- 1 तीमुथियुस 4 - Bundeli Holy Bible

¹ आत्मा कैत आय, की आबेवारे दिना में कितेक मान्स बिलोरबेवारी आत्मा, और बुरई आत्मा की बातन मैं मन लगा के सांचे बिसवास की बातन से भटक जै हैं।

² ऐसी सीख उन झूठे मान्सन से आहें, मानो जिन को जी तांते लोहे से दागो गओ होबै।

³ जे ब्याव करबे से रोक हैं, और कह हैं कि खैबे की कछु बस्तन से दूर रओ, परन्त परमेसुर ने उन बस्तन हां ई लाने बनाई आंय कि बिसवासी जनें, और सांचे हां चीनबेवारे उन हां परमेसुर को धन्न मानके खाबें।

⁴ कायसे परमेसुर की बनाई सबरी बस्तें अच्छी आंय, और कोई ऐसी बस्त नईंयां; जौन खाबे हां न होबै।

⁵ कायसे परमेसुर के बचन और बिन्तवारी में साजी हो जात आय।

⁶ तें भईयन हां समझा के इन बातन की याद करा, तो तें यीशु मसीह को अच्छो सेवा करबेवारो हुईये: और बिसवास की बातन हां और जौन बातें सिखाई गई आंय, और जिन हां तें मानत आय, तें बढ़त रै है।

⁷ परन्त गन्दी और बूढ़ी दादी बईयरन की कहानियन पै ध्यान न करो, और भक्ति करत रओ।

⁸ कायसे दैहिक कसरत ज्यादा फायदा नईं करत आय, परन्त भक्ति सबरी बातन में फायदे की होत आय, ई बेरा में, और आबेवारे दिना में सोई।

⁹ जा बात सांची आय, और सब तरहां के मान्स जा मानत आंय।

¹⁰ हम खूबई मैनत करत आंय और कोसस करत आंय, कि हमाई आस जीयत परमेसुर पे आय; जौन मान्सन को, और जौन उन हां मानत आंय उनको तरन तारन करबेवारो आय।

¹¹ सो चईये के तें इन बातन हां मानबे को जोर डाले, और इन बातन हां बतात रै।

¹² कोई तोरी जुआनी हां नेंचो नईं लेखे; परन्त बातचीत, और चाल चलन, प्रेम, और बिसवास करबे में, और पवित्तर जीवन धरबे में मान्सन के काजें नमूना बनो रै।

¹³ और जब लौ मैं उते न आओं, तब लौ पढ़बे, उपदेस देबे और सिखाबे में लगो रै।

¹⁴ जौन बरदान तोहां मिलो आय, ऊ पै ध्यान धरियो जौन के लाने पैले से तोरे लाने कहो गओ हतो, और जी के लाने बड़े बूढ़न ने तोपे हाथ धरो हतो।

¹⁵ इनई बातन पै ध्यान लगा और सोचत रै, कि सबरन के हेरत तें बढ़त जाबै। अपनी और अपनी बातन जौन तें सिखात आय ध्यान धरै रओ।

¹⁶ इन बातन में पक्को बनो रै, कायसे ऐसो करबे से तें अपने, और जौन तोरी बातन हां सुनत आय उनको तरन तारन हुईये।