- 1 यूहन्‍ना 1 - Bundeli Holy Bible

¹ जीवन दैबेवारो बचन जौन पेंला से आय, जी की बातें हम ने सुनी, और जीहां अपनी आंखन से तको, जीहां हम ने खुल के हेरो; और हाथन के छिओ।

² (बो जीवनदाता परगट भओ, और हम ने ऊहां तको, और ऐसो कैत आंय, कि उन से ध्यान धरे से तरन तारन होत आय; बे पिता परमेसुर के संग्गै रैत हते):

³ जो कछु हम ने तको और सुनो बेई बातें तुम हां बतात आंय, कि तुम सोई इन बातन में बिसवास धरौ; कि हमाओ जोड़ परमेसुर, और उनके बेटा यीशु मसीह से आय।

⁴ जे सबरी बातें हम ईसे लिखत आंय, कि हम हां और खुसी होबै।

⁵ जौन बतकाओ हम ने उनके मों से सुनो, ओई तुम हां बतात आंय, कि परमेसुर ज्योत आंय; उन में अंधयारो बिलकुल नईंयां।

⁶ हम कैबें, कि उनके संग्गै हमाओ अच्छो सम्बन्ध आय, और फिन अंधियारे में चलबें, तो हम लबरा कहा हैं; और हमाई बातन में कछु सत्त नईंयां।

⁷ जैसे बे ज्योत में रैत आंय, ऊंसई हम सोई ज्योत में चलबें, तो हम एक दूजे से मिलके रैबें; और पिरभु यीशु मसीह के रक्त के जस से हमाए पाप कट जै हैं।

⁸ हम कैबें, कि हम ने कभऊं कोई पाप नईं करो, तो अपने हां धोका देत आंय: और हम में कछु सत्त नईंयां।

⁹ परन्त जब हम अपने पापन हां मानें, तो बे हमाए पापन हां क्षिमा कर हैं, और हम हां सबरी अधरम की बातन से सुद्ध करबे में सांचे आंय।

¹⁰ हम कैबें कि हम ने कछु पाप नईं करे, तो उन हां झूठो ठहरात आंय, और उनके बचन को सत्त हम में नईंयां।