- प्रेरितन के काम 13 - Bundeli Holy Bible

¹ अन्ताकिया की मडण्ली में कछु आगमवक्ता और गुरू हते; जैसे बरनाबास और शमौन जो नीगर कहात आय; लूकियुस कुरेनी, और देस की चौथाई के राजा हेरोदेस कौ दूधभाई मनाहेम और शाऊ ल।

² जब बे उपास और प्रभु की भक्ति कर रए हते, तो पवित्र आत्मा ने कई; मोरे लाने बरनाबास और शाऊ ल हां, ऊ काज के लाने न्यारो करो, जीके लाने मैंने उनहां टेरो आय।

³ जब बे उपास और प्रार्थना कर चुके, तो उन पे हाथ धरके उनहां पठै दओ।

⁴ ई लाने पवित्र आत्मा से कय से बे सिलूकिया गए; और उते से जहाज से कुप्रुस गए।

⁵ सलमीस पहुंच के, उन ने यहूदियन के प्रार्थनाघरन में परमेसुर कौ परचार करबो शुरू करो; यूहन्ना उन कौ चाकर हतो।

⁶ जब बे ऊ सबरे टापू में से होत भए पाफुस पोंचे, तो उनहां बार-यीशु नाओं कौ एक जादूगर मिलो, जौन यहूदी और लबरो आगमवक्ता हतो।

⁷ बो राज्यपाल सिरगियुस पौलुस के संग्गै हतो, जौन होसियार जन हतो: ऊने बरनाबास और शाऊ ल हां टेर के परमेसुर के बोल हां सुनबो चाहो।

⁸ पर इलीमास जादूगर ने, ऊके नाओं कौ जौई मतलब आय, उन कौ विरोध करके, राज्यपाल हां भरोसा करबे से बहकाबे की कोसिस करीे।

⁹ पर शाऊ ल ने जौन पौलुस भी कहात हतो, पवित्र आत्मा से भरपूर होकें ऊ की कोद गौर से हेर के कई।

¹⁰ सबई छल और मूरखता से भरे हे शैतान की लड़ेर, तें जौन सब धर्मन कौ बैरी आय, का तें प्रभु की सूदी गैल हां टेड़ो करबो न छोड़ है?

¹¹ अबै हेर, प्रभु कौ हाथ तोपे पड़ो आय; और तें अंधरो हो जै है और कछु बेरा लौ सूरज न हेर पै है: तब तुरतईं ऊ पै धुंधलो और अंधयारो छा गओ, और बो इते उते टटोलन लगो, कि कोऊ ऊ को हाथ हां थाम के ऊहां गैल बताए।

¹² तब राज्यपाल ने ई घटना हां देख के और प्रभु के बोल हां सुनके अचरज करके भरोसा करो।

¹³ पौलुस और ऊके संग्गी पानू की गैल से होकें पाफुस से पंफूलिया के पिरगा में आए: और यूहन्ना उनहां छोड़ के यरूशलेम हां लौट गओ।

¹⁴ बे पिरगा से निंग के पिसिदिया के अन्ताकिया में पोंचे; और सब्त के दिना प्रार्थनाघर में जाके बैठ गए।

¹⁵ रीतियन और आगमवक्तन की पुस्तकन में से बोल हां पढ़बे के पाछें प्रार्थनाघर के हाकिमन ने उन के ऐंगर कहला पठैव, की हे भईया हरौ, अगर तुमाए ऐंगर लोगन के लाने कोऊ सुनाबेवारी बात होबै तो कओ।

¹⁶ तब पौलुस ठांड़ो भओ और हाथन से इसारो करके कहन लगो; हे इस्राएलियो, और प्रभु को भय मानबेवालो सुनो।

¹⁷ ई इस्राएली मान्सन के परमेसुर ने हमाए पुरखन हां चुन लओ, ऊ ने मिस्र के देस में चलबे की बेरा उनहां महान करो; और अपनी बलवान भुजा बड़ा के उनहां उते से काड़ लाओ।

¹⁸ और करीब चालीस बरस लौ जंगलन में उन की सहत रओ।

¹⁹ ऊहां कनान देस की सातई जातन हां नास करबे और उन की जमीन हां कब्जा कराबे के लाने बांटबे में करीब साढ़े चार सौ बरस लगे।

²⁰ इन बातन के पाछें, ऊ ने उनहां सामुएल आगमवक्ता की बेरा लौ न्याव दओ।

²¹ तब उन ने राजा की मांग करी: और परमेसुर ने बिन्‍यामीन के गोत्र में से एक मान्स; यानि कीश कौ पूत शाऊ ल हां चालीस बरस के लाने उनहां राजा होबे हां दै दओ।

²² फिन ऊहां निकालबे के पाछें, ऊ ने दाऊद हां उन कौ राजा बनाओ; जीके बारे में ऊ ने गवाही दई, और कई मोय एक मान्स यिशै कौ पूत मिलो आय; जौन मोरे मन के अनसार आय और जौन मोरी मनसाएं पूरी कर है।

²³ ऐई मान्स के वंस से परमेसुर ने अपनी ठाने अन्सार इस्राएल के ऐंगर एक उद्धार करबेवालो, यानि यीशु हां पठैव।

²⁴ जीके आबे से पेंला यूहन्ना ने सबरे इस्राएलियन के सब लोगन में मन फिराबे के बपतिस्मा कौ परचार करो हतो।

²⁵ जब यूहन्ना अपनो काज पूरो करबे पे हतो, तो ऊने कई, तुम मोय का समझत आव? मैं बो नईं आंव! पर हेरो, मोरे पाछें एक आबेवालो आय, ऊके गोड़ों की पनईयां के बन्ध मैं खोलबे लाक नईंयां।

