- 2 तीमुथियुस 2 - Bundeli Holy Bible

¹ मोरे बेटा, यीशु मसीह की दया से पक्को होत जा।

² जौन बातें तेंने बिलात जनन के सामूं मोय से सुनी आंय, उन हां दूसरे बिसवास करबेवारन हां सुना दे; जौन औरन हां बेई बातें सिखाबें।

³ यीशु मसीह के अच्छे सिपाही घांई मोरे संग्गै दुख उठाबे हां तईयार हो।

⁴ जब कोई सिपाही लड़ाई में जात आय, तो जीने ऊहां भरती करो आय, ऊहां खुस करबे हां अपने मन हां संसार की बातन से दूर धरत आय।

⁵ अखाड़े में लड़बेवारो पहलवान अच्छे से नईं लड़त तो इनाम नईं मिलत।

⁶ जौन किसान मेहनत करत आय ऊको फल ऊहां मिलत आय।

⁷ मोरी बातन पै ध्यान धर, और पिरभू तोहां सबरी बातन की समझ दै है।

⁸ यीशु मसीह पे ध्यान धरै रै, जौन दाऊद के घर से भओ, और मरे भयन में से जी उठो; जेई बातें तो मैंने तुम हां सुनाई हतीं।

⁹ उनईं बातन पै मैं बुरय मान्सन जैसो दुख उठा रओ आंव, इते लौ कि जेहल में आंव; परन्त परमेसुर कौ बचन खुलो आय।

¹⁰ मैं बिसवास धरबेवारन के लाने सब सह रओ कि बे यीशु मसीह में तरन तारन पाबें।

¹¹ सांची बात जा आय, कि यदि हम उनके संग्गै मानो मर गए आंय तो उनके संग्गै जी जै हैं।

¹² और हम धीरज धरें, तो उनके संग्गै राज सोई कर हैं: हम उन हां मान न दै हैं तो बे हमाओ मान सोई न कर हैं।

¹³ हम बिसवास न धरें परन्त बो बिसवास धरें रैत आय, कायसे बे अपनी कई नईं टाल सकत।

¹⁴ इन बातन हां उन हां बतात रै, और प्रभु के सामूं चितात रै, कि बहस न करें, ऊसे कछु नईं बनत; परन्त मान्स बिलुर जात आय।

¹⁵ ऐसे कय कर, कि परमेसुर खुस होबें और ऐसे काम करो जीसे आगे हां न लजाओ, और उनके सब बचनन हां अच्छे से मानो।

¹⁶ गन्दे बतकाव से दूर बनो रै; कायसे ऐसे जनें जो बुरओ बोलत हैं सो परमेसुर से और दूर होत जात आंय।

¹⁷ उनकी बातें मानो सड़े घाव जैसे बढ़त जै है: हुमिनयुस और फिलेतुस उनईं में से आय।

¹⁸ जौन जौ कैत आंय कि मरे भए जी उठे आंय बे सांची बातन हां नईं मानत, और कित्तई उन के बिसवास हां बिलोर देत आंय।

¹⁹ परन्त परमेसुर की बातें जीमें नीं जैसी बैठ गई आंय, उन पै ऐसी छाप लगी आय कि परमेसुर उन हां चीनत आंय; जो कोनऊं परमेसुर को नाओं जपत आय, बो अधरम से बचो रै है।

²⁰ बड़े लोगन के घर में सोने-चांदी केई बासन नईं, परन्त माटी और लकड़िया के बासन सोई होत आंय; कोऊ को आदर धरो जात आय, और कोनऊं को नईं।

²¹ जौन कोनऊं अपने हां इन बचनन से साजो राख है, तो ऊको आदर हुईये; और बो जनो मालक के काम आहै, और भले कामन में लगो रै है।

²² जवानी की अभलाखा से दूर बनो रै; और जौन साजे मन से पिरभु हां मानत आंय, उनके संग्गै धरम और प्रेम से चलो, और दूसरे जनन से मिले रओ।

²³ मूरख और अनपढ़ मान्सन की बातन से दूर रओ; कायसे तें जानत आय, कि ऐसी बातन से झगड़ा होत आंय।

²⁴ प्रभु के दास हां झगड़ा करबेवारो नईं भओ चईये, परन्त सबरन के संग्गै मीठो बोलबेवारो, और सबरी बातन में होसयार और दूसरन की बात सैबेवारो होबै।

²⁵ जौन जनें बिरोध करें उन हां धीरज से समझा दो, का पता कि परमेसुर उनको मन बदल देबे, कि बे सोई इन सांची बातन हां मानें।

²⁶ और उनकी अग्या मानबे हां तईयार रैके शैतान छलिया के जाल से छूट जाबें।