- 1 तीमुथियुस 3 - Bundeli Holy Bible

¹ जा बात सांची आय, कि जौन मण्डली को मुखिया होबो चाहत आय, ऊ अच्छे काम करबेवारो होबै।

² सो मुखिया बिन दोसवारो एकई बईयर को मुन्स, संयमी, अपने हां बस में रखबेवारो, सीधो, अच्छो, पहुनाई करबेवारो, और सिखाबे में अच्छो होबै।

³ पीबेवारो और मारपीट करबेवारो न होबै; बात करबे में अच्छो, झगड़ा करबेवारो, और लोभ करबेवारो न होबै।

⁴ अपने घर हां संवारबेवारो, और लड़का बारन हां ठीक से अपने अधीन रखबेवारो होबै।

⁵ (जब कोऊ अपने घर की देखभाल अच्छे से न करे, तो बो परमेसुर की मण्डली के लोगन की रखनवारी अच्छे से कैसे कर है)।

⁶ ध्यान धरियो के मुखिया नओ चेला न होबै, ऐसो न होबै, कि घमण्ड में आके शैतान घांई दण्ड ऊहां सोई मिले।

⁷ और बायरें के मान्सन में ऊ को अच्छो नाओं होबै। ऐसो न होबै बो शैतान के जाल में फंसके बदनाम होबै।

⁸ ऊंसई सेवकों को सोई गंभीर मान्स होओ चईये, बो दोरंगी, और पीबेवारो न होबै, और घूस लेबेवारो जन न होबै।

⁹ और साजे मन से बिसवास की बातन हां ध्यान में धरबेवारो होबै।

¹⁰ और चईये कि पेंला उनकी जांच पड़ताल करी जाबै, और साजे कड़ें, तो सेवक को काम करें।

¹¹ ऐसई बईयरन हां सोई गंभीर होओ चईये; दूसरन पै दोष मड़बेवारी न होबें परन्त होशियार और बिसवास करबे लाक होबें।

¹² सेवक एकई बईयरन को मुन्स होबै, और लड़का वारन और अपने घर को अच्छे से धरबो जानें।

¹³ कायसे जौन सेवक को काज अच्छे से करे, तो ऊ को बड़ो नाम हुईये और यीशु मसीह पै बिसवास में पक्के कड़ हैं।

¹⁴ मैं तोरे लौ जल्दी आबे की आसा लगाएं आंव परन्त जे बातें मैं तोहां लिखत आंव।

¹⁵ मोरे आबे में तनक अबेर हो जाबै, तो ध्यान धरियो, कि परमेसुर को घर, जियत परमेसुर की मण्डली आय, जौन सांचे को खम्भा और उठी नी आय; ईमें कैसो चलो चईये ईपै ध्यान धरियो।

¹⁶ धरम को भेद बड़ो आय ईको ध्यान धरियो; बो सरीर में होकें संसार में आओ जा बात आत्मा ने बताई, और सरगदूतन ने संसार मैं ईको परचार करो, मान्सन ने ऊ पै बिसवास करो और बो सरग पै उठा लओ गओ।