- प्रेरितन के काम 10 - Bundeli Holy Bible

¹ कैसरिया में कुरनेलियुस नाओं कौ एक मान्स हतो, जौन इतालियानी नाओं की पलटन कौ सूबेदार हतो।

² ऊ भक्त हतो, और अपने सबरे घराने सुदा परमेसुर से डरात हतो, और यहूदी मान्सन हां कुल्ल दान देत, और बिरोबर परमेसुर से बिन्तवाई करत हतो।

³ ऊ ने दिन के तीसरे पहर दर्शन में साफ साफ तको, कि परमेसुर कौ एक सरगदूत ऊके ऐंगर आओ और कैन लगो; हे कुरनेलियुस।

⁴ ऊ ने ऊहां ऐन जोर लगा के तको; और डर के कओ; हे पिरभु का आय? ऊ ने कओ, तोरी बिन्तवाई और दान सुमरण के लाने परमेसुर के आंगू पोंचे आंय।

⁵ और अब याफा हां मान्स पठै के शमौन हां जौन पतरस कहात आय, बुलवा ले।

⁶ बो शमौन चमड़े के धन्धा करबेवारे के इते पाहुन आय, जी कौ समुन्दर के कगार पे घर आय।

⁷ जब बो सरगदूत, जीने ऊसे बातें क ईं हतीं चलो गओ, तो ऊ ने दो सेवक, जौन ऊ लौ हाजिर रैत हते, उन में से एक भक्त सिपाई हां बुलाओ।

⁸ और उन हां सबरी बातें समझा के याफा हां पठै दओ।

⁹ दूसरे दिना, जब बे निंगत निंगत नगर के ऐंगर पोंचे, तो दोपहर के ऐंगर पतरस छत पे बिन्तवाई करबे हां चढ़ो।

¹⁰ ऊहां भूख लगी, और कछु खाबे की चाहना हती; पर जब बे औरें तईयारी कर रए हते, तो ऊ गैर होस हो गओ।

¹¹ और ऊ ने तको, कि आकास खुल गओ; और एक बस्त, बड़ी चादरा की घांई चारों खूटों से लटको भओ, धरती कुदाऊं उतर रओ आय।

¹² जी में धरती के सब भांत के चौपाए और रेंगबेवारे जन्तु और आकास के पन्छी हते।

¹³ ऊहां एक ऐसो बोल सुन पड़ो, हे पतरस उठ, मार और खा।

¹⁴ पर पतरस ने कओ, नईं पिरभु, कभऊं नईं; कायसे कि मैंने कभऊं कौनऊ अपवित्र या अशुद्ध बस्त नईं खाई आय।

¹⁵ और दूजी बेर ऊहां बोल फिन सुनाई दओ, जो कछु परमेसुर ने शुद्ध ठैराओ आय, ऊहां तें अशुद्ध न कै।

¹⁶ तीन बेर ऐसई भओ; तब तुरतऊं ऊ पात्र आकास पे उठा लओ गओ।

¹⁷ जब पतरस अपने हिये में दुबधा कर रओ हतो, कि जो दर्शन मैंने तको आय, बो का हो सकत आय? तो तको, बे मान्स जिन हां कुरनेलियुस ने पठैओ हतो, शमौन के घर कौ पता लगा दोरे पे आ ठांड़े भए।

¹⁸ और टेर के पूंछन लगे, का शमौन जौन पतरस कहात आय, इतईं पाहुन आय?

¹⁹ पतरस तो ऊ दर्शन पे सोचई रओ हतो, कि आत्मा ने ऊसे कओ, तक, तीन मान्स तोरी खोज में आंय।

²⁰ अब उठ के नीचे जा, और बिना सक संका उन के संग्गै चलो जा; कायसे मैंने उन हां पठैओ आय।

²¹ तब पतरस ने उतर के उन मान्सन से कओ; तको, जीऐ तुम खोज रए आव, बो मैं आंव; तुमाए आबे कौ का कारण आय।

²² उन ने उत्तर दओ; कुरनेलियुस सूबेदार जौन धरमी और परमेसुर से डराबेवारो आय और सबरी यहूदी जात में सुनाम मान्स आय, ऊ ने पवित्तर सरगदूत से जौ हुकम पाओ आय, कि तोय अपने घर बुला के तोसे बचन सुने।

²³ तब पतरस ने उन हां भीतर बुला के उन की पहुनाई करी। दूसरे दिना, बो उन के संग्गै गओ; और याफा के बिसवासी जन में से कछु उन के संग्गै हो लए।

²⁴ दूसरे दिना बे कैसरिया पोंचे, और कुरनेलियुस अपने घर वारन और प्यारे दोस्तों हां जोड़ के उन की बाट जोह रओ हतो।

²⁵ जब पतरस भीतर आ रओ हतो, तो कुरनेलियुस ने पतरस से भेंट करी, और ऊके गोड़न पे गिर के ऊहां परनाम करो।

²⁶ पर पतरस ने उए उठा के कओ, ठांड़ो हो, मैं सोई मान्स आंव।

²⁷ और ऊके संग्गै बतयात भओ भीतर गओ, और बिलात जन हां जुड़े देख के।

²⁸ उनसे कओ, तुम जानत आव, कि दूसरी जात वारन की संगत करबो या उन के इते जाबो यहूदी के लाने अधर्म आय, पर परमेसुर ने मोय बताओ आय, कि कोई मान्स हां अपवित्र या अशुद्ध न कहों।

²⁹ ई लाने जब मैं बुलाओ गओ; तो बिना कछु कए चलो आओ: अब मैं पूंछत आंव कि मोय की लाने बुलाओ गओ आय?

