- 1 तीमुथियुस 5 - Bundeli Holy Bible

¹ कोई बूढ़े जने हां न डांटिये; परन्त बाप समझ के समझा दईये, और जुआनन हां भईया सोच के, और बूढ़ियन हां मताई सोच के।

² और जुआन बाईयर हां पूरी पवित्तरता से बहन जानके समझात रईये।

³ जौन सांचई बिधवा हो गई हो उनको मान करियो।

⁴ और कोऊ बिधवा बईयर के लड़कावारे और नाती नता होबें, तो बे पेंला अपने घरवारन मैं अच्छे से रैबें, और अपने मताई बाप हां उनको जौन हक्क होबे बो देओ।

⁵ जौन सांचई बिधवा होबै, और उनको और कोई न होबै; बे केवल परमेसुर के आसरे होबें, और रात दिना बिन्तवाई करबे में लगी रैबें।

⁶ परन्त जौन संसार के भोग में पड़ जाबै, मनो बे जीयत जागत मरी जैसी आय।

⁷ उनहां समझात रै, कि कोई उन पै उंगरिया न उठा पाबें।

⁸ परन्त कोई अपनी और अपने घरवारन की देखभाल साजे से न करे, तो बो बिसवास करी भई बातन हां मानो भूल गओ, और जौन बिसवास नईं करत उनसे गिरो भओ आय।

⁹ ऊ बिधवा को नाओं लिखो जाबै, जौन साठ बरसन से कम न होबै, और एकई मुन्स करो होबै।

¹⁰ और साजो काम करबेवारी रई होबै, जीने अपने लरका वारन हां ठीक से पालो होबै; पाहुरन की सेवा खुसामद करी होबै, पपित्तर जनन के गोड़े धोय होबें, और दुखियन की मदद करी होबै, और अच्छे कामन में मन से लगी रई होबै।

¹¹ जुआन बिधवा को नाओं न लिखियो, कायसे बे यीशु मसीह की सीख से उल्टी चलीं और सुख भोग में लगी रईं, और ब्याव करो चाहत हतीं।

¹² बे बुरई आंय, कायसे बे अपने पेंला वारे बिसवास से भटक गईं आंय।

¹³ बे घर घर फिरती आंय, और आलसी हो गई आंय, और ऊके संग्गै फालतू बातें करतीं और जौन बातें नईं करो चईये।

¹⁴ मैं जौ कैत आंव कि जुआन बिधवाएं ब्याओ करें; और लरका बिटिया जन के अपनो घर बार देखें, कि कोई उनहां भलो बुरो न कैबे।

¹⁵ कछु जनी तो भटक के शैतान छलिया के से काज करत आंय।

¹⁶ कोई बिसवासी बहन लौ कछु बिधवाएं रैत होबें, तो बा उन की देखभाल करै, कि मण्डली पै खरचा न बैठे, और बा बहन ऐसी बिधवाओं की मदद करे।

¹⁷ जौन मुखिया अच्छे से काम करत, और परमेसुर की बातें दूसरन हां बतात आंय और मेनत से सिखात आंय, उन हां दुगनो मान मिल है।

¹⁸ कायसे पवित्तर पोथी में लिखो आय, कि दांय में निबे बैलवा को मों न बांधियो, कायसे मजूर हां मजूरी मिलबो चईये।

¹⁹ कोई मुखिया पै कोई दोस होबै तो दो तीन गवाय बिना ऊ पै ध्यान न दईयो।

²⁰ जौन पाप करे ऊहां सबरे मान्सन के सामूं समझा देओ, कि दूजे जनें सोई पाप करबे से डराबें।

²¹ परमेसुर, यीशु मसीह, और खास सरगदूतन के मानो सामूं जानके मैं तुम हां कए देत आंव, कि मन से इन बातन हां मानियो और कोई के संग्गै मों देखो न करियो।

²² कोई बिसवासी पै झट्टई हाथ न धरियो और दूसरन के पाप में संग्गी न हुईयो: अपने हां साजो बनाए राखियो।

²³ जीवन में केवल पानू पीबेवारो न रहियो, अपने पेट के बेर बेर पिराबे और बेर बेर बीमार होबे से थोड़ो सो दाखन कौ रस पी लंय गय।

²⁴ कित्तई मान्सन के पाप तो खुल जात आंय, और पेंला से उनको न्याव होन लगत आय, परन्त कछु जनन के पाछें खुलत आंय।

²⁵ एैसई कछु जनन के अच्छे काज झट दिखात आंय, और दूसरन के कैसऊ लुके छुपे नईं रै सकत।