- 1 यूहन्‍ना 2 - Bundeli Holy Bible

¹ हे मोरे लड़को, मैंने जे बातें तुम हां ईसे लिखी आंय, कि तुम ठैकें पाप न करो; और तुम से कछु पाप हो जाबै, तो ध्यान धरो कि परमेसुर लौ हमाओ एक ध्यान धरबेवारो यीशु मसीह आय।

² पिरभु यीशु मसीह में ही हमाए पापन की क्षिमा आय; और हमाए अकेले नईं, परन्त संसार के सबरे जनन की।

³ जब हम उनकी अग्यां मान हैं, तो पता पड़ है कि हम उनकी कई करत आंय।

⁴ जो कौनऊं ऐसो कैत आय, कि मैं उनकी कई करत आंव, और उनकी अग्यां नईं मानत, तो बो लबरा आय; और ऊ की बातन में कछु सत्त नईंयां।

⁵ परन्त जो कोनऊं उनकी कई करबे, बौ सांचई परमेसुर से प्रेम करत आय; ऐसो करबे से पता चलत आय, कि हम उनके आंय।

⁶ जो कोनऊं जौ कैत आय, कि मैं उनकी कई करत आंव, तो ऊहां उनकी सी गैल पै चलो चईये।

⁷ प्यारे भईया हरौ, मैं तुम हां कोई नई अग्यां नईं लिख रओ, परन्त बोई पुरानी अग्यां जौन पेंला से तुम हां मिली हती; जौन तुमने पेंला सुनो हतो।

⁸ अब मैं तुम हां नई अग्यां लिखत आंव; जौन परमेसुर ने तुम हां मानबे हां कहो आय; कायसे तुमाए हिये को अंधियारो मिटत जात आय, और सच्ची ज्योत अब तुम में चमकन लगी आय।

⁹ जो कोनऊ ऐंसो कैत आय, कि मैं ज्योत में आंव; और अपने भईया से अदावट धरें आय, बो अबै लौ अंधियारे में आय।

¹⁰ जो कोनऊ अपने भईया से प्रेम धरत आय, ज्योत में बनो रैत आय, और ऊ को कछु बुरओ न हुईये।

¹¹ परन्त जौन अपने भईया से अदावट धरत आय, बो मानो अंधियारे में आय, और ऊहां जौ पता नईंया कि कौन सी गैल धरें आय, कायसे अंधियारे में ऊहां कछु नईं सूझत।

¹² हे लड़कावारे, मैं तुम हां ईसे लिखत आंव, कायसे उनके नाओं से तुमाए पापन की क्षिमा भई।

¹³ बड़े बूढ़े जनो, मैं तुम हां ईसे लिखत आंव, कि जौन संसार के पेंला से हते उन हां तुमने मानो आय, जुआनो, मैंने तुम हां ईसे लिखो आय, कि परमेसुर की बातन हां मानो कायसे तुम ऊ दुष्ट छलिया से जीते आव।

¹⁴ बड़े बूढ़े जनो, मैं तुम हां ईसे लिखत आंव, कि जौन संसार में पेंला से हते तुम उन हां जानत आव, जुआनो, मैंने तुम हां ईसे लिखो आय, कि तुम बली बनो, और परमेसुर कौ बचन तुम में बनो रैत आय, कायसे तुम ऊ दुष्ट छलिया से जीते आव।

¹⁵ तुम ई संसार और संसार की बस्तन से प्रेम न धरो, कायसे जौन संसार से प्रेम धरत आय, ऊ में परमेसुर के लाने प्रेम नईं रैत।

¹⁶ कायसे जो कछु संसार में आय, जानो कि मान्स की अभलाखा, आंखन की अभलाखा, और अपनी कमाई पै घमण्ड, जे सबरी बातें परमेसुर के मन की नईंयां, परन्त संसार की बातें आंय।

¹⁷ संसार और ई संसार की अभलाखा इतई मिट जै है, परन्त जौन परमेसुर की कई करत आय, बो हमेसा बनो रै है।

¹⁸ हे लड़कावारे, सुनो जा आखरी बेरा आय, जैसो तुम ने सुनो आय, यीशु मसीह को बिरोधी आबेवारो आय, ऐसो लगत आय कि उनके बिरोधी अबै भी ठांड़े हो रय आंय; ऐई से पता लगत आय, कि जे आखरी दिना आंय।

¹⁹ बे हम में से निकले हते परन्त सांचई हम में के नईं हते; कायसे हमाए बीच के होते, तो हमाए संग्गै रैते, उन के निकल जाबे से पता पड़त आय कि बे हमाए बीच के न हते।

²⁰ हमें तो पवित्तर परमेसुर ने न्यारो करो आय, और जे सबरी बातन हां तुम जानत आव।

²¹ मैंने जे बातें तुम हां जौ सोच के नईं लिखीं, कि तुम उन हां नईं चीनत, परन्त ईसे लिखो, कि सांचे परमेसुर से लाबरी झूठी बातें नईं कड़तीं।

²² लबरा को आय? बो जौन यीशु मसीह हां संसार के मान्सन के पाप से छुड़ाबेवारो नईं मानत; बो यीशु मसीह को बिरोधी आय, परमेसुर जौन पिता आय और यीशु मसीह जौन उनके बेटा आंय उन हां नईं मानत।

²³ जो बेटा हां नईं मानत उन लौ परमेसुर पिता सोई नईंयां, परन्त जौन बेटा हां मानत आय, पिता परमेसुर ऊके संग्गै रैत आय।

²⁴ जो कछु तुम ने पैली बेरा से सुनो आय ओई हां मानो, कायसे जौन बातें तुम ने पेंला सुनके अपने हिये में जमा लईं, तो तुम यीशु मसीह जौन बेटा आय और परमेसुर जौन पिता आय उन में बने रै हौ।

²⁵ जी की उन ने हमसे कौल करो हतो बो बैकुण्ड को वास आय।

²⁶ जे बातें मैंने उनके लाने कई आंय, जौन तुम हां सांची गैल से बिलोरत आंय।

²⁷ जैसे उन ने तुम हां अपनाओ, और जिन में तुम बने आव; सो अब कोई हां तुम हां और नईं चिताने, कायसे बे तो आपऊ तुम हां सबरी बातें बतात आंय; कोऊ सांचो आय लबरा नईंयां, सो जौन बातें उन ने बताई उन हां मानो।

²⁸ सो लड़को, उनकजनों के मानो, कायसे जब बे फिन आहें, तो हम बिना खटके उनके सामूं ठांड़े हुईयें।

²⁹ कायसे जो तुम मानत आव, कि बे सांचे आंय, तो तुम जौ सोई जानत आव, कि जौन धरम की गैल धरै आय, बो मानो उनईं को आय।