हाथन से खुसामत करात आय, कायसे ऊहां कोऊ बात की कमी घटी नईंयां, बो सब हां जीवन और सांस और सब कछु देत आय।

²⁶ ऊने एकई जड़ से मान्स की हर एक जात हां बनाओ की सबरी धरती पे बस जाबें; और ई लाने ऊ ने उन को एक सही बेरा, और उन के रहबे की हदें ठहरा दईं।

²⁷ कि बे परमेसुर हां खोजें, जौ भी हो सकत आय की बे ऊहां टटोल के पाबें, जब की बो हम में से कोऊ से दूर नईंयां।

²⁸ कायसे ओई में हम जीयत रहत, और निंगत फिरत, और बने रहत आंय; जैसो कि तुमाए कछु कवियन ने भी कई आय, हम भी तो ओई की लड़ेर आंय।

²⁹ ऐई तरहां परमेसुर की लड़ेर होकें हम हां जौ कभऊं नईं सोचो चईये, की परमेसुर सोनो, चांदी यानि पथरा की कोऊ कारीगरी घांई आय, जौन मान्स की बनाई और सोच से गढ़ो गओ आय।

³⁰ ई लाने मूरखता की बातन हां छोड़, परमेसुर अब हर जांगा सबरे मान्सन हां हुकम देत आय, की मन फिराबें।

³¹ कायसे ऊ ने एक दिना ठहराओ आय, जीमें एक मान्स के द्वारा, जीने ऊहां ठहराओ आय, बो धर्म से जगत कौ न्याव कर है, और ऊ ने मरे भयन में से ऊहां जिला के, ई बात हां सबरे मान्सन पे साबित कर दई आय।

³² जब उन ने मरे भयन में से जी जाबे की बात सुनी तो कछु लोग ठट्ठा करन लगे, पर दूसरन ने कई, हम ई बारे में तोय से फिन कभऊं सुन हैं।

³³ ई पे पौलुस उन के बीच में से कहूं चलो गओ।

³⁴ पर कछु लोग ऊके संग्गै हो लए, और उन ने भरोसा करो, जिन में दियुनुसियुस अरियुपगी और दमरिस नाओं की एक बईयर हती, और उन के संग्गै दूसरे और भी लोग हते।