- 1 तीमुथियुस 2 - Bundeli Holy Bible

¹ सबसे पेंला मोरो कैबो जौ आय, कि तुम सबरे मान्सन के काजें, बिन्तवारी मांगबो और धन्न मानो।

² राजन और सबरे जौन ऊंचे पदवारे आंय कि बे भजन भक्ति के साथ अपनो जीवन संभल के जीएं।

³ ऐसो जीवन हमाए तरन तारक करबेवारे परमेसुर हां साजो लगत, और उन हां भात आय।

⁴ परमेसुर जे चाहत आंय, सबरे मान्सन को तरन तारन होबै; और बे सांची बात हां जानें।

⁵ कायसे परमेसुर केवल एकई आय: मान्सन और परमेसुर के बीच एक जनों आय, जौन परमेसुर होकें मान्स बन गए जानो यीशु मसीह।

⁶ जीने अपने प्राणन हां सबके तरन तारन के लाने दे दओ; जी की गवाह ठीक बेरा पै दई गई।

⁷ मैं सांची कैत आंव, ईमें तनकई झूठ नईयां, कि मैं ऐई के लाने परचारक और प्रेरित बनो, कि यहूदीयन हां छोड़ दूसरी जात वारन के बीच जाई सांची बात बताबेवारो होओं।

⁸ सो मोरी जा चाहना आय, कि मन्सेलू जब बिनती करे तो बिना खुन्स और झगड़ा के साजे पवित्तर हाथन है ऊपर उठा के करबें।

⁹ ऊंसई बईयरें अच्छे और साजे उन्ना पैरें, और अपने बाल न गूंथो, और सुन्ने, और मोतीयन, और मांगे भड़कीले उन्ना से नईं सजें परन्त अच्छे काम करबेवारी होबें।

¹⁰ कायसे परमेसुर को भजन भक्ति करबेवारी बईयरन हां जौई अच्छो लगत आय।

¹¹ बईयर हां चिमाने रैके और बात मानके सीखो चईये।

¹² और मैं जौ सोई कैत आंव, कि बईयर उपदेस न करै, और न मन्सेलू हां अग्यां दैबे, परन्त चिमानी रैबें।

¹³ कायसे पेंला आदम जानो मन्सेलू, और पाछें हव्वा जानो बईयर बनाई गई।

¹⁴ और आदम नईं, अकेले हव्वा शैतान छलिया की बातन में फंसके अग्या तोड़बेवारी हो गई।

¹⁵ परन्त बईयर बच्चा पैदा करबे से अपनी जांगा फिन के पाहें, सो उन हां ठीक ठाक रैबो चईये और बिसवास, और प्रेम करबे, और पवित्तर बनो रओ चईये।