- पैली कुरिन्थियों 9 - Bundeli Holy Bible

¹ का मैं छूट्टा नईंयां? का मैं चेला नोंई? का मैंने यीशु को जौन हमाओ पिरभु आय, नईं तको? का तुम पिरभु में मोरे बनाए नईंयां?

² जदि मैं औरन के लाने चेला नईंयां, पर तुमाए लाने तो आंव, कायसे तुम पिरभु में मोरे चेलापन पे मानो छाप आव।

³ जौन मोहां जांचत परखत आंय, उन के लाने जौई मोरो जवाब आय।

⁴ का हमहां खैबे पीबे कौ अधकार नईंयां?

⁵ का हम हां जौ अधकार नईंयां, कि कोई मसीही बिन्नु हां ब्याओ कर के लएं फिरें, जैसो और चेले और पिरभु के भाई और कैफा करत आंय?

⁶ या अकेले मोहां और बरनबास को अधकार नईं कि कमाई करबो छोड़ें।

⁷ कौन कभऊं अपनी गांठ से खाके सिपाई कौ काम करत आय: कौन दाख कौ बगीचा लगा के ऊ की दाखें नईं खात? कौन गाड़रन की रखनवारी करके उनकौ दूध नईं पियत?

⁸ का मैं जे बातें मान्सन घांई बोलत आंव?

⁹ का नेम व्यवस्था जौई नईं कैत? कायसे मूसा की नैम व्यवस्था में लिखो आय कि दांय में चलत भए बैल कौ मों न बांधियो: का परमेसुर बैलन की सोच करत आय? या जौ हमाए लाने कैत आय?

¹⁰ हओ, हमाए लाने लिखो गओ, कायसे सई आय, कि जोतबेवारो आसा से जोते, और दांय करबेवारो मिलबे की आसा से दांय करे।

¹¹ सो जब हमने तुमाए लाने आत्मिक बस्तें बोईं, तो का जा कोई बड़ी बात आय, कि तुमाई बे बस्तें जौन हम हां जरूरी आंय तुम से चाहना करें।

¹² और दूसरन कौ तुम पे जौ अधकार आय, तो का हमाओ ईसें अधक अधकार न हुईये? परन्त हम जौ अधकार काम में न लाएं; परन्त गम्म खात आंय, कि हम से मसीह के परचार में कोऊ रोक न होबे।

¹³ का तुम हां पता नईंयां? कि जौन पवित्तर बस्तन की चाकरी खुसामद करत आंय, बे मन्दर में से खात आंय; और जौन वेदी की सेवा करत आंय; तो जो कछु वेदी पे चढ़ाओ जात आय ओई में से खात आंय?

¹⁴ ऐई भांत से पिरभु ने सोई ठैराओ आय, कि जौन मान्स भलो सन्देसो सुनात आय, उन कौ पेट भरबो ओई से होबे।

¹⁵ परन्त मैं इन में से कोऊ बात काम में न लाओ, और मैंने जे बातें ई लाने नईं लिखीं, कि मोरे लाने ऐसो करो जाए, कायसे ई से साजो तो मोरो मरबो भलो आय; कि कोऊ मोरो घमण्ड अकारथ ठैराबे।

¹⁶ और जदि मैं भलो सन्देसो सुनाओं, तो मोरो कछु घमण्ड नईं, कायसे जौ तो मोरे लाने जरूरी आय; और जदि मैं भलो सन्देसो न सुनाओं, तो मो पे हाय।

¹⁷ कायसे जदि अपनी मन्सा से जौ करत आंव, तो मजूरी मोहां मिलत आय, और जदि अपनी मन्सा से नईं करत, फिन भी जिम्मेदारी मोहां दई गई आय।

¹⁸ सो मोरी मजूरी कौन सी आय? जौ कि भलो सन्देसो सुनाबे में मैं मसीह कौ भलो सन्देसो सेंत मेंत कर दों; इते लौ कि भले सन्देसे में मोरो जौन अधकार आय, ऊ को मैं सबई भांत से काम में लाओं।

¹⁹ कायसे सबरे बन्धनों से छूटबे पे सोई मैंने अपने आप हां सबरन कौ चाकर बना दओ आय; कि बिलात जन हां ऐंच लाओं।

²⁰ मैं यहूदियन के लाने यहूदी बनो, कि यहूदियन हां ऐंच लाओं, जौन नैम व्यवस्था के अधीन आंय उन के लाने नैम व्यवस्था के अधीन न होबे पे सोऊ नैम व्यवस्था के अधीन बनो, कि जौन नैम व्यवस्था के अधीन आंय, ऐंच लाओं।

²¹ नैम व्यवसथा न मानबेवारन के लाने मैं (जौन परमेसुर की नैम व्यवस्था के बिना नईं, परन्त मसीह की नैम व्यवस्था के अधीन आंव) बिना नैम व्यवस्थावारो बनो, कि बिना नैम व्यवस्थावारन हां ऐंच लाओं।

²² मैं कमजोर मान्सन के लाने कमजोर बन गओ, कि कमजोर जन हां ऐंच लाओ, मैं सबरे मान्सन के लाने सबई कछु बनो आंव, कि कोऊ न कोऊ परकार से बिलात जनन कौ तरन तारन कराओं।

²³ मैं सब कछु भले सन्देसे के लाने करत आंव, कि मैं दूसरन कौ संग्गी बन जाओं।

²⁴ काय तुम हां पता नईंयां, कि दौड़ में बिलात जनें दौड़त आंय, अकेले इनाम एकई को मिलत आय, तुम ऊंसई दौड़ो कि इनाम पा जाओ।

²⁵ और सबरे पैलवान सबई परकार कौ संयम करत आंय, बे तो नास होबेवारे मुकट को पाबे के लाने जौ सब करत आंय, परन्त हम तो ऊ मुकट के लाने करत आंय, जौन नास न हुईय।

²⁶ ई लाने मैं तो ई परकार से दौड़त आंव, परन्त ऐसो नईं कि ठिकानो न होबे, मैं सोई ऐई परकार से घूंसों से लड़त आंव, परन्त उन घांई नईं जौन हवा को पीटत भए लड़त आंय।

²⁷ परन्त मैं अपनी देयां को मारत कूटत, और बस में करें रैत आंव; ऐसो न होबे कि दूसरन को परचार करके, मैं खुद कोई भांत से निकम्मो ठैरों।