- 2 थिस्सलुनीकियों 3 - Bundeli Holy Bible

¹ सो भईया हरौ, हमाए काजें सोई बिन्तवारी करो, कि पिरभू को बचन ऐसो झट्टई फैल जाबै, और बचन हां मान मिले, जैसे तुमाए बीच मिलो आय।

² और हम टेढ़े और बुरय मान्सन से बचे रएं, कायसे जे मान्स बिसवास धरबेवारे नईंयां।

³ परन्त पिरभू सांचे आंय; बे तुम हां पक्को बनाए राख हैं: और तुम हां ऊ बुरय जनें से मानो शैतान छलिया से बचा है।

⁴ हम हां तुम पै भरोसा आय, कि जौन जौन अग्यां हम तुम हां देत आंय, उन हां तुम मानत आव, और आगे हां ऐसई मानत रै हौ।

⁵ अब तुमाए मन हां परमेसुर ने जौन प्रेम करो आय, और यीशु मसीह ने तुमाए लाने धीरत धरो ऊहां बनाए रएं।

⁶ भईया हरौ, हम पिरभू यीशु मसीह के नाओं से तुम हां अग्यां देत आंय; कि जो भईया बुरई चाल चले, और जौन सीख ऊ ने हम से पाई ऊहां नईं मानत, ऊसे बच के रओ।

⁷ तुम हां पता आय, कि तुम हां कैसे हमाई जैसी चाल चलने आय; कायसे हम तुमाए बीचां बुरई चाल नईं चलें।

⁸ और कोई की रोटी बिना पईसन के नईं खाई, परन्त रात दिना मैनत से अपनो धन्धो करत हते, कि तुम में से कोई पे बोझो न होबै।

⁹ ऐसो नईंयां, कि हम ऐसो नईं कर सकत हते; परन्त हम ने तुमाए लाने सीख धरी, कि तुम सोई हमाए जैसो करो।

¹⁰ और जब हम तुमाए लौ हते, तो जा सीख तुम हां दई हती, कि कोई जनो काम न करो चाहे, तो ऊहां खैबे न दईयो।

¹¹ हम ने सुनो आय, कि तुमाए बीच कित्तई मान्स बुरई चाल चलत आंय; और कछु काम नईं करत, परन्त दूसरन के कामन में अड़ंगा डालत आंय।

¹² ऐसे मान्सन हां हम पिरभू यीशु मसीह के नाओं से सलाह देत आंय, कि बे चिमाने अपनो काम धन्धा करें, और कमा के अपनी रोटी खाबें।

¹³ परन्त भईया हरौ, तुम दूसरन की मदद करबे में हिम्मत न हारियो।

¹⁴ कोऊ जनें हमाई चिठिया में लिखी बात न माने, तो उन पै खास नजर रखियो; और उनकी संगत न करियो, कि उन हां लाज आबे।

¹⁵ ऐसे मान्स हां अपनो बैरी न मानियो, परन्त ऊहां आपनो भईया सोच के समझात रईयो।

¹⁶ अब पिरभू जौन सान्ति दैबेवारे आंय खुद तुम हां सबरी बातन में सान्ति दैबे: पिरभू तुमाए संग्गै रैबें।

¹⁷ मैं पौलुस अपने हाथ से नमस्कार लिख रओ आंव: हर एक चिठिया में जा मोरी चिन्हानी आय: मैं ऐसई लिखत आंव।

¹⁸ हमाए पिरभू यीशु मसीह की किरपा तुम सबरन पै बनी रैबे।