- 1 यूहन्‍ना 5 - Bundeli Holy Bible

¹ जो कोनऊं जौ बिसवास करत आय कि यीशु ही मसीह आय, बो परमेसुर से पैदा भओ आय और जो कोनऊं पैदा करबेवारे से प्रेम करत आय, बे सोई उन से प्रेम करत आय और उनकी मानत आय।

² जब हम परमेसुर से प्रेम धरत आंय, और उनकी कई करत आंय, ऐई से हम हां पता आय, कि हम परमेसुर के जन से सोई प्रेम धरें आंय।

³ परमेसुर को प्रेम ऐसो आय, कि हम उनकी कई करें; और उनकी अग्यां कठन नईंयां।

⁴ कायसे जौन परमेसुर की कई करत आय, बो संसार की बातन में नईं पड़त, कायसे ऊ ने संसार जैसी नईं करी कायसे बौ अपने बिसवास में पक्को कड़ो।

⁵ संसार की बातन पै जै पाबेवारो को आय? ओई जौन बिसवास धरें आय, कि यीशु मसीह परमेसुर को बेटा आय।

⁶ यीशु मसीह ई संसार में मान्स होकें आए, बे मानो पानू से नईं परन्त पानू और रकत दोई से धरती पै आए।

⁷ कायसे जा बात आत्मा से भई; और आत्मा की बात सांची होत आय।

⁸ ऐसी बात आत्मा, पानू और रकत; तीनईं संग्गै आंय और तीनईं एकई सी कैत आंय।

⁹ जब हम मान्सन की कई मानत आंय, तो परमेसुर की कई तो ईसे बढ़के होत आय; जौन बात उन ने अपने बेटा यीशु मसीह के लाने कई आंय।

¹⁰ जौन परमेसुर के बेटा पै बिसवास धरें आय, कि जा सांची आय; जीने परमेसुर की कई गई मानी, ऊने मानो उन हां झूठो मानो; जौन उन ने अपने बेटा के लाने कई।

¹¹ बो ऐसी आय, कि परमेसुर ने हम हां तरन तारन की कई: जौन उनके बेटा यीशु मसीह में हम हां मिलो।

¹² जीने बेटा पै बिसवास धरो, बे परलोक के वासी भए, जीने परमेसुर के बेटा हां नईं मानो उन हां परलोक नईं मिलो।

¹³ मैंने ईसे तुम हां, जा चिठिया लिखी कायसे तुम परमेसुर के बेटा पै बिसवास धरै आव; कायसे ऐसो लिखो आय कि मानो तुमाओ परलोक वास पक्को आय।

¹⁴ अब हमाई उन से बिन्तवारी करबे की मन्सा होत आय; कि उनकी कई जैसो हम मांगें तो बे करत आंय।

¹⁵ जब हम हां ऐसो पता आय, कि जो कछु हम मांगें तो बे देत आंय, तो हम जौ कैत आंय, कि हम ने जौन मांगो सो पाओ।

¹⁶ कोऊ अपने भईया हां ऐसो पाप करत तकै, जी पाप से नरक कुण्ड हां नईं जात तो ऊहां परलोक मिल है, कायसे पाप ऐसो सोई होत आय जीसे परलोक नईं मिलत, ऐसे पाप के लाने बिन्तवारी करबे हां मैं नईं कैत।

¹⁷ सबरे अधरम तो पाप आंय, परन्त कछु ऐसे पाप सोई आंय, जीके करे से परलोक वास नईं छूटत।

¹⁸ हम हां पता आय, कि जौन परमेसुर मैं बिसवास धरें आय, बो जनो पाप करतई नईंयां; कायसे परमेसुर ऊहां बचाए रैत आंय, और ऊ शैतान छलिया उन हां छी लौ नईं पात।

¹⁹ हम हां पता आय, कि हम परमेसुर पै बिसवास धरें आंय, और पूरे संसार के जनें शैतान छलिया की कई करत आंय।

²⁰ कायसे हम हां पता आय, कि परमेसुर के बेटा ई धरती पै आ गए आंय, और उन ने हम हां ऐसी सीख दई आय, कि हम उन सांचे जनें को चीनें, और उनईं के संग्गै बने रैबें; बे सांचे परमेसुर आंय और उन में होकें बैकुण्ड वास मिलत आय।

²¹ हे लड़को, मूरतन से बचे रईयो।