- दूसरी कुरिन्थियों 6 - Bundeli Holy Bible

¹ हम जौन उनके संग्गै काम करत आंय ऐसो समझात आंय, कि परमेसुर ने जौन दया तुमाए ऊ परै करी आय, ऊहां ऐसई न जानो।

² कायसे बे तो कैत आंय, कि मैंने खुसी की बेरा तुमाई सुन लई, और तुमाए तरन तारन के काजें तुमाई मदद करी: तको, अबई बो खुसी की बेरा आय; तको, अबै तरन तारन को दिन आय।

³ हम जो नईं चाहत कि कोई बात से तुमहां ठेस लगे, कि हम जानें सेवा करी ऊहां कोऊ बुरओ न कैबें।

⁴ अकेले एक एक बात में परमेसुर के चाकर जैसो अपनो अच्छो जीवन जीयत आंय, बड़े धीरज से, पिराते में, कंगाली में, परेसानी में।

⁵ कोड़ा खाए से, कैद होबे में, मान्सन ने जुड़ के परेसान करे से, बिलात मैनत से, जगत रैबे और उपास करबे से।

⁶ साजो रैके, ज्ञान से, धीरज धर के, दया करके, पवित्तर आत्मा से।

⁷ सांचे प्रेम से, सांचे बोल से, परमेसुर के बल से; धरम के हथियारन से जौन दांए, बांए हैं।

⁸ मान और अपमान से, बुरए नाओं और भले नाओं से, ऐसो लगत तो आय कि बुरई सलाह देत हो अकेले सांचे आंय।

⁹ मानो कोऊ जानत नईंयां; अकेले सब जानत आंय; मरत जैसे आंय और तको जीयत आंय; ठुकत पिटतवारे जैसे आंय अकेले जान से नईं मरत।

¹⁰ रोबेवारन जैसे आंय, अकेले खुस रैत आंय; कंगाल जैसे लगत, अकेले बिलात जन हां पईसावारे बना देत आंय, ऐसे दिखात मानों हमाए ऐंगर कछु नईंयां अकेले सब कछु धरो आय।

¹¹ हे कुरिन्थियों, हम ने तुमसे खुलके बतकाओ करो, और हमाओ मन तुमाए काजें खुलो आय।

¹² तुमाए काजें हमाए मन में कछु गांठ नईंयां, अकेले तुमाए मन में गांठ लगी आय।

¹³ अकेले अपने लरका बिटिया मानके तुमसे कैत आंव, तुम सोई अपनो मन खोल दो।

¹⁴ जौन बिसवासी नईंयां उनके संग्गै कोऊ समबन्ध न धरो, जैसे दो बैला संग्गै जोत दए जात आंय, कायसे धरमी को का मेल अधरमी से? और उजयारे और अंधयारे को का जोड़?

¹⁵ और मसीह को शैतान छलिया से का जोड़? और बिसवास करबेवारे को जौन बिसवास नईं करत उनसे का नातो?

¹⁶ और मूरतन को परमेसुर के मन्दर में का काज? कायसे हम जियत परमेसुर के मन्दर आंय; जैसो परमेसुर ने कहो आय कि उन में बस हों और उन में घूम हों; और मैं उन को परमेसुर और बे मोरे जनें कहा हैं।

¹⁷ ईसे पिरभू कैत आय, कि उनके बीच से कड़ जाओ और अलग रओ; तो मैं तुम हां ग्रहण कर हों।

¹⁸ और तुमाओ बाप हुईयों, और तुम मोरे बेटा बिटिया कहा हौ: जे महाबली पिरभू परमेसुर को बचन आय।