- 2 यूहन्‍ना 1 - Bundeli Holy Bible

¹ मैं सियाने ने ऊ निबरी भई बईयरें और उनके लड़कावारन हां लिखो, जिन हां परमेसुर सांचो प्रेम धरत आय, ई लाने कि हम ने उनकी सांची बातन हां मानो आय, और उन हां पक्को पकड़ें आय, जौन बातें पक्की आंय।

² मैं अकेले नईं, पर सबरे जनें जौन इन सांची बातन हां मानत आंय बे सोई प्रेम धर हैं।

³ परमेसुर जौन पिता आय, और पिता के बेटा यीशु मसीह की तुम पे दया, किरपा, सान्ति, सत्त, और प्रेम हमाए संग्गै बने रै हैं।

⁴ मोहां बिलात साजो लगो, कि तुमाए लड़कावारे उन अग्यां हां, जौन पिता परमेसुर से मिली आय उन हां सांचे मन से मानत आंय।

⁵ अब हे बईयर, मैं कोई नई बात नईं कैत, परन्त बाई जौन पेंला से कई, ऐसो लिखत आंव; कि तुम एक दूजे से प्रेम धरो।

⁶ प्रेम ऐसो, कि उन ने जौन अग्यां दईं आय, उन हां जिन हां हम ने पेंला से जानो आय उन पै चलो।

⁷ कायसे बिलात जनें बिलोरबेवारे ऐसो कैत फिर रए, कि यीशु मसीह मान्स होकें नईं आए, ई धरती पे ऐसे जनें मसीह के बिरोधी आंय।

⁸ तुम चौकन्नें रओ; कायसे जौन काम हमने करो आय, ऊहां न बिलोरियो, जीसे ऊको पूरो मजा तुम हां मिले।

⁹ जौन आगे हां यीशु मसीह की सीख पै नईं चलत, मानो ऊ लौ परमेसुर नईंयां, परन्त जौन उनकी सीख पै चलत आंय, बौ मानो परमेसुर पिता और उनके बेटा यीशु मसीह में पक्को बनो रैत आय।

¹⁰ कोई तुम लौ आबै, और जा सीख न देबे, तो ऊहां अपने घर में न आन दईयो, और न नमस्कार करियो।

¹¹ कायसे जौन ऐसे मान्स हां नमस्कार करत आय, बो मानो ऊके बुरे करमन में मिलो आय।

¹² मोय तुम हां और बिलात बातें लिखबे हां आंय, परन्त कागज और सियाही से नईं लिखो चाहत; मोरी मन्सा आय, कि तुम लौ आओं और आमूं सामूं बतकाओ करों, जीसे मोरो और तुमाओ मन भरै।

¹³ ई मण्डली के जनें तुम हां नमस्कार कैत आंय।