- पैली कुरिन्थियों 7 - Bundeli Holy Bible

¹ उन बातन के लाने जौन तुम ने लिखीं आंय, जौ साजो आय, कि मान्स बईयर हां न छिए।

² परन्त कुकर्म के डर से सबरे मन्सेलुअन की घरवारी, और सबरी बईयरन कौ मन्सेलू होबे।

³ मन्सेलू अपनी घरवारी कौ हक्क पूरो करे; ऊं सई घरवारी सोई अपने मन्सेलू कौ।

⁴ घरवारी हां अपनी देयां पे अधकार नईं पर ऊके मन्सेलू कौ अधकार आय; ऊं सई मन्सेलू हां अपनी देयां पे अधकार नईं, परन्त घरवारी कौ आय।

⁵ तुम एक दूजे से न्यारे होकें न रओ; परन्त कछु बेरा लौ आपस की राजी खुसी से कि बिन्तवाई के लाने कछु टैम मिले, और फिन एक संग्गै रओ, ऐसो न होबै, कि तुमाए न्यारे होकें रैबे से शैतान छलिया तुम हां परखे।

⁶ परन्त मैंने जो कओ आय बो मोरी सलाय आय हुकम नईंयां।

⁷ मैं जौ चाहत आंव, कि जैसो मैं आंव, ऊंसई सबरे मान्स होबें; परन्त सबरन हां परमेसुर कुदाऊं से न्यारे न्यारे बरदान मिले आंय; कोऊहां कोऊ भांत कौ, और कोऊहां और कोऊ भांत कौ।

⁸ परन्त मैं बिना ब्याओवारन और बिधवाओं के लाने कैत आंव, कि उन के लाने ऐसई रैबो साजो आय, जैसो मैं आंव।

⁹ परन्त जदि बे कामवासना बस में न कर सकें, तो बे शादी ब्याओ करें; कायसे शादी ब्याओ करबो कामवासना में जलत रैबे से साजो आय।

¹⁰ जिन कौ ब्याओ हो गओ आय, उन हां मैं नईं, पिरभु हुकम देत आय, कि बईयर अपने मन्सेलु से अलग न होबै।

¹¹ (और जदि अलैदा हो सोई जाबै, तो बिना दूसरो ब्याओ करे रैबे; या अपने मन्सेलू से फिन मेल कर लेबे) और न मन्सेलू अपनी घरवारी हां छोड़े।

¹² और जन से पिरभु नईं, अकेले मैं कैत आंव, कि कोऊ भईया की घरवारी बिसवास न धरत होबे, परन्त ऊके संग्गै रैबे हां राजी होबे, तो बो ऊहां न छोड़े।

¹³ और जदि कोऊ बईयर कौ मुन्स बिसवास नईं धरत होबे, परन्त ऊके संग्गै रैबे हां राजी होबे; तो बा अपने मन्सेलू हां न छोड़े।

¹⁴ कायसे ऐसो मन्सेलू जौन बिसवास नईं धरत होबे, बो अपनी घरवारी के काजें पवित्तर ठहराओ जै है, और ऐसी बईयर जौन बिसवास न धरत होबे, अपने घरवारे के काजें पवित्तर ठहराई जै है; नईं तो तुमाए बालबच्चे असुद्ध होते, परन्त अब तो बे सुद्ध आंय।

¹⁵ कोऊ जनो जौन बिसवास न धरत होबे, तो छोड़ छुट्टी हो जान देओ, ऐसे में कोऊ भईया या बिन्नू हां कोऊ बन्धन नईंयां; परन्त परमेसुर ने हम हां मेल जोल हां टेरो आय।

¹⁶ कायसे हे बईयर, का तोहां पता आय, कि तें अपने मुन्स कौ तरन तारन करा लै है? और हे भईया, तोहां पता आय, कि तें अपनी घरवारी कौ तरन तारन करा लै है?

¹⁷ परन्त जैसो पिरभु ने एक एक हां बांटो आय, और जैसो पिरभू ने एक एक को बुलाओ आय; ऊंसई बो चले: और मैं सबरी मंडलियन में ऐसई हुकम देत आंव।

¹⁸ जौन खतना करो भओ बुलाओ गओ होय, बो बिना खतनावारो न बने: और जौन बिना खतनावारो बुलाओ गओ होय, बो खतना न कराबै।

¹⁹ न तो खतना कछु आय, और न ऊं सई बिना खतनावारो परन्त परमेसुर कौ हुकम मानबो सबई कछु आय।

²⁰ हर एक जन जैसो बुलाओ गओ होय, ऊं सई रैबे।

²¹ जदि तें चाकर जैसो बुलाओ गओ होय तो चिन्ता नें कर; अकेले जो तें छूटबो चाहे, तो ऐसई काम कर।

