- पैली कुरिन्थियों 8 - Bundeli Holy Bible

¹ अब मूरतों के सामूं बलि करी भई बस्तों के बारे में - हम जानत आंय, कि हम सबई हां ज्ञान आय: ज्ञान घमण्ड पैदा करत आय, परन्त प्रेम से बढ़ती होत आय।

² जदि कोऊ समझे, कि मोहां कछु पता आय, तो जैसो जानो चईये ऊंसो अबै लौ नईं जानत।

³ परन्त जदि कोऊ परमेसुर से प्रेम धरत आय, तो ऊए परमेसुर चीनत आय।

⁴ सो मूरतों के सामूं बलि करी भई बस्तों के खाबे के बारे में -- हम जानत आंय, कि संसार में मूरत कछु बस्त नईंयां, और एक हां छोड़ कोऊ और परमेसुर नईंयां।

⁵ ऊंसे तो आकास में और धरती पे बिलात ईसुर कहात आंय, (जैसो कि बिलात के ईसुर और बिलात के पिरभु आंय)।

⁶ परन्त हमाए ऐंगर तो एकई परमेसुर आय: जाने कि बाप जौन कुदाऊं से सबरी बस्तें आंय, और हम उनईं के लाने आंय, और एकई पिरभु आय, जाने कि यीशु मसीह जिनके द्वारा सबरी बस्तें भईं, और हम सोई उनईं के द्वारा आंय।

⁷ परन्त सबरन हां ऐसो ज्ञान नईंयां; परन्त कितेक जनें अब लौ मूरत हां कछु समजबे के कारण मूरतन के सामूं बलि करी गई कछु बस्त जानके खात आंय, और उन कौ हिया कमजोर होकें असुद्ध होत आय।

⁸ खैबो हम हां परमेसुर के ऐंगर नईं ले जात, जदि हम न खाबें, तो कछु नुकसान नईंयां, और जदि खाबें तो कछु फायदा नईंयां।

⁹ परन्त हुंसयार रओ, ऐसो न होबे, कि तुमाई जा छूट कऊं कमजोर जन के लाने उपटा लगबे कौ कारण बने।

¹⁰ कायसे जदि कोऊ तोय ज्ञानी हां मूरत के मन्दर में खात तके, और ऊ कमजोर मान्स होबै, तो का ऊ की समज में मूरत के सामूं बलि करी भई बस्त के खैबे की हिम्मत न हो जै है।

¹¹ ई परकार से तोरी समज के काजें बो कमजोर भईया जीके लाने मसीह मरो, नास हो जै है।

¹² सो भईयन को अपराध करबे से और उन की कमजोर समज हां चोट पोंचाबे से तुम मसीह कौ अपराध करत आव।

¹³ ई काजें जदि खैबो मोरे भईया हां ठेस खबाए, तो मैं कभऊं कोऊ भांत से मांस न खै हों, न होबे कि मैं अपने भईया को उपटा कौ कारण बनों।