- प्रेरितन के काम 12 - Bundeli Holy Bible

¹ ओई बेरा राजा हेरोदेस ने मण्डली के कछु जन हां सताबे के लाने उन पे हाथ उठाए।

² ऊ ने यूहन्ना के भईया याकूब हां तलवार से मरवा डालो।

³ और पतरस हां सोई पकड़वाबे के लाने आंगू बढ़ो, जे अखमीरी रोटी के दिना हते।

⁴ और ऊ ने ऊहां पकड़वा के जेलखाने में डाल दओ, और चार चार सिपाईयन के चार दल हां पहरा पे ई लाने धरो, कि फसह के पाछें ऊहां बायरें मान्सन के सामूं लाओ जाबै।

⁵ ई तरहां पतरस जेलखाने में धरो गओ, पर मण्डली ऊके लाने परमेसुर से एक मन से प्रार्थना करत रई।

⁶ जी रात हेरोदेस ऊहां बायरें काड़बेवालो हतो, पतरस दो जंजीरन से बंधो भओ, दो सिपाईयन के बीच में सो रओ हतो: और पहिरेदार द्वार पे रखनवारी कर रओ हतो।

⁷ और हेरो, प्रभु कौ एक सरगदूत एकाएक आ गओ: और ऊ कुठरिया में उजयारो चमको: और ऊ ने पतरस की पसुरिया में हाथ मार के ऊहां जगाओ, और कई; तुरतईं उठो, और ऊके हाथन से जंजीरें गिर पड़ीं।

⁸ सरगदूत ने ऊसे कई; करियाई बांध और अपनी पनईयां पहिन ले, ऊ ने वैसई करो, फिन ऊ ने ऊसे कई, अपने उन्ना पहिन के मोरे पाछें आ।

⁹ बो बायरें कड़ो और ऊके पाछें पाछें चलो गओ; पर ऊ की समझ में जौ नईं आ रओ हतो, कि जो कछु सरगदूत कर रओ आय, बो सांची आय, पर ऊ ने जा सोची, कि मैं कोई दरसन हेर रओ आंव।

¹⁰ और जब बे पेंला और दूसरां पहिरे से कड़के, लोहे के ऊ फाटक पे आए, जौन नगर की कोद आय; तो बो ऊके लाने अपने से खुल गओ: बे बायरें कड़ के एक गलियारा में होकें निंगे, और तुरतईं सरगदूत ऊहां छोड़के चलो गओ।

¹¹ जब पतरस हां होस आओ, तो ऊ ने सोची अब मैं सही में जान गओ आंव, कि प्रभु ने अपनो सरगदूत पठैय के मोय हेरोदेस के हाथन से छुड़ा लओ, और यहूदियन की सबरी आस पे पानू फेर दओ आय।

¹² जब ऊहां जौ मालूम भओ तो ऊ यूहन्ना की मताई मरियम के घरै गओ, जौन मरकुस सोई कहात आय; जिते बिलात लोग जमा होकें प्रार्थना कर रए हते।

¹³ जब ऊ ने फाटक के द्वारे हां खटखटाव, तब रूदे नाओं की चाकरनी खोलबे आई।

¹⁴ जब ऊ ने पतरस कौ एैरो चीनो, तो खुसी के मारे बिना द्वार खोले, गदबद देके भीतर गई, और बताओ, कि पतरस द्वार पे ठांड़ो आय।

¹⁵ उन ने ऊसे कई तें पगलू आय; मगर बो जोर से भरोसा धरके बोली जा सांची आय, तब उन ने कई, ऊकौ सरगदूत हुईये।

¹⁶ पर पतरस खटखटात रओ, जब उन ने द्वार खोलो तो बे ऊहां हेर के अचरज में पड़ गए।

¹⁷ पर ऊ ने उनहां सान्त रहबे कौ इसारो हाथन से करके बताओ, कि प्रभु ने मोय की तरहां जेलखाने से बायरें काड़ो, फिन ऊ ने कई, याकूब और भाईयन हां जौ बता दईयो, तब बो उते से कड़ के कोई दूसरी जांगह निंग गओ।

¹⁸ भुनसारौ भए सिपाहियन में खलबली मच गई, की पतरस कौ का भओ।

¹⁹ हेरोदेस ने जब ऊ की बहुत खोज करी, और ऊहां नईं पाओ; तो ऊ ने पहिरेदारन की खबर लई और हुकम दओ कि उनहां लै जाके मार डालें: और बो यहूदिया से कैसरिया में जाके रहन लगो।

²⁰ बो सूर और सैदा के लोगन से बिलात गुस्‍सा हतो; बे एक मन होकें ऊके ऐंगर आए और राजमहल के हाकिम बलास्तुस हां मनाके मेल करबो चाहो; कायसे राजा के देस से उन के देस की रोटी चलत हती।

²¹ ठहराए गए दिना हेरोदेस राजसी उन्ना पहिन के गद्दी पे बैठो; और उनहां कैन लगो।

²² और लोग बाग चिल्लात रए, जा तो मान्स की बोली नईं ईश्वर की बोली आय।

²³ ओई बेरा प्रभु के एक दूत ने ऊहां मारो, कायसे ऊ ने परमेसुर हां महिमा नईं दई, ऊके सरीर में कीड़ा पड़ गए और ऊ ने दम तोड़ दओ।

²⁴ पर परमेसुर कौ बोल बढ़त और फैलत गओ।

²⁵ बरनाबास और शाऊ ल जब अपनो काज पूरो कर चुके, तो यरूशलेम से लौटे, और अपने संग्गै यूहन्ना हां सोई, जौन मरकुस कहात आय लेत आए।