- दूसरी कुरिन्थियों 3 - Bundeli Holy Bible

¹ का हम अपनी बड़वाई करन लगें? और का हम मनो सिफारिस की चिठिया बिलात जनों से लियाबें, और का तुम से लैबें?

² हमाई चिठिया तो तुमई आओ, जौन हमाए हिये में उतरी आय, और ऊहां सबरे जनें पढ़त और मानत आंय।

³ जौ सबरन हां पता आय, तुम मसीह की मानो चिठिया आओ, जीहां हम ने चाकर घांई लिखो आय; जा स्याही से नईं, अकेले जीयत परमेसुर की आत्मा से पथरन की पटिया में नईं, हिये की मांसवारी तखती में लिखो आय।

⁴ हम मसीह में होकें परमेसुर पे ऐसो ध्यान धरें आंय।

⁵ ऐसो नईंयां, कि हम ई लाक आंय, कि अपने हों कछु बातन हां सोचें; अकेले हम तो परमेसुर के कारण आय।

⁶ जिन ने हम हां नये नियम के चाकर लाक बनाओ, अक्षरन के चाकर नईं केबल आत्मा के चाकर; कायसे अक्षर तो मारत आय, पे आत्मा जिलात आय।

⁷ जैसे मत्यु को नेम जौन पथरन पै खोदे गए हते, इते लेओ जस पाओ, कि मूसा के मों पै की जोत जौन पेंला से घटत जात हती, इस्राएल के जनें उनके मों हेर न सकत हते।

⁸ तो आत्मा की नैम और उजरी काय न हुईये?

⁹ कायसे जब दोषी ठहराबे वाली नैम ऐसी उजरी हती, तो जौन नैम धरमी बनात आय बो और उजरी हुईये?

¹⁰ और जौन उजरो दिखात हतो, जौन ऊ उजयारे से तेज हतो, ऊके सामूं फीको पड़ गओ।

¹¹ कायसे जब बो जौन घटत जात हतो ऐसो उजरो दिखात हतो, तो बो जौन अटल रै है और उजरी हुईये।

¹² सो ऐसी आस लगाए हम हिम्मत धरें बोलत आंय।

¹³ और मूसा घांई नईं, जीनें अपनो मों ढापों हतो कि इस्राएली लोग ऊ घटबेवारी बस्त को अन्त कैसो हुईये न तकें।

¹⁴ अकेले इन की बुद्धि मारी गई, कायसे आज लौ पुराने नेम की बातन हां बांचत बेरा उन के हिये पे परदा जैसो लगो आय; अकेले मसीह में बो परदा उठ जात आय।

¹⁵ अबै जब मूसा की पोथी बांची जात आय, तो उन के हिये पे मानो परदा डलो आय।

¹⁶ अकेले जब उनको मन पिरभू कुदाऊं फिर जै है, तो बो परदा सोई उठ जै है।

¹⁷ पिरभू तो आत्मा आय: और जिते पिरभू की आत्मा आय उते सब छुट्टा होत आय।

¹⁸ अकेले हम सबरन के मों पे पिरभू को तेज ऐसो दिखात आय, जैसो आईना में, तो पिरभू जौन आत्मा आय, हम उनके तेज के रूप में हरय हरय बदलत जै हैं।