²⁶ हे भईया हरौ, इब्राहीम के बच्चो; और तुम में से जौन परमेसुर कौ भय मानत आय, तुमाए लाने ही उद्धार कौ बचन पठैव गओ आय।

²⁷ ऐई जन हां और आगमवक्तन की बातन हां, जिनहां हरएक सब्त के दिना पढ़ो जात हतो न समझत हो, यरूशलेम के रहबेवालन और उन के हाकिमन ने ऊहां दोसी ठहराके इन बातन हां पूरो करो।

²⁸ कायसे उन के ऐंगर ऊहां मार डालबे के लाने कोऊ पक्को सबूत नईं हतो, फिन भी उन ने पीलातुस से मांग करी, कि बो मार डालो जाबै।

²⁹ जब उन ने ऊके बारे में लिखी भई सब बातन हां पूरो कर लओ, तब ऊहां क्रूस पे से उतरवा के कबर में धर दओ।

³⁰ पर परमेसुर ने ऊहां मरे भयन में से जिला दओ।

³¹ और जौन ऊके संग्गै गलील से यरूशलेम आए हते, उनहां बिलात दिना लौ दरसन देत रओ; जे बेई आंय जौन अबै लोगन के सामूं गवाह आंय।

³² हम तुमहां ऊ कौल के बारे में, जो पुरखन ने करी हती, जौ सन्देस सुनात आंय।

³³ कि परमेसुर ने यीशु हां जिला के, ओई बात हां हमाई लड़ेर के लाने पूरी करी, जैसो कि दूसरे भजन में भी लिखो आय, तें मोरो पूत आय; आजई मैंने तोय जन्म दओ आय।

³⁴ ऊ ने ऊहां मरे भयन में से जिलाओ, की बो कभऊं नईं सड़ है, ऊ ने ई तरहां कई; मैं दाऊद की पवित्र और अटल आसीस तोय दै हों।

³⁵ ई लाने बो एक और भजन में कहत आय; तें अपने पवित्र जन हां सड़न न दै है।

³⁶ कायसे दाऊद परमेसुर के मन के अनसार अपने जुग के लोगन कौ काज पूरो करत भओ सो गओ; और अपने पुरखन के बीच में गाड़ो गओ; और सड़ गओ।

³⁷ पर जीहां परमेसुर ने जिलाओ, बो सड़ने नईं पाओ।

³⁸ ई लाने हे भईया हरौ; तुम जौ जान लईयो कि ऐई के द्वारा पापन की क्षमा कौ सन्देस तुम हां सुनाओ जात आय।

³⁹ और ऐई के द्वारा हर एक भरोसा करबेवालो उन सबरी बातन से छुटकारो पात आय, जिन से तुम मूसा की रीतियन के द्वारा छुटकारो नईं पा सकत हते।

⁴⁰ ई लाने होसियार रहियो, कि कहूं आगमवक्तन कौ कहबो तुम पे घटित न हो जाबै।

⁴¹ हे ठट्ठौ करबेवालो, हेरो, और अचरज करो, और मिट जाओ; कायसे मैं तुमाए दिन में एक काज कर रओ आंव; ऐसो काज, जीकी अगर कोऊ तुम से चरचा भी करे, तो तुम कभऊं ऊ की बातन कौ भरोसा न करियो।

⁴² जब पौलुस और बरनाबास बायरें जान लगे तो मान्सन ने उन से बिनती करी, कि आबेवाले सब्त के दिना जे बातें फिन सुनाई जाबें।

⁴³ जब प्रार्थना सभा खतम हो गई तो बिलात यहूदी और यहूदी धर्म में आए भए भक्तन में से बिलात लोग पौलुस और बरनाबास के पाछें हो लए; उन ने बतकाव करत भए उन से बिनती करी कि परमेसुर के आसीस में बने रएं।

⁴⁴ आंगू के सब्त हां सबरो नगर परमेसुर के बोल हां सुनबे के लाने उमड़ पड़ो।

⁴⁵ पर जब यहूदियन ने भीड़ हां हेरो तो बे जलन से भर गए, और ठट्ठो करत भए पौलुस की कही भई बातन कौ बरगलान लगे।

⁴⁶ तब पौलुस और बरनाबास ने जोर देके कई, जौ जरूरी हतो, की परमेसुर कौ बोल पेंला से तुम हां सुनाओ जातो: पर ई लाने की तुम ऊ को नईं मानत आव, और अपने आपई हां अनन्त जीवन के लाने नईं ठहरात आव, तो हेरो, हम गैर यहूदियन की कोद जात आंय।

⁴⁷ कायसे प्रभु ने हम हां जौ हुकम दओ आय; मैंने तोय गैर यहूदियन के लाने ज्योत ठहराई आय; कि तें धरती के छोर लौ उद्धार कौ काज आय।

⁴⁸ जब गैर यहूदियन ने जौ सुनो तो बे खुस भए, और प्रभु के बोलन की बड़ाई करन लगे: और जितेक अनन्त जीवन के लाने ठहराए गए हते, उन ने भरोसा करो।

⁴⁹ और प्रभु कौ बोल पूरे इलाके में फैलत चलो गओ।

⁵⁰ पर यहूदियन ने भक्त और धनी बईयरनऔर नगर के बड़े खास जन हां भड़काओ, और पौलुस और बरनावास के खिलाफ उपद्रव कराके उनहां अपने इलाके से काड़ दओ।

⁵¹ तब बे उन के सामूं अपने गोड़न की धूरा झाड़के इकुनियुम हां चले गए।

⁵² और चेले खुसी और पवित्र आत्मा से सदा भरपूर होत गए।