³⁰ कुरनेलियुस ने कओ; ऐई घड़ी पूरे चार दिना भए, मैं अपने घर में तीसरे पहर बिन्तवाई कर रओ हतो; तो तको, एक मान्स चमकीलो उन्ना पैरें भए, मोरे आंगू आ ठांड़ो भओ।

³¹ और कैन लगो; हे कुरनेलियुस तोरी बिन्तवाई सुन लई गई आय, और तोरे दान परमेसुर के सामूं सुमरण करे गए आंय।

³² ई लाने कोऊहां याफा पठै के शमौन हां जौन पतरस कहात आय, बुला ले, बो समुन्दर के कगारें शमौन चमड़े के धन्धा करबेवारे के इते पाहुन आय।

³³ तब मैंने तुरतऊं तोरे लौ मान्स पठैओ, और तेंने भला करो, कि तें आ गओ: अब हम सबरे इते परमेसुर के सामूं आंय, जीसे जौन कछु परमेसुर ने तोसें कओ आय बो सुनें।

³⁴ तब पतरस ने कओ; अब मोय पूरो पक्को भओ आय कि परमेसुर कोऊ की तरफदारी नईं करत।

³⁵ जाने कै हर जाति में जौन ऊसे डरत और धरम के काम करत आय, बो ऊ ए साजो लगत आय।

³⁶ जौन सन्देसो ऊ ने इस्राएलियन के ऐंगर पठैओ, जब ऊ ने यीशु मसीह के द्वारा (जौन सबई कौ पिरभु आय) सान्ति कौ भलो सन्देसो सुनाओ।

³⁷ बो सन्देसो तुम जानत आव जौन यूहन्ना के बपतिस्मा के परचार के पाछें गलील से शुरू होकें सबरे यहूदिया में फैल गओ।

³⁸ परमेसुर ने कौन भांत से यीशु नासरी हां पवित्तर आत्मा और सामर्थ से भर दओ: बो भलाई करत, और सब हां जौन शैतान छलिया के सताए भए हते, साजो करत फिरो; कायसे परमसुर ऊके संग्गै हतो।

³⁹ हम उन सबरे कामन के गवाय आंय; जौन ऊ ने यहूदिया के परगना और यरूशलेम में सोई करे, और उन ने ऊहां काठ के क्रूस पे लटका के मार डालो।

⁴⁰ ऊहां परमेसुर ने तीसरे दिना जिला दओ, और उजागर सोई कर दओ आय।

⁴¹ सबरे मान्सन पे नईं पर उन गवाहों पै जिन हां परमेसुर ने पेंला से नबेर लओ हतो, जाने कि हम पे जिन ने ऊके संग्गै ऊके जी उठबे के पाछें खाओ पियो।

⁴² और ऊ ने हम हां हुकम करो, कि मान्सन में परचार करो; और गवाय दो, कि बो ओई आय; जीहां परमेसुर ने जीयत भए और मरे भयन कौ न्यायी ठहराओ आय।

⁴³ ऊ की सबरे अगमबानी कैबेवारे गवाय देत आंय, कि जो कोई ऊ पै बिसवास कर है, ऊहां ऊके नाओं से पापन की छिमा मिल है।

⁴⁴ पतरस जे बातें कर ही रओ हतो, कि पवित्तर आत्मा बचन के सबरे सुनबेवारन पे उतर आओ।

⁴⁵ और जितने खतना करे भए बिसवासी पतरस के संग्गै आए हते, बे सब चकरया ग ए कि दूसरी जातवारन पे सोई पवित्तर आत्मा कौ दान उण्डेलो गओ आय।

⁴⁶ कायसे उन ने उन हां भांत भांत की भाषा बोलत और परमेसुर की बड़ाई करत सुनो।

⁴⁷ ई पे पतरस ने कओ; का कोई पानू हां रोक सकत आय, कि बे बपतिस्मा न पाएं, जिन ने हमाए घांई पवित्तर आत्मा पाओ आय?

⁴⁸ और ऊ ने हुकम दओ की उन हां यीशु मसीह के नाओं से बपतिस्मा दओ जाबै: तब उन ने ऊसे बिन्तवाई करी कि बो कछु दिना और उन के संग्गै बनो रए।