- 1 थिस्सलुनीकियों 5 - Bundeli Holy Bible

¹ अब भईया हरौ, जो कबै और कौन दिना हुईये हम कछु नईं लिखत।

² कायसे तुम हां खुद पता आय कि जैसे भड़या रात के अंधयारे में आत आय, ऊं सई पिरभू के आबे को दिना हुईये।

³ जब मान्स कैत रै है, कि मजा मौज आय, और कछु डर नईयां, तो बरबादी को दिना एका एक आ जै है, जैसे एक गरभवती बईयर हां पिराबो होत आय; और बे न बच हैं।

⁴ परन्त भईया हरौ, तुम तो अंधियारे में नईयां, कि पिरभू के आबेवारो दिना चोर घांई आ जाबै।

⁵ कायसे तुम सबरे जनें उजयारो पाय, और दिन के बच्चा आव, तुम न तो रात के, और न अंधियारेवारे आव।

⁶ सो हम दूसरन घांई सोत नईं रैबें, परन्त जागत और चौकन्ने रैबें।

⁷ कायसे जौन सोत आंय, बे रात हां सोत आंय, और जौन पियत आंय, बे सोई रात में पियत आंय।

⁸ परन्त हम जो उजयारेवारे आंय, सो हम बिसवास और प्रेम धरें, जौन मानो हमाओ बचाबेवारो झिलम आय और तरन तारन की आस, जौन मानो मूड़ ढांकबे की टोपी आय।

⁹ कायसे परमेसुर ने हम हां नरक हां नईं, परन्त पिरभू यीशु मसीह से तरन तारन पाबें।

¹⁰ पिरभू हमाए काजें ईसे मरे, कि हम चाए मरें, चाए जीयत रैबें, उनके संग्गै जीबें।

¹¹ सो एक दूजे हां उसकाओ, और एक दूजे हां बिसवास में पक्को करो, और तुम ऐसई करत सोई आव।

¹² भईया हरौ, हम तुम से कैत आंय, कि तुमाए बीच जौन मैनत करत आंय, और पिरभू में तुमाए गुरू आंय, और तुम हां समझात आंय, उनकी बात मानो।

¹³ और बे जो करत आंय ऊसे उन हां मान करो; और अपने बीच मेल-मिलाप से रओ।

¹⁴ भईया हरौ, हम बताएं कि जौन की चाल ठीक नईंयां उन हां समझाओ, और जौन पाछें आंय उन हां बढ़ाओ, और सबरन की सहो।

¹⁵ ध्यान धरो, कोई से बुरय से बुरो न करो; परन्त भला करो।

¹⁶ हमेसा खुस रओ।

¹⁷ हमेसा बिन्तवारी करत रओ।

¹⁸ एक एक बात के लाने परमेसुर हां धन्न मानो: कायसे पिरभू यीशु मसीह जौई तुम से चाहत आय।

¹⁹ आत्मा की आगी हां न बुझाओ।

²⁰ आगमवानी के चिताबे हां हलको न जानो।

²¹ सबरी बातन हां परखो जौन साजी होबें उन हां मानो।

²² सबरी बुरई बातन से दूर रओ।

²³ सान्ति दैबेवारे परमेसुर तुम हां साजो राखे; और तुमाई आत्मा, प्रान और देह हमाए पिरभू यीशु मसीह के आबे लौ बिन खोट बने रैबें।

²⁴ जीने तुम हां बुलाओ आय, बो सांचो आय तुमाए काजें ऐसई कर है।

²⁵ भईया हरौ, हमाए काजें बिनतवारी करो।

²⁶ सबरे भईयन हां चूमा देके नमस्कार कहियो।

²⁷ मैं पिरभू में तुम हां अग्यां देत आंव, कि जा चिठिया सबरे भईयन के बीच बांची जाबै।

²⁸ हमाए पिरभू यीशु मसीह की किरपा तुम पै बनी रैबे।