- 2 पतरस 3 - Bundeli Holy Bible

¹ हे प्यारे भईया हरौ, अब मैं तुम हां दूसरी चिठिया लिख रओ आंव, मैं ने दोई चिठियन में सुमरन कराके तुमाए सुद्ध हिये हां उस्केरो आय।

² तुम उन बातन हां, जौन पवित्तर आगमवकतन ने पेंला से कई आंय और पिरभु, और तारन करबेवारे के ऊ हुकम हां सुमरन करो, जौन तुमाए चेलन के द्वारा दई गई हती।

³ और पेंला तुम जौ जान लेओ, कि अखीर के दिना में ठट्ठा उड़ाबेवारे आ हैं, जौन अपनी अभलाखा के अनसार चल हैं।

⁴ बे कै हैं, कि ऊके आबे कौ कौल कां गओ? कायसे जब से हमाए पुरखा मर गए, सबई कछु ऊं सई आय, जैसो संसार के शुरू से हतो?

⁵ बे ठेंकें जौ बिसर गए, कि परमेसुर के बचन के द्वारा आकास जुग जुग से बनो भओ और धरती सोई पानू में से बनी और पानू में रमी आय।

⁶ ऐई से ऊ जुग कौ संसार पानू में डूब के नास हो गओ।

⁷ पर अबै के आकास और धरती ओई बचन के द्वारा आगी में जलाए जाबे के लाने धरे गए आंय; बे बिन भक्तीवारे मान्सन के न्याय और नास के दिना लौ ऐसई धरे जै हैं।

⁸ हे प्यारे भईया हरौ, जा बात तुम से छिपी न रैबे कि पिरभु के इते एक दिना हजार बरसन बिरोबर आय, और हजार बरस एक दिना बिरोबर आय।

⁹ पिरभु अपने कौल के विषय में अबेर नईं करत, जैसो कि कितेक जनें समजत आंय; बो नईं चाहत कि कौनऊं मान्स नास होबे; परन्त जौ कि सबई हां हिया बदलबे कौ मौका मिले।

¹⁰ परन्त पिरभु कौ दिन भड़या घांई आ जै है, ऊ दिन आकास बड़ी हड़बड़ाहट की गरजन से जात रै है, सबरी चीजें बिलात तांती होकें पिघल जै हैं, धरती और ऊ पे के काम जल जें हैं।

¹¹ जब जे सबई बस्तें, ई भांत से नास होबेवारी आंय, तो तुम हां पवित्तर चालचलन और भक्ती में कैसो जीवन गुजारो चईये।

¹² परमेसुर के ऊ दिना की बाट तक के ऊके झट्टईं आबे के लाने कैसी कोसिस करो चईये? ऊ दिना आकास आगी से जल के नास हो जै है, और चीजें बस्तें बिलात तांती होकें पिघल जें हैं।

¹³ ऊके कौल अनसार हम एक नये आकास और धरती की बाट तकत आंय, जी में धारमिकता बास कर है।

¹⁴ ई लाने हे प्यारे भईया हरौ, जब कि तुम इन बातन की बाट तकत आव तो कोसिस करो, कि तुम सान्ति से ऊके सामूं बिना दाग और बिना लांछन ठैरो।

¹⁵ हमाए पिरभु यीशु के धीरज हां तारन समजो, जैसो हमाए प्यारे भईया पौलुस ने सोई ऊ समज के अनसार जौन ऊ ए मिली आय, तुम हां लिखो आय।

¹⁶ ऊ ने अपनी सबरी चिठियन में सोई इन बातन कौ बयान करो आय उन में कछु बातें ऐसी आंय, जिन कौ समजबौ कठन आय, मूरख और चंचल मान्स उन के मतलब को पवित्तर पोथी की और बातन की भांत ऐंचतान के अपने ई नास कौ काज बनात आंय।

¹⁷ ई लाने हे प्यारे भईया हरौ, तुम और पेंलई से इन बात हां जान के हुसयार रओ, कि अधरम जन की गलती में फंस के अपने पक्के बिसवास हां कऊं हिरा न दो।

¹⁸ परन्त हमाए पिरभु, और तारन करबेवारे यीशु मसीह के अनुग्रह और सान्ति में बढ़त जाओ।

¹⁹ ओई की मईमां अबै सोई होबै, और जुगानुजुग होत रैबे। आमीन।