- दूसरी कुरिन्थियों 10 - Bundeli Holy Bible

¹ मैं ओई पौलुस जौन तुमाए सामूं दीन आंव, अकेले तुमाए पीठ पाछें तुम पै कैबे की हिम्मत करत आंव; कि तुम हां मसीह जैसी दीनता, और सादे मन से समझात आंव।

² मैं जा बिन्तवारी करत आंव, कि तुमाए संग्गै मोहां निधड़क होकें ऐसो नईं करने आय; जैसे बिलात जनें हम हां अपने मन से चलबोवारो मानत आंय, बल से बात करो चाहत आंव।

³ हम सरीर में तो चलत फिरत आंय, अकेले सरीर जैसो न्याव नईं करत।

⁴ कायसे हमाई लड़ाई के हथयार सारीरिक नईंयां, अकेले गढ़ी गिरा देबेवारे परमेसुर के बल से भरे आंय।

⁵ सो जौन विचार और बड़ी बड़ी बातें, जौन परमेसुर हां नईं चीनत आय, उन हां आड़े हाथ लेत आंय, और सब विचारन हां बस में करके मसीह की अग्यां मानबेवारे बना देत आंय।

⁶ और हम तईयार रैत आंय कि जब तुम मसीह की अग्यां मानबो पूरो कर लेओ, तो जौन अग्यां तुम ने नईं मानी उनको बदला लेबें।

⁷ तुम इनई बातन हां हेरत आव, जौन आंखन के सामूं आंय, कोई हां भरोसा होबे कि बो मसीह को आय, तो ऊहां जौ सोई पता होबे, कि जैसो बो मसीह कौ आय, ऊंसई हम सोई आंय।

⁸ कायसे जौन अधकार मोहां मिलो ऊकी बड़बाई करों, जौन पिरभू ने तुमाए बिगाड़बे हां नईं अकेले बनाबे हां दओ आय, तो लजा हों नईं।

⁹ जौ ईसे कैत आंव, कि कोऊ जा न कै लेबे की चिठियन से तुम हां डरात आंव।

¹⁰ कायसे कैत आंय, कि उनकी चिठियां बजनदार और मतलब से भरी आंय; अकेले जब देखत आंव, तो ऐसो लगत कि बो देह को नरम और बोलबे में ढीलो आय।

¹¹ जौन ऐसो कैत आय, बो सोच लैबे, जैसे हमाए न होबे पै चिठियन में हमाए बचन आंय, ऊंसई तुमाए सामूं हमाए काम सोई हुईयें।

¹² हमाई जा हिम्मत नईंयां कि हम अपने हां उनके संग्गै गिनें, कि अपनो मिलान उनसे करें, जौन अपनी बड़बाई करत, और एक दूसरे से अपनो मिलान करके मूरख बनत आंय।

¹³ हम हद्द से बढ़ के अपनी बड़वाई न कर हैं, केवल उतै लौ जिते लौ परमेसुर ने हमें कहो आय; ओई में तुम सोई आ गए आव सो ओई जैसी बड़बाई कर हैं।

¹⁴ कायसे हम अपनी हद्द से बाहर अपने हां नईं उठाओ चाहत, जैसो तुम लौ न पोंचबे की दसा में होतो, अकेले मसीह के बचन सुनात तुम लौ आ चुके आंय।

¹⁵ और हम हद्द से बाहर दूसरन के कामन पै बड़वाई नईं करत; अकेले हम हां जौ पता आय, कि जैसे जैसे तुमाओ बिसवास बढ़ है तो हम सोई अपनी हद्द से तुमाए कारण और बढत जै हैं।

¹⁶ कि हम तुमाए परगना से आगे कड़ के बचन सुनाएं, ऐसो नईंयां, कि हम दूसरन की हद्द में करे काम पे बड़बारी करें।

¹⁷ जौन बड़वाई करे, तो पिरभू पै करे।

¹⁸ कायसे जौन अपनी बड़वाई करत आय, बो नईं, अकेले पिरभू जी की बड़वाई करे, ऊ ग्रहण करो जात आय।