- 2 तीमुथियुस 1 - Bundeli Holy Bible

¹ पौलुस ने लिखी जीने यीशु मसीह पै बैकुण्ठ के लाने बिसवास करो और जौन परमेसुर की मरजी से यीशु मसीह के प्रेरित आंय।

² प्यारे बेटा तीमुथियुस हां लिखी। परमेसुर पिता और हमाए प्रभु यीशु मसीह में तुमें दया और सान्ति मिलत रए।

³ मैं अपने परमेसुर की सेवा अपने बड़े बूढ़न की रीत से साजे विवेक से करत आंव, और उनकी दया से तुमाए काजें बिन्तवारी करत आंव।

⁴ और तेंने जौन मन से सेवा करी आय, ऊकी याद रात दिना करत आंव और मोरो मन भरो आय।

⁵ मोहां याद आत आय, कि तोरी नानी लोइस, और तोरी मताई योनीके अपने बिसवास में पक्के हते, और मोहां पता आय, कि तें सोई उन जैसो आय।

⁶ ऐई से मैं तोहां सोई कैत आंव, कि जौन बरदान तोहां मोरे हाथ धरे से मिलो आय ऊहां और उजयार दे।

⁷ हम हां डरने नईंयां, कायसे परमेसुर ने हम हां प्रेम और बस भर काम करबे को भय दओ आय।

⁸ सो परमेसुर की गवाही से, और मोरे से जो उनके नाओं से जेहल में आंव, लजाईयो न, परन्त मोरे संग्गै सेवा में दुख उठाबे हां तईयार रै।

⁹ जीने हमाओ तरन तारन करो, और हम हां अपनौ बना लओ, जौ हमाए पुण्य के कामन से नईंयां; परन्त परमेसुर की दया से भओ आय।

¹⁰ जब से प्रभु यीशु मसीह हमाए हिये में आय तो मानो उजयारो हो आओ, जीने मृत्यु हां खतम करो, और हम हां हमेसा हां बैकुण्डवास पहुंचबे को ज्ञान दओ।

¹¹ ऐई बचन को मैंने परचार करो और उनको भेजो, और सबरे हार उपदेस करो।

¹² ऐई से मैं जे दुख उठा रओ आंव, और लजात नईंयां, कायसे मैंने जिन पै बिसवास धरो आय उन हां जानत आंव; और मोहां पक्को आय, कि जौन जीवन मैंने उन हां दे दओ आय ऊहां साजो धरे रै हैं।

¹³ जौन खरी बातें तेंने मोसे सुनी आंय उन हां पक्को मान के प्रेम से यीशु मसीह की बातन हां मानत जा।

¹⁴ पवित्रात्मा जौन हमाए हिये में बल देत आय, जौन काम उन ने दओ आय ऊहां सुतारो धरे रै।

¹⁵ तोहां पता आय, कि आसियावारे सबरे जनें मोसे फिर गए आंय, जैसे फूगिलुस और हिरमुगिनेस।

¹⁶ उनेसिफुरुस के घर के जनन पे प्रभु दया करें, कायसे ऊने कई बेरा मोरे हिये हां मानो ठण्डो करो, और मैं जेहल में आंव ईसे नईं सरमाओ।

¹⁷ परन्त जब बो रोम नगर आओ, तो मुसकल से ढूढ़त भओ मोहां मिलबे आओ।

¹⁸ (प्रभु ऊपे अपनी दया बनाए रखे) जौन जौन काज ऊनें इफिसुस में करे उनकी सोई तोहां पता आय।