- पैली कुरिन्थियों 16 - Bundeli Holy Bible

¹ अब ऊ दान के बारे में जौन पवित्तर जनों के लाने जोड़ो जात आय, जैसो हुकम मैंने गलतिया की मंडलियन हां दओ, ऊंसई तुम सोई करो।

² हप्ताह के पैले दिना तुम में से सबरे जने अपनी कमाई के अनसार कछु बचा के धर छोड़े, कि मोरे आबे पे दान न जोड़ने पड़े।

³ और जब मैं आहों, तो जिन हां तुम चाहौ उनहां चिठिया देके पठै दें हों, कि तुमाओ दान यरूशलेम पोंचा दें।

⁴ और जदि मोरो जाबो नोंनो रै है, तो बे मोरे संग्गै चले जै हैं।

⁵ और मैं मकिदुनिया होकें तुमाए ऐंगर आहों, कायसे कि मोय मकिदुनिया होकें तो जाने आय।

⁶ परन्त हो सकत आय कि तुमाए इते रुक जाओं और शरद ऋतु के दिना तुमाए इते काटों, तब जां मोरो जाबो हुईये, तुम पठै दईयो।

⁷ कायसे मैं अब गैल में तुम से नईं मिलो चाहत; परन्त मोय आसा आय, कि जदि पिरभु चाए, तो कछु बेरा लौ तुमाए संग्गै रै हों।

⁸ परन्त मैं पिन्तकुस्त लौ इफिसुस में रै हों।

⁹ कायसे मोरे लाने एक बड़ो और काम कौ दोरो खुलो आय, और बिरोधी बिलात के आंय।

¹⁰ जदि तीमुथियुस आ जाबै तो हेरिओ; कि बो तुमाए इते बिना डर के रैबे; कायसे बो मोरे घांई पिरभु कौ काम करत आय।

¹¹ ई लाने कोऊ ऊहां नेंचो न माने, परन्त ऊहां सुतारें ई कोद पठै दईयो, कि मोरे ऐंगर आ जाबे; कायसे मैं ऊ की बाट तक रओ आंव, कि बो भाईयन के संग्गै आबै।

¹² और अप्पुल्लोस भईया से मैंने बिलात बिन्तवाई करी आय, कि बो तुमाए ऐंगर भाईयन के संग्गै जाबै; परन्त ऊ ने ई बेर जाबे हां कछु लौ अभलाखा न करी, परन्त जब मौका हुईये तब आ जै है।

¹³ हुंसयार रओ, बिसवास में पक्के बनो, संयमी जीवन जियो, बल सक्ति से भर जाओ।

¹⁴ जो कछु करत आव प्रेम से करो।

¹⁵ हे भईया हरौ, तुम स्तिफनास के घरवारन हां जानत आव, कि बे अखया में सबसे पेंला बिसवास लाए हते, और पवित्तर जनों की सेवा खुसामद हां तईयार रैत आंय।

¹⁶ सो मैं तुम से बिन्तवाई करत आंव कि ऐसन कौ कओ मानो, जाने सबई कोई के जौन ई काम में मैनती और संग्गी आय।

¹⁷ और मैं स्तिफनास और फूरतूनातुस और अखइकुस के आबे से खुस आंव, कायसे उन ने तुमाई घटी पूरी करी आय।

¹⁸ और उन ने मोरो और तुमाओ हिया जूड़ो करो आय, ई लाने ऐसन हां मानो।

¹⁹ आसिया की मण्डली कोद से तुम हां नमस्कार: अक्विला और प्रिसका कौ और उन के घराने की मण्डली कौ सोई तुम हां पिरभु में कुल्ल बिलात कौ नमस्कार।

²⁰ सबरे भईयन कौ तुम हां नमस्कार: पवित्तर चूमा से एक दूजे हां नमस्कार करो।

²¹ मैं पौलुस कौ अपने हाथन से लिखो भओ नमस्कार: जदि कोई पिरभु से प्रेम न धरे ऊ पे तुरतईं विपदा पड़े।

²² हमाओ पिरभु आबेवारो आय।

²³ पिरभु यीशु मसीह की दया तुम पे होत रैबे।

²⁴ मोरो प्रेम मसीह यीशु में तुम सबरन से रैबे। आमीन।