- 2 तीमुथियुस 4 - Bundeli Holy Bible

¹ परमेसुर और यीशु मसीह के सामूं जौन जीयत और मरे जनों कौ न्याव कर है, जब बे फिन के परगट हुईयें, और अपनो धरम को राज जमै हैं जौ सोच के तोहां चिताए देत आंव।

² कि तें बचन के परचार के लाने तईयार रै; और सबरी बातन में धीरज से सै, और मान्सन हां सिखा और दपट और समझा दे।

³ कायसे ऐसे दिना आहें, कि मान्स सच्ची बात न मान हैं, परन्त जौन बातें सुनबे में मजा आबै और अपनी अभलाखा जैसो कैबेवारो जोड़ लै है।

⁴ और सांची बातन से फिरके कहानी किस्सा पै मन लगा है।

⁵ परन्त तें सबरी बातन में होसयार रै, दुख उठाबे हां तईयार रै, और सुसमाचार सुनात जा और जौन काज तोहां दओ आय ऊहां पूरो कर।

⁶ कायसे अब मैं बलदान होबेवारो आंव, और मोरे ई संसार से जाबे को टेम हो गओ आय।

⁷ मैंने अच्छी कुस्ती लड़ी आय मानो मैंने अपनी दौड़ पूरी कर लई आय, और अपने बिसवास में पक्को बनो रओ आंव।

⁸ आगे परमेसुर जौन सांचे आंय मोरे काजें धरम को मुकुट धरें आंय, जौन मोहां दै हैं और मोहां नईं, परन्त उन हां सोई दै हैं, जौन उनके फिन के आबे की प्रेम से बाट तकें आंय।

⁹ मुद्दई मों लौ आईये।

¹⁰ कायसे देमास ने ई संसार के मोह जाल में पड़ के मोहां छोड़ दओ आय, और थिस्सलुनीके हां चलो गओ आय, और क्रेसकेंस गलतिया हां और तीतुस दलमतिया हां चलो गओ आय।

¹¹ लूका मोरे संग्गै बनो आय: मरकुस हां संग्गै लैके मो लौ चलो आ; कायसे सेवा के काज में ऊ बड़े काम को आय।

¹² तुखिकुस हां मैंने इफिसुस पठैव आय।

¹³ जौन बागा में त्रोआस में करपुस लौ छोड़ आओ हतो, जब तें आहै, तो ऊहां और जौन किताबें खास करके चर्मपत्रों हां लेत अईये।

¹⁴ सिकन्दर ठठेरे ने मोरे संग्गै बुरओ करो आय, परमेसुर ऊहां ऊकी करनी को फल दै है।

¹⁵ तें सोई ऊसे संभल के रईयो, कायसे ऊने हमाई बातन को बिरोध करो आय।

¹⁶ मैंने जब पैलो जवाब दओ तो कोनऊं ने मोरो साथ नईं दओ, सब ने मोहां छोड़ दओ हतो: परमेसुर करै कि ऊहां इन सबरी बातन को लेखो न दैबे पड़े।

¹⁷ प्रभु ने मोरी सहायता करी, और मोहां हिम्मत दई: कि मैं सबरे हार प्रचार करों, की सबरे जनें सुन लेबें; मैं तो मानो नाहर के मों से छूट आओ।

¹⁸ मोहां भरोसा आय कि प्रभु मोहां बुरई बातन से बचा है, और मोरो तरन तारन करके मोहां अपने सरग धाम में लै जै है: उनईं की जय होबै। आमीन।

¹⁹ प्रिसका और अक्विला, और उनेसिफुरुस के घर वारन हां नमस्कार कईये।

²⁰ इरास्तुस कुरिन्थुस में रै गओ, और त्रुफिमुस हां मैं मीलेतुस में बिमार छोड़ आओ।

²¹ जाड़े के दिना से पेंला चलो अईये: यूबूलुस, और पूदेंस, लीनुस और क्लोदिया, और सबरन हां नमस्कार कईये।

²² प्रभु तोरे आत्मा हां बल देबे: तुम पै किरपा बनी रैबे।