- पैली कुरिन्थियों 5 - Bundeli Holy Bible

¹ इतै लौ सुनबे में आत आय, कि तुम में कुकर्म होत आय, ऐसो पाप जौन दूसरी जातवारन में लौ नईं होत, कि एक जनो अपने बाप की घरवारी हां राख लेत आय।

² तुम हां ई पाप से सरम लौ नईं आत, कि ऐसे काज के करबेवारे हां अपने बीच से काड़ बायरें करो, पर तुम तो मूड़ ऊंचो कर के निगत आव।

³ मैं तो देयां के भाव से तुम से दूर हतो, परन्त हिये से तुमाए बीच ऐसे पाप करबेवारन के लाने हुकम दे चुको आंव।

⁴ कि जब मोरी और तुमाई आत्मा, हमाए पिरभु यीशु मसीह के जस से जुड़ जाबे, तो ऐसो मान्स, हमाए पिरभु यीशु मसीह के नाओं से।

⁵ शैतान छलिया के लाने छोड़ दओ जाबै, कि ऊ की आत्मा यीशु के नाओं से तरन तारन पाबै।

⁶ तुमाओ बड़ो बोल बोलवो साजो नईंयां: का तुम हां जौ पता नईयां, कि तनक से खमीर से पूरो मड़ो भओ चून खमीर हो जात आय।

⁷ पुराने खमीर हां काड़ डालो, और तुम साजे कड़ आओ: और साजो मड़ो भओ चून बनो: कि तुम में खमीर न रैबे, कायसे हमाओ फसह जौन मसीह आय, हमाए लाने बलदान भओ आय।

⁸ सो आओ, हम त्यौहार में खुसी मनाबें, न पुराने खमीर से न बुराई से न दुष्टता के खमीर से, परन्त सांचे हिये और सच्चाई की बनी खमीर की रोटी संग्गै।

⁹ मैंने अपनी चिठिया में लिखो आय, कि परतिरिया संगत करबेवारे से संगत न करियो।

¹⁰ जौ नईं, कि तुम सबरेहार ई संसार के परतिरिया संगत करबेवारन की, लालची, या अन्धेर करबेवारे, मूर्ती पूजबेवारों की संगत न करो; कायसे ऐसे में तो तुम हां संसार में से कड़ जाने पड़तो।

¹¹ मोरो कैबो जौ आय; कि जदि कोऊ बिसवासी कहाबे, और परतिरिया संगतवारो, लालची, मूरतन की पूजा करबेवारो, गाली देबेवारो, दारू पीबेवारो, या अंधेर करबेवारो होबै, तो ऊ की संगत न करियो; इते लौ कि ऐसे मान्स के संग्गै रोटी सोई न जेईयो।

¹² कायसे मोहां बायरेंवारन से का काम? कि उन कौ न्याव करों का तुम अपनी समाज में न्याव नईं करत?

¹³ बायरेंवारन कौ न्याय परमेसुर करत आय: ई लाने ऊ कुकर्मी हां अपने बीच से काड़ दो।