- 1 तीमुथियुस 1 - Bundeli Holy Bible

¹ पौलुस ने लिखी जौन तरन तारन करबेवारे परमेसुर, और हमाई आसा जौन यीशु मसीह में आय उनकी अग्या से प्रभु यीशु मसीह के सेवक आंय, तीमुथियुस हां जौन मोरो भलो लरका आय।

² पिता परमेसुर, और हमाए प्रभु यीशु मसीह से तुम पै किरपा, दया और सान्ति मिलत रैबे।

³ जैसे मैंने मकिदुनिया हां जाती बेरा तोसे कई हती, कि इफिसुस मैं बने रैके उते जौन औरई बातें बतात आंय कईयो कि ऐसो न करें।

⁴ और उनके किस्सा कहानी पै और जौन मान्सन की पुस्तन को अन्त नईयां उन पै ध्यान न धरे, कायसे इनसे विवाद होत आंय; और ईको परमेसुर के तरन तारक से कछु मतलब नईंयां, जो बिसवास से सम्बन्ध रखत आंय।

⁵ मोरे कैबे को मतलब जौ आय, कि सांचे मन और साजे हिये से, और बैर न रखबेवाले के बिसवास से प्रेम बढ़त आय।

⁶ इन बातन हां छोड़ के बिलात जनें फालतू बातन के पाछें चलकें भटक गए आंय।

⁷ बे मूसा को नैम सिखाबेवारे तो बनो चाहत आंय, परन्त जौन बातन पै जोर देत आंय, उन हां समझत लौ नईंयां।

⁸ हमें पता आय, कि मूसा को जैसो नैम आय ऊ पै चलै तो बो भलो आय।

⁹ कायसे नैम अच्छे मान्स के लाने नईंयां, परन्त अधरमी जनें, जौन कछु नईं मानत उनके लाने भक्ति नईं करबेवारे, और अशुद्ध, मताई-बाप हां मारबेवारे, और हत्यारन के लाने आंय।

¹⁰ परतिरिया संगत करबेवारे, पुरुष के संग्गै भोग करबेवारे, मान्सन हां बेंचबेवारे, लबरा, लाबरी गवा दैबेवारे, और जौन सांचे परचार को बिरोध करत आंय उनके लाने नैम बने आंय।

¹¹ जो उन महा धन्य परमेसुर के जस के ऊ सुसमाचार से आय, जौन मोहां दओ गओ आय।

¹² मैं अपने प्रभु यीशु मसीह को, धन्न मानत आंव जीने मोहां ऐसो बल दओ; कि उन ने मोपै बिसवास करके अपनी सेवा के लाने धरो।

¹³ मैं तो पेंला बुरई बातें कैबेवारो, दूसरन हां सताबेवारो, और अन्धेर करबेवारो हतो; परन्त उन ने मोपै दया करी कायसे मैंने जो सबरी बातें बिन सोचे समझे करीं।

¹⁴ और मोपै प्रभु यीशु मसीह की कृपा, उनपै बिसवास करबे से उन के प्रेम से बिलात भई।

¹⁵ जा बात सांची और सबरे जनें के मानबे जोग आय, कि यीशु मसीह पापियन को तरन तारन करबे हां ई संसार में आए, उन में सबसे बड़ो मैं आंव।

¹⁶ मोपै प्रभु की दया ईसे भई, कि यीशु मसीह ने मोरे लाने धीरज धरो, कि जौन उनपै बिसवास करके हमेसा को जीवन पाबे, उनके लाने मैं जैसो पापी एक नमूना भओ।

¹⁷ अब महान राजा सदा बने रैबेवारे अनदेखे, ऐसे परमेसुर जिनको कोऊ मेल को नईयां उन हां मान, जस जुगजुग होत रैबै। आमीन।

¹⁸ मोरे बेटा तीमुथियुस, जौन बातें तोरे लाने पेंला से कई गई हतीं, मैं तोसे कैत आंव कि उन हां करत जा।

¹⁹ और बिसवास और साजे मन से करत जा, कछु जन ने जे बातें छोड़ दई आंय, सो उनको बिसवास को जहाज मानो डूब गओ।

²⁰ उनई में से हुमिनयुस और सिकन्दर आंय जिन्हां मैंने शैतान के हाथन छोड़ दओ, कि बुरई बातें न करें।