- दूसरी कुरिन्थियों 2 - Bundeli Holy Bible

¹ मैंने अपने जी में जौ पक्को कर लओ हतो कि फिन से तुम लौ दुखी होकें न आओं।

² कायसे मैं तुम हां दुखी करों, तो मोहां आनन्द दैबेवारों को हुईये, मानो ओई जी को मन मैंने तोड़ो होबे?

³ जा बात मैंने तुम हां ईसें लिखी, कि ऐसो न होबे, मैं जब आओं तो जिन से मोरो जी ठण्डो होबो चईये, उनई से मोरो जी टूटे; कायसे मैं जौ जानत आंव, कि जौन बात से मोरो जी ठण्डो होत, ओई तुमाओ सब कौ हाल आय।

⁴ बड़े पिराने में, और मन की चोट से, मैंने अंसुआ डाल डाल के तुम हां लिखो आय, ईसे नईं कि तुमाओ मन टूटे, अकेले जौ कि तुम ऊ बड़े प्रेम हां जानो, जौन मोहां तुम पे आय।

⁵ और कोऊ ने मोरो जी टोड़ो आय, तो मोहां अकेले नईं (कि उनके संग्गै कर्रो न पड़ों) तुम सबरन को कछु कछु जी टोड़ो आय।

⁶ ऐसे मान्स के काजें जौन सजा भईयन में से जितनन ने दई, बा मुतकी आय।

⁷ ईसे भलो आय कि ऊ मान्स की गलती छिमा करो; और सान्ति की बातें करो, ऐसो न होबे कि ऊ मान्स कौ हिया टूट जाबे।

⁸ ईसे मैं तुम से बिन्तबाई करत आंव, कि ऊ मान्स से प्रेम करत रओ।

⁹ मैंने तुम हां ईसे लिखो हतो, कि तुमाई जांच करों, कि तुम सबरी बातें मानबे हां राजी आंव, कि नईंयां।

¹⁰ जी को तुम कछु छिमा करत आंव ऊहां मैं सोई छिमा करत आंव, कायसे जो कछु मैंने छिमा करो आय, मानो करो आय, तो तुमाए काजें मसीह में हो छिमा करो आय।

¹¹ कि शैतान छलिया को हम पै दांव न चले, कायसे हम ऊ की बातें जानत आंय।

¹² जब मैं मसीह की बातें सुनात त्रोआस आओ, और पिरभु ने मोरे काजें एक द्वार खोलो।

¹³ तो मोरो मन ठण्डो न पड़ो, कायसे भईया तीतुस मोहां नईं मिलो; सो उनसे विदा लैके मैं मकिदुनिया कोदाऊं चलो गओ।

¹⁴ अकेले परमेसुर को धन्न मानत आंव, जौन मसीह में हम हां सबरी जीत देत आय, और अपनी बातन की बास हम में हो सबरी जांगा फैलत आय।

¹⁵ कायसे हम परमेसुर के लाने तरन तारन पाबेवारे, और नरककुण्ड जाबेवारे, दोई के काजें मसीह की सुगन्ध आंय।

¹⁶ कछु लोगन हां नरक के काजें मरबे की गन्ध, और कछु हां तरन तारन के काजें जीवन की सुगन्ध, इन बातन के लाने कौन आय?

¹⁷ कायसे हम बिलात जनों जैसे नईंयां, जौन परमेसुर की बातन में कछु दूसरी बातें जोड़ देत आंय; अकेले हिये से, परमेसुर की बातें परमेसुर हां मानो सजीव देखत मसीह में कैत आंय।