- दूसरी कुरिन्थियों 4 - Bundeli Holy Bible

¹ सो जब हम पै ऐसी दया भई, कि ऐसो काज हम हां मिलो, तो हम हिम्मत नईं हारत।

² और हम ने बुरय कामन हां छोड़ दओ आय, और बनके नईं चलत, और न परमेसुर के बचन में कछु मिलात आंय, अकेले सांची बातें उजागर करत आंय, और परमेसुर हां जानत भए सबरन के हिये पै अपनी बात बैठा देत आंय।

³ अकेले हमाए परचार पै कछु परदा डलो आय, तो बो जौन नरक कुण्ड जाबेवारे आंय उन के लाने मानो डलो आय।

⁴ और जौन मान्सन ने बिसवास नईं करो, कायसे उन की बुद्धि हां ई संसार के ईसुर-शैतान छलिया ने अंधरया दओ आय, कि मसीह जौन परमेसुर आय, उनकी बातन को तेज उन पे अबै न पड़े।

⁵ कायसे हम अपने नईं, अकेले हम पिरभू यीशु को परचार करत आंय, कि बो पिरभू आय; अपने लाने तो हम कैत आंय, कि यीशु के कारण मानो तुमाए चाकर आंय।

⁶ कायसे परमेसुर ने कई, कि अंधियारे में जोत होबे; और ओई जोत हमाए हिये में चमकी, कि परमेसुर की जोत यीशु मसीह के मों पे हो चिमचिमानी।

⁷ अकेले हमाए लौ जा पूंजी माटी के घैलों में धरी आय, जौ बल हमाओ नईंया, परन्त परमेसुर को दओ आय।

⁸ हम चारऊं कोद से दुख भोग रय आंय, अकेले हमाओ बुरओ नईं होत; हम पे काम नईं बनत, अकेले मन टूटो नईंयां।

⁹ परेसान तो होत आंय; अकेले बिसराय नईं जात; पटके तो जात आंय, अकेले मिटत नईंयां।

¹⁰ हम यीशु मसीह के मरबे हां मानो अपनी देह में लय फिरत आंय; कि यीशु को दओ जीवन हमाई देह से उजागर होबे।

¹¹ कायसे हम जीयत यीशु के कारण मानो मरबे हां तईयार रैत आंय, कि यीशु को दओ जीवन हमाई मरबेवारी देह से उजागर होबे।

¹² सो मृत्यु हम पै असर करत आय और तुम पै जीवन।

¹³ ईसे कि हम में बाई बिसवास की आत्मा आय, (जीके लाने लिखो आय, कि मैंने बिसवास करो, ईसे में बोलो) हम सोई बिसवास करत आंय, ऐईसे बतात आंय।

¹⁴ कायसे हम हां पता आय, कि जीनें यीशु हां मरे भयन में से जिलाओ, ओई ऐसो जान के, कि हम यीशु के संग्गै आंय हम हां सोई जिला है, और तुमाए संग्गै अपने सामूं लिआ है।

¹⁵ कायसे सबरी बस्तें तुमाए लाने आंय, कि दया जौन बिलात जनों से होकें परमेसुर के मान के काजें धन्न सोई कहाबे।

¹⁶ ईसे हम हिम्मत नईं हारत; जैसे हमाओ सरीर टूटत जात आय; अकेले हमाए भीतर वालो रोजीना नओ होत जात आय।

¹⁷ कायसे हमाओ छिन भरे की परेसानी हमाए काजें खास मान देत आय।

¹⁸ हम तो जौन बस्तें दिखात आंय उनहां नईं अकेले जौन दिखात नईंयां उनहां तकत रैत आंय, कायसे जौन बस्तें दिखात आंय बे तनक दिना की आंय, अकेले जौन नईं दिखात बे बिरोबर बनी रै हैं।