- 1 यूहन्‍ना 3 - Bundeli Holy Bible

¹ हेरो, परमेसुर पिता ने हम से कैसो प्रेम करो, कि हम परमेसुर के लड़का बिटिया कहाय, और हम आंय सोऊ: ऐईसे संसार हम हां नईं चीनत, कायसे संसार के मान्सन ने उन हां सोई नईं मानो।

² प्यारे भईया हरौ, अबै तो हम परमेसुर के लड़का बिटिया कहात आंय, और अबै जौ पता नईंयां, कि हम और का हुईयें! इतनो पता आय, कि जब बे फिन के आहें तो हम सोई उन घांई हो जै हैं, और उन हां उनके सांचे रूप में तक हैं।

³ जिन हां प्रभु यीशु मसीह ऐसी आस आय, बे उन जैसे पवित्तर रैत आंय।

⁴ जौन पाप करत आय, बो परमेसुर के नैम हां तोड़त आय; और पाप नैम के तोड़बे से होत आय।

⁵ तुम हां तो पता आय, कि बे हमाए पापन हां हरबे आए; उन में बिलकुल पाप न हतो।

⁶ जौन अपने मन से उन हां मानत आय, बो जनो पाप नईं करत: जौन पाप करत आय, मानो ऊ ने न तो उन हां तको आय, और न उन हां मानत आय।

⁷ लड़को, कोऊ के भरमाबे की बातन में न अईयो; जौन मान्स धरम के काम करत आय, ओई उन जैसो धरमी आय।

⁸ जौन जनो पाप करत आय, बो मानो शैतान छलिया के उसकाय बुरय काम करत आय, कायसे शैतान छलिया पेंला से पाप करबेवारो आय: परन्त परमेसुर के बेटा यीशु मसीह ईसे परगट भए, कि शैतान छलिया के कामन हां खतम करें।

⁹ जौन परमेसुर हां मानत आंय बो पाप नईं करत; कायसे परमेसुर की आत्मा ऊ में बनी रैत आय: और बो जनो पाप नईं कर सकत, कायसे बो सांचे मन से उन हां मानत आय।

¹⁰ ऐसई तो पता पड़त आय कि कौन शैतान छलिया, और कौन परमेसुर के मानबेवारे आंय; जौन धरम की गैल नईं चलत, बो परमेसुर को मानबेवारे नईंयां, और न ऊ जनो, जौन अपने भईया से प्रेम नईं करत।

¹¹ कायसे जौन सन्देसो तुम ने पेंला से सुनो, बो ऐसो आय, कि हम एक दूसरे से प्रेम राखें।

¹² कैन घांई नईं करियो जौन दुष्ट हतो, जीने अपने भईया हां मार डालो: और काय हां मार डालो? कायसे ऊ को भईया धरम की गैल चलत हतो, और ऊ दुष्टी हतो।

¹³ भईया हरौ, हटी संसार के मान्स तुम से अदावट धरें तो अचम्भा न करियो।

¹⁴ हम जौ मानत आंय, कि हमाओ नरक कुण्ड से कड़के मानो तरन तारन भओ आय; कायसे कि हम भईयन से प्रेम करत आंय: जौन प्रेम नईं करत, बो मानो नरक कुण्ड में डलो आय।

¹⁵ जो कोनऊ अपने भईया से अदावट धरत आय, बो हत्यारा आय; तुम हां तो पता आय, कि कोई हत्यारे को तरन तारन नईं होत।

¹⁶ हम ने प्रेम ईमें तको, कि पिरभु यीशु मसीह ने हमाए काजें अपनो जीवन बलदान कर दओ; हम हां सोई भईयन के काजें अपनो बलदान करो चईये।

¹⁷ जी लौ संसार में बिलात जायजाद होबै, और बो अपने भईया हां कंगाल देख के तरस न खाबै, तो ऐसे मान्स में परमेसुर को प्रेम नईं रैत।

¹⁸ हे लड़को, हम अपने मों की बोली से नईं, परन्त अपने कामन और सत्त से प्रेम करबें।

¹⁹ ईसे जौ पता पड़त आय, कि हम सांचे हां जानत आंय; और जी बातन के लाने हमाओ मन न बोले बो नईं करें, जीसे परमेसुर के सामूं ठांड़े होबे की हम हां हिम्मत मिले।

²⁰ कायसे परमेसुर तो हमाए मन से बड़े आंय, और बे सबकछु जानत आंय।

²¹ प्यारे भईया हरौ, मानो तुमाओ मन तुम हां दोषी न बताबै, तो हम हां परमेसुर के सामूं ठांड़े होबे की हिम्मत होत आय।

²² जा बात सोई आय कि जो कछु हम उनसे बिन्तवारी करत आंय, तो बे हम हां देत आंय; कायसे कि हम उनकी कई करत आंय; और जौन बातें उन हां भाती आंय, उनई हां करत आंय।

²³ उनकी अग्या जा आय कि हम उनके बेटा यीशु मसीह हां मानें और जैसो उन ने कई आय सो एक दूजे से प्रेम करें।

²⁴ जो कोनऊं उनकी कई करत आंय, बे एक दूसरे से मिले रैत आंय; और ऊ आत्मा जौन उन ने हम हां दई आय, बो हम हां बतात आय, कि हम उनके संगै संगै बने आंय।