- दूसरी कुरिन्थियों 8 - Bundeli Holy Bible

¹ अब भईया हरौ, हम तुम हां परमेसुर की दया की बातें सुनात आंय, जौन मकिदुनिया की मंडलियन पै भओ।

² कै तंगी में से कड़ के उन हां बड़ो आनन्द मिलो, और गरीबी बढ़बे पे उन ने और खुल के दओ।

³ उन के लाने मैं जौ कहो चाहत आंव, कि उन ने अपने बस भर और ऊसे अतकारो दओ।

⁴ और ई दान के लाने और पवित्तर लोगन की सेवा को जौन मौका मिले, ऊके काजें हम से बेर बेर बिन्तवारी करी।

⁵ जैसी हमाई आसा हती, ऊं सई नईं, पै उन ने पिरभू हां, और फिन परमेसुर की मरजी से अपनो सब कछु हमें दे दओ।

⁶ ईसे हम ने तीतुस हां समझाओ, कि जैसो ऊ ने पेंला करो, ऊं सई तुमाए बीच ई दान को काम सोई पूरो कर डालें।

⁷ सो एक एक बातन में जैसे बिसवास, बचन, ज्ञान और सब कोसिस में, और प्रेम में, जौन हम से घटे होबें, ऊ में ब ढ़त जाओ, ऊं सई ई दान के काम में सोई आगे रओ।

⁸ मैं ऊ अग्यां तो नईं करत, अकेले दूसरन की खुसी से तुमाओ प्रेम सांचो आय जौ परखबे को कैत आंव।

⁹ तुम हमाए पिरभू यीशु की दया जानत आव, कि बे धनी होकें तुमाए लाने कंगाल बने कि उनके कंगाल होबे से हम धनी हो जाबें।

¹⁰ ई बात में मोरी जा मंसा आय, कायसे ऐसो तुमाए काजें नोंनो आय; जौन तुम ने एक बरस लौ ई काज करबे में, अकेले ई बात के चाहबे में आगे रहे।

¹¹ ईसे अब जौ काज पूरो करो, जैसी तुमाई मरजी आय, अपनी पूंजी लगा के ई काज हां पूरो कर डालो।

¹² कायसे मन से दान दओ जाबे तो बो ग्रहण होत आय, जौन उन लौ आय अकेले ऊसे जौन उन लौ नईंयां।

¹³ ऐसो नईंयां, कि दूसरन हां मजा मिले और तुम हां परेसानी।

¹⁴ अकेले बरोबरी से होबे की तुमाओ भरो पूरो रैबौ उनकी घटी में काम आबै, कि उनको भरो पूरो होबे से तुमाई घटी में काम आबे, कि बरोबरी हो जाबै।

¹⁵ जैसो लिखो आय, जीनें बिलात बटोरो ऊ को कछु जादा नईं कड़ो, और जी ने थोड़ो सो बटोरो ऊ को कम नईं कड़ो।

¹⁶ परमेसुर कौ धन्न होबे, जिन ने ओई मन्सा तीतुस के मन में सोई भर दई।

¹⁷ और बे हमाए समझाबे में आ गए और बड़े हुलास से बो तुमाए बीच गए आएं।

¹⁸ हम ने ऊके संग्गै एक भईया हां पठैव आय, जी को नाओं बचन की सेवा में सब मंडलियन में जानो भओ आय।

¹⁹ इतनो नईं, मण्डली ने सोई सोचो कि दान के काम में बो हमाए संग्गै जाबे, सो हम जा सेवा ईसे करत आंय, कि पिरभू को मान बढ़े और हमाए मन को राजी होबो पता हो जाबे।

²⁰ हम ईसे चौकस रैत आंय, कि जो दया के काम में हम लगे आंय, कोई हम पे दोष न लगा पाबे।

²¹ कायसे जौन बातें पिरभू लौ नईं, अकेले सबरन लौ अच्छी लगत आंय हम उनईं के लाने सोचत आंय।

²² हम ने ऊके संग्गै अपने भईयन हां पठैव आय, जीहां हम ने बेर बेर जांचो और अच्छो पाओ; अकेले ऊ को भरोसा तुम पे बिलात आय, और एईसे बो और खुस आय।

²³ कोऊ जनें तीतुस के लाने पूछे, तो बो मोरो संगी, और तुमाए लाने मोरे संग्गै काम करबेवारो आय, और हमाए भईयन के लाने पूछो, तो बे मण्डली के लोगन ने पठैव और परमेसुर के मान के लाने आंय।

²⁴ अपनो प्रेम और हम ने जौन बड़वाई तुमाए काजें करी मण्डलियन के सामूं इन बातन हां पक्को दिखाओ।