- 2 थिस्सलुनीकियों 2 - Bundeli Holy Bible

¹ भईया हरौ, हमाए पिरभू यीशु मसीह के आबे, और अपन सबको उन लौ इकठ्ठे होबे के काजें बिन्तवारी करत आंय।

² कि तुम हलकी सी अगमवानी की बात से उखड़ न जईयो, और कोऊ चिठिया जौन हमाई ओर से होबै, जा समझिओ कि पिरभू के आबे को दिना आ चुको आय।

³ कोऊ तरहां से कोई के धोखा में न आईयो, कायसे बो दिना जब लौ न आहै, जब लौ धरम धरती पै से न उठ जाबै, और पाप और अन्त, जानो शैतान छलिया न दिखाबे।

⁴ जौन बिरोध करत आंय, उन हां जौन परमेसुर के मानबेवारे आंय, और अपने आप हां बड़ो कैत आंय, इते लौ कि बो परमेसुर के मन्दर में बैठ के अपने आप हां परमेसुर कैत आय।

⁵ तुम हां ध्यान आय कि जब मैं तुमाए बीच हतो तो तुम से ऐसई बातें कैत हतो।

⁶ अब तुम हां पता आय, कि कौन ऊहां छैकें आय, कि बो अपनी बेरा में दिखै।

⁷ कायसे गड़बड़ी मन को छुपाके करबेवारो अबै लगो आय, परन्त अबै एक छेंकबेवारो आय, और जब लौ बो अलग न हो जाबै, बो ऊहां रोके रै है।

⁸ जब बो अधरम करबेवारे आहें, तो पिरभू यीशु मसीह अपनी मों की फूंक से मार डाल है, और अपने आबे के तेज से भसम कर डाल है।

⁹ और ऊ अधरमी को आबो शैतान के कामन जैसो हुईये, बो झूठे बल से और अजूबा काम करत दिख है।

¹⁰ और सब परकार के अधरम के संग्गै सब तरहां की धोखाबाजी से हुईये; कायसे उन ने सांची बातन और प्रेम हां नई मानो कि उनको तरन तारन हो जातो।

¹¹ ऐई से परमेसुर उन के बीच भटका देबेवारी आत्मा डाल है, कि बे झूठी बातन हां मानें।

¹² और जितने जनें सांचे हां नईं मानत, परन्त अधरम की बातन हां चाहत आंय, उन हां दण्ड दै है।

¹³ भईया हरौ, पिरभू के प्यारो हम हां चईये कि हम विशेषकर तुमाए लाने पिरभू को धन्न मानें, कि परमेसुर ने तुम हां पेंला से नबेरो; कि आत्मा से पवित्तर करके, और जौन सांची बातें तुम हां बताई गईं उनसे तुमाओ तरन तारन होबै।

¹⁴ उन ने तुम हां हमाए बचन सुनाबे से अपने लौ बुलाओ, कि तुम हमाए पिरभू यीशु मसीह, बो जौन मान सम्मान दओ गओ आय ऊ में हम सोई जुड़ जाबें।

¹⁵ सो भईया हरौ, पक्के बने रओ; अब जौन बातें तुम हां सुनाई गईं हतीं, और जौन बातें हमाई चिठिया से सीखीं, उन हां पकड़े रओ।

¹⁶ और हमाओ पिरभू यीशु मसीह और पिता परमेसुर जीने हम से प्रेम करो, और अपनी दया से ऐसी सान्ति जौन हमेसा रै है और बढ़िया आस दई आय।

¹⁷ बोई तुमाए मन हां सान्ति देबे, और तुम हां अच्छे काम करबे हां, और उनके कए बचन में पक्को करे।