- दूसरी कुरिन्थियों 5 - Bundeli Holy Bible

¹ हम हां पता आय, कि जब हमाओ संसार पे को डेरा गिराओ जै है, तो हम हां परमेसुर से सरग में एक बड़ो घर मिल है, जौन हाथन को बनो नईं, अकेले हमेसा बनो रै है।

² ई में तो हम गुहार भरत, और जा आस धरत आंय; कि अपने सरग के घर हां पहन लेबें।

³ कि ऊहां पैरबे से हम उघारे नईं दिखाएं।

⁴ ई डेरा में रैत बुझवा से दबे गुहार देत रैत आंय; कायसे हम उतारबो नईं, अकेले धरे रैबो चाहत आंय, कि जौन मरबेवारो आय बो जीवन में मानो डूब जाबे।

⁵ जीनें हम हां ऐसो बनाओ आय बो परमेसुर आय, जीनें पेसगी में हम हां अपनो आत्मा दओ आय।

⁶ सो हम हिम्मत बांधे रैत आंय और ऐसो जानत आंय; कि जब लौ हम देह में रैत आंय, तो पिरभु से अलग आंय।

⁷ कायसे हम कोऊ रूप हां तक के नईं, अकेले बिसवास से चलत आंय।

⁸ ईसे हम हिम्मत बांधे रैत आंय, और देह हां छोड़ के पिरभू के संग्गै रैबे को मन बना लओ आय।

⁹ ईसे हमाए हिये की मनसा जा आय, कि चाए संग्गै रएं और चाए न्यारे रैबें, पिरभू हां अच्छे लगें।

¹⁰ कायसे हम सबरन की सबरी बातें मसीह जब न्याय करबे बैठ हैं तो खुल जै हैं, एक एक जनें अपने भले और बुरय कामन को इनाम जौन संसार में रैत करे आंय पाबें।

¹¹ सो पिरभू से डराके हम सबरन हां समझात आंय, कायसे हमाओ सबरो हाल परमेसुर हां पता आय; हमें ऐसी आस आय, कि हमाए हिये हां सोई पता आय।

¹² अकेले हम तुमाए सामूं अपनी बड़वाई नईं करत, अकेले जो बात आय तुम उनहां बड़ी सान से बताओ, जौन मन में तो नईं, अकेले दिखाबेवारी बातन हां मानता देत आंय।

¹³ हम मानो सुर्त बिसरे आंय, तो परमेसुर के काजें; और चित्त में आय, तो तुमाए काजें आंय।

¹⁴ कायसे मसीह को प्रेम हम हां बिवस कर देत आय; ईसे हम समझत आंय, कि एक जनों सबरन के काजें मरो तो सबरे मानो मर गए।

¹⁵ और बे ईसे सबरन के काजें मरे, कि जौन जीयत आंय, बे आगे हां अपने लाने न जीये अकेले उनके लाने जौन उनकी कोती मरो और फिन जी सोई गए।

¹⁶ सो अब से आगे हम कोऊहां संसार जैसो न मान हैं, और जैसे हम ने मसीह हां संसार घांई जानो हतो, आगे उन हां ऐसो न सोच हैं।

¹⁷ जो कोऊ मसीह से जुड़ गओ आय बो नओ हो गओ: पुरानी बातें चली गईं आंय, अब सबरो नओ दिखात आय।

¹⁸ सबरी बातें परमेसुर कुदाऊं से आंय, जीनें मसीह में होकें हमसे मेल कर लओ, और परमेसुर के संग्गै मान्स जुड़ जाबें जौ काज हम हां दओ।

¹⁹ जानो कि परमेसुर ने मसीह में अपनो मेल संसार के मान्सन से कर लओ, और उन के पापन की सजा उन हां नईं दई, और उनको जुड़ जाबो कैसे हो सकत, जौ बताबे कौ काज हमें दओ।

²⁰ सो हम परमेसुर के कोती उनके राजदूत आंय; और परमेसुर हम में होकें बिन्तवारी करत आय: कि परमेसुर से जुड़ जाओ।

²¹ जौन पाप जानत लौ न हते, उनईं के ऊ परै उन ने हमाए पाप डाल दए, कि उन से हम सबरे जनें परमेसुर के लाने धरमी हो जाबें।