²² कायसे जौन चाकर जैसो पिरभु में बुलाओ गओ आय, बो पिरभु लौ छोड़ो भओ आय: और ऊं सई जौन छूटे जैसो बुलाओ गओ आय, बो मसीह कौ चाकर आय।

²³ तुम टका देके मोल लए गए आव, मान्सन के चाकर न बनो।

²⁴ हे भईया हरौ, जो कोऊ जैसो बुलाओ गओ होबे, बो ओई में परमेसुर के संग्गै रैबे।

²⁵ कुंआरिअन के लाने पिरभु कौ कोऊ हुकम मोहां नईं मिलो, परन्त बिसवास जोग होबे के लाने जैसी किरपा पिरभु ने मो पे करी आय, ओई के अनसार सलाय देत आंव।

²⁶ सो मोरी समज में जौ साजो आय, कि ई दिना में पीड़ा के काजें मान्स जैसो आय, ऊं सई रैबे।

²⁷ जदि तोरी घरबारी आय, तो ऊसे अलैदा होबे कौ जतन न कर: और जदि तोरी घरवारी नईंयां, तो बईयर हां न खोज।

²⁸ परन्त जदि तें ब्याओ सोई करे, तो पाप नईंयां; और जदि कुंआरी ब्याही जाबै तो कछु पाप नईंयां; परन्त ऐसन हां देयां की पीड़ा हुईये, और मैं बरकाओ चाहत आंव।

²⁹ हे भईया हरौ, मैं जौ कैत आंव, कि बेरा हां घटा दओ गओ आय, ई लाने चईये कि जिन की घरवारी होबे, बे ऐसे होबें मानो कि उन की घरवारी नईंयां।

³⁰ और रोबेवारे ऐसे होबें, मानो रोऊ त नईंयां; और खुसी मनाबेवारे ऐसे होबें, मानो खुसी नईं मनात; मोल लेबेवारे ऐसे होबें, मानो उन लौ कछु नईंयां।

³¹ और ई संसार की बस्तन हां काम में लाबेवारे ऐसे होबें, कि उनई में मगन न हो जाबें, कायसे ई संसार की रीत और ब्योहार बदलत जात आंय।

³² सो मैं जौ चाहत आंव, कि तुम बिलात न सोचो: जीकौ ब्याओ नईं भओ बो मान्स पिरभु की बातन के सोच में रैत आय, कि पिरभु हां कैसे खुस राखै।

³³ परन्त ब्याओवारो जनो संसार की बातन के सोच में रैत आय, कि अपनी घरवारी हां कौन भांत से खुस राखै।

³⁴ ब्याओवारी और बिना ब्याओवारी में सोई भेद आय: बिना ब्याओवारी पिरभु के सोच में रैत आय, कि बो देयां और आत्मा दोईयन में पवित्तर होबै, परन्त ब्याओवारी संसार के सोच में रैत आय, कि अपने मन्सेलु हां खुस राखै।

³⁵ जा बात तुमाए लाभ के लाने कैत आंव, जौ नईं कि तुम हां फांस लेंओं, परन्त ई लाने कि जैसो नोंनो आय, ऊंसई करो जाबे; कि तुम एक हिये के होकें पिरभु की सेवा में लगे रओ।

³⁶ और जदि कोऊ जौ समजे, कि मैं अपनी ऊ कुंआरी कौ हक्क मार रओ आंव, जी की जवानी ढल रई आय, और ऊ सोचे कि ऊकौ ब्याओ होबो चईये, तो जैसो चाए, ऊंसो कर, ईमें पाप नईंयां, बो ऊकौ ब्याओ होन देबे।

³⁷ परन्त जौन हिये में पक्को रैत आय, और ऊहां ब्याओ करे हां मन्सा न होबे, बो मन्सा पूरी करबे कौ अधकार राखत आय, और जौन कोऊ ने अपने अपने हिये में पक्को कर लओ होय, कि मैं अपनी कुंआरी हां बिना ब्याओ रैन दे हों, बो साजो करत आय।

³⁸ सो जौन अपनी कुंआरी कौ ब्याओ कर देत आय, बो साजो करत आय, और जौन ब्याओ नईं करत, ऊ सोई साजो करत आय।

³⁹ जब लौ कोई बईयर कौ मन्सेलु जियत रैत आय, तब लौ बो ऊसे बंधी भई आय, परन्त जब ऊकौ मन्सेलु मर जाबै, तो जीसें चाए ब्याओ कर सकत आय, अकेले पिरभु में।

⁴⁰ परन्त जैसी आय जदि वैसई रैबे, तो मोरे विचार में औरऊ धन्न आय, और मैं समजत आंव, कि परमेसुर कौ आत्मा मो में सोई